Read Pashto (Nangahari) — د پښتو مقدس کتاب لوقا 21 Bible Online

لوقا 21 - Pashto (Nangahari) — د پښتو مقدس کتاب bible

لوقا 21

¹عیسی شاوخوا وکتل او ویې لیدل چې شتمن خلک خپلې نذرانې د خدای د کور په خزانه کې اچوي،

²او همدارنګه هغه یوه غریبه کونډه ولیدله چې خپلې دوه روپۍ یې په هغې خزانه کې واچولې.

³عیسی وویل: «زه تاسو ته دا وایم چې دې غریبې کونډې د نورو ټولو څخه زیاتې پیسې واچولې،

⁴ځکه چې هغوی ټولو هغه پیسې واچولې چې د هغوی د اړتیاوو څخه زیاتې وې، خو دې ښځې د خپلې غریبۍ سره بیاهم هرڅه چې یې لرل واچول.»

⁵ځینو شاګردانو د خدای د کور په هکله خبرې کولې او د هغو ښکلو تیږو او سوغاتونو صفتونه یې کول چې د خدای کور ورباندې ښکلی شوی ؤ. عیسی وویل:

⁶«دا شیان چې تاسو یې وینئ، داسې وخت به راشي چې په دې کې به یوه تیږه هم په بله تیږه پاتې نه شي او ټولې به راونړیږي.»

⁷هغوی پوښتنه وکړه: «ای استاده! دا شیان به څه وخت پېښیږي او د دې پېښو د رانږدې کېدلو نښې به څه وي؟»

⁸عیسی وویل: «پام کوئ چې بې لارې نه شئ. ځکه چې ډېر به زما په نوم راشي او وایي به چې زه مسیح یم! او هغه وخت رارسېدلی دی‎. خو د هغوی پسې مه ځئ.

⁹کله چې د جنګونو او ګډوډیو په هکله کوم څه اورئ، نو مه وېرېږئ. ځکه چې لومړی به دا شیان خامخا پېښیږي، خو دا د دې معنی نه لري چې دا هرڅه به سمدلاسه پای ته ورسیږي.»

¹⁰بیا یې هغوی ته وویل: «یو قوم به د بل قوم سره جنګبږي، یوه پادشاهي به د بلې پادشاهۍ سره وجنګیږي.

¹¹سختې زلزلې به وشي، په ډېرو ځایونو کې به قحطي او وباګانې راشي او په آسمان کې به ویروونکې او لویې نښې راښکاره شي.

¹²خو له دې هر څه نه مخکې به هغوی تاسو ونیسي او وبه مو ځوروي. تاسو به د محاکمې دپاره کنیسا ګانو ته وسپارل شئ او په زندانونو کې به واچول شئ او زما د نوم په خاطر به د محاکمې دپاره پادشاهانو او والیانو ته بوتلل شئ.

¹³دا به ستاسو دپاره د شاهدۍ ورکولو یوه موقعه وي.

¹⁴په دې هکله ډېر فکر مه کوئ چې د خپلو ځانونو څخه به څنګه دفاع کوئ.

¹⁵ځکه چې زه به تاسو ته د خبرو کولو حکمت درکړم چې ستاسو له دښمنانو څخه به هیڅوک ونه شي کولی ستاسو په وړاندې ودریږي او یا مخالفت وکړي.

¹⁶تر دې چې ستاسو مور او پلار، ورونه، خپلوان او دوستان به ستاسو سره خیانت وکړي او ستاسو څخه به ځینې ووژل شي

¹⁷او زما د نوم له امله به ټول خلک ستاسو څخه کرکه کوي.

¹⁸خو ستاسو د سر یو ویښته به هم کم نه شي.

¹⁹ټینګ ودرېږئ نو تلپاتې ژوند به وګټئ.

²⁰خو کله چې تاسو ووینئ چې اورشلیم د لښکرو له خوا کلابند شوی دی، نو بیا پوه شئ چې د هغه د ورانیدلو وخت رانږدې شوی دی.

²¹نو په هغه وخت کې چې څوک په یهودیې کې وي هغه دې غرونو ته وتښتي. څوک چې په ښار کې وي نو د ښار څخه دې ووځي او څوک چې د ښار څخه دباندې وي هغوی دې ښار ته نه ننوځي.

²²ځکه چې دا به د سزا ورکولو ورځې وي ترڅو هغه څه چې د خدای په کلام کې لیکل شوي دي پوره شي.

²³افسوس دې وي د هغو ښځو په حال چې په هغو ورځو کې امیدوارې وي او په هغو میندو چې خپلو ماشومانو ته شیدې ورکوي. ځکه چې د ځمکې په مخ به سخت مصیبت راشي او په دې خلکو به د خدای غضب نازل وي.

²⁴هغوی به په تورو ووژل شي او ټولو هېوادونو ته به د اسیرانو په توګه بوتلل شي او اورشلیم به د غیریهودیانو له خوا تر پښو لاندې کیږي ترڅو د غیریهودیانو دوران پای ته ونه رسیږي.

²⁵په لمر، سپوږمۍ او ستورو کې به نښې راښکاره شي او قومونه به د ځمکې په مخ د دریاب د شرهار او څپو څخه تنګ او پرېشانه وي.

²⁶خلک به د دې پیښې له وېرې او اندیښنې څخه چې په نړۍ کې رامنځته کیږي بې هوشه شي، ځکه چې آسماني موجودات به ولړزول شي.

²⁷بیا به هغوی د انسان زوی وویني چې په ورېځو کې به د قدرت او زیات شان او شوکت سره راروان وي.

²⁸کله چې دا شیان پیل شي نو تاسو نېغ ودرېږئ او زړور اوسئ، ځکه چې ستاسو خلاصون نږدې دی.»

²⁹بیا عیسی هغوی ته دا مثال راوړ: «د انځر ونې او نورو ونو ته وګورئ.

³⁰کله چې هغه غوټۍ وسپړي، نو تاسو خپله وینئ او پوهېږئ چې اوړی رانږدې دی.

³¹په همدې ډول کله چې د دې شیانو پېښېدل ووینئ نو پوه شئ چې د خدای پادشاهي نږدې شوې ده.

³²زه تاسو ته رښتیا وایم چې دا نسل به ترهغې پورې له منځه لاړ نه شي ترڅو دا ټولې پیښې رامنځته شوې نه وي.

³³ځمکه او آسمان به له منځه لاړ شي خو زما خبرې به هیڅکله له منځه لاړې نه شي.

³⁴پام کوئ، خپل زړونه په میلو، نېشو او دنیاوي اندیښنو مه اخته کوئ، هسې نه چې هغه ورځ به یوناڅاپه په تاسو راشي،

³⁵او لکه د دام په شان به د نړۍ ټول خلک چې په هرځای کې وي راګېر کړي.

³⁶نو بیدار اوسئ او هر وخت دعا کوئ ترڅو دا توان پیدا کړئ چې د دې ټولو شیانو څخه چې ډېر ژر به پېښ شي، وژغورل شئ او د انسان د زوی په مخکې ودرېدلی شئ.»

³⁷عیسی به د ورځې له خوا د خدای په کور کې تعلیم ورکاوه، ماښام به وتلو او شپه به یې د زیتون په غره کې تېروله

³⁸او سهار وختي به ټول خلک د خدای کور ته ورتلل چې د هغه خبرې واوري.