Read Pashto (Nangahari) — د پښتو مقدس کتاب لوقا 23 Bible Online

لوقا 23 - Pashto (Nangahari) — د پښتو مقدس کتاب bible

لوقا 23

¹بیا د شورا ټول غړي پاڅېدل او عیسی یې پیلاتوس ته بوتلو

²او په هغه باندې یې په تور لګولو پیل وکړ: ‎«مونږ ولیدل چې دې سړي زمونږ قوم بې لارې کاوه او خلک امپراتور ته د مالیې ورکاوه څخه منع کوي او دعوه کوي چې هغه خپله مسیح یعنې پادشاه دی.»

³پیلاتوس د هغه څخه پوښتنه وکړه: «آیا ته د یهودیانو پادشاه یې؟» عیسی ځواب ورکړ: «ته په خپله وایې.»

⁴بیا پیلاتوس مشرانو کاهنانو او حاضرو خلکو ته وویل: «زه په دې سړي کې هیڅ ډول جرم نه وینم.»

⁵خو هغوی ډېر ټینګار کاوه او ویل یې: «هغه په ټولې یهودیې کې په تعلیم ورکولو سره خلک راپاروي. هغه د جلیل څخه پیل وکړ او تر دې ځایه راورسېد.»

⁶کله چې پیلاتوس دا واورېدل نو پوښتنه یې وکړه: «آیا دا سړی جلیلي دی؟»

⁷کله چې هغه خبر شو چې عیسی د هغې سیمې څخه دی چې د هیرودیس تر واکمنۍ لاندې ده نو هغه یې هیرودیس ته چې په هغه وخت کې په اورشلیم کې ؤ، ولېږه.

⁸کله چې هیرودیس عیسی ولید نو ډېر خوشحاله شو، ځکه چې د هغه په هکله یې ډېر څه اوریدلي وو او له ډېرې مودې راهیسې یې غوښتل چې عیسی وویني. هغه په دې تمه ؤ چې د هغه څخه کومه معجزه وویني.

⁹نو هیرودیس د عیسی څخه ډېرې پوښتنې وکړې، خو عیسی هیڅ ځواب ورنه کړ.

¹⁰مشران کاهنان او د شریعت عالمان ولاړ وو او په عیسی یې سخت تورونه ولګول.

¹¹هیرودیس او د هغه عسکرو په عیسی باندې ملنډې ووهلې او د هغه سپکاوی یې وکړ، بیا یې د پادشاهۍ چپنه ورته ورواغوستله او بېرته یې پیلاتوس ته ورولېږه.

¹²په هماغه ورځ هیرودیس او پیلاتوس یو د بل سره دوستان شول، ځکه چې له دې څخه مخکې د هغو دواړو ترمنځ دښمني وه.

¹³بیا پیلاتوس مشران کاهنان، د قوم مشران او خلک راوغوښتل

¹⁴او هغوی ته یې وویل: «تاسو دا سړی ما ته راوستی دی او وایئ چې هغه خلک بې لارې کوي. خو اوس ما ستاسو په مخکې د هغه څخه پوښتنې وکړې او په هغه کې مې هغه جرم ونه مونده چې تاسو پرې تور لګولی دی.

¹⁵او نه هم هیرودیس په هغه کې کومه ګناه ولیدله، نو ځکه یې بېرته مونږ ته راولیږه. ښکاره ده چې هغه داسې کوم کار نه دی کړی چې د مرګ لایق وي.

¹⁶نو زه به هغه د یو څو دورو وهلو وروسته پرېږدم چې لاړ شي.»

¹⁷[ځکه په هغه وخت کې دا رواج ؤ چې په هر اختر کې هغوی ته یو بندي آزاد کړي.]

¹⁸خو ټولو خلکو په یو آواز چیغې کړې: «دا سړی ووژنه! باراباس مونږ ته راخلاص کړه.»

¹⁹باراباس یو سړی ؤ چې په ښار کې د بغاوت او قتل په تور زندان ته اچول شوی ؤ.

²⁰پیلاتوس چې غوښتل یې عیسی خلاص کړي یوځل بیا هغوی ته خبرې وکړې.

²¹خو هغوی چیغې وهلې: «په صلیب باندې یې ځوړند کړه، په صلیب باندې یې ځوړند کړه.»

²²پیلاتوس د دریم ځل دپاره هغوی ته وویل: «ولې؟ څه جرم یې کړی دی؟ ما په هغه کې داسې کوم جرم ونه مونده چې د مرګ لایق وګڼل شي. نو زه به هغه د یو څو دورو وهلو وروسته پرېږدم چې لاړ شي.»

²³خو هغوی ټینګار کاوه او په لوړ آواز سره یې چیغې وهلې چې هغه باید په صلیب وځړول شي. خلکو دومره چیغې ووهلې چې په پای کې د هغوی چیغې بریالۍ شوې.

²⁴نو پیلاتوس د هغوی د غوښتنې سره سم پرېکړه وکړه.

²⁵نو پیلاتوس د هغوی د غوښتنې سره سم باراباس چې د بغاوت او قتل له امله زنداني شوی ؤ د زندان څخه خلاص کړ او عیسی یې هغوی ته په لاس ورکړ چې هرڅه وغواړي ورسره ویې کړي.

²⁶کله چې عسکرو هغه د اعدامولو دپاره بیولو نو هغوی د شمعون په نامه یو سړی چې د قیروان څخه ؤ او د اطراف څخه ښار ته راروان ؤ، راونیوه. هغه یې اړ کړ چې صلیب په اوږه کړي او په عیسی پسې یې یوسي.

²⁷ګڼ شمیر خلک په عیسی پسې روان وو چې په هغو کې ښځې هم وې چې ځانونه یې وهل او د هغه دپاره یې ژړا انګولا کوله.

²⁸عیسی هغوی ته مخ راواړاوه او ورته ویې ویل: «ای د اورشلیم ښځو! زما دپاره مه ژاړئ، خو د خپلو ځانونو او خپلو اولادونو دپاره وژاړئ.

²⁹ځکه چې داسې ورځې راتلونکې دي چې خلک به وایي چې هغه ښځې بختورې دي چې شنډې دي او هیڅکله یې ماشومان نه دي زېږولي او هیڅکله یې تی نه دی ورکړی.

³⁰په هغه وخت کې به خلک غرونو ته وایي چې په مونږ باندې راولویږئ او غونډیو ته به وایي چې مونږ پټ کړئ.

³¹ځکه که چېرې هغوی د شنې ونې سره داسې کار کوي نو د وچې ونې سره به څه کیږي؟»

³²دوه نور مجرمان یې هم د عیسی سره روان کړي وو چې د هغه سره یوځای اعدام شي.

³³کله چې هغوی هغه ځای ته چې د سر د کوپړۍ په نوم یادېده ورسېدل، نو عسکرو عیسی هلته په صلیب ځوړند کړ او هغه دوه مجرمان یې هم ورسره په صلیب وځړول، یو یې د هغه ښي لاس ته او بل یې د هغه چپ لاس ته.

³⁴عیسی وویل: «ای پلاره! دوی وبخښه، ځکه دوی نه پوهیږي چې څه کوي.» عسکرو د عیسی په کالیو باندې پچه واچوله او په خپل منځ کې یې سره ووېشل.

³⁵خلک د سیل دپاره هلته ولاړ وو او د یهودیانو مشرانو په هغه باندې ملنډې وهلې او ویل یې: «هغه نور خلک ژغورل، که چېرې هغه په رښتیا سره د خدای غوره شوی مسیح وي نو اوس دې خپل ځان وژغوري.»

³⁶عسکرو هم په هغه باندې ملنډې ووهلې، هغوی د عیسی خوا ته ورنږدې شول او تروه شراب یې ورته ورکړل

³⁷او ورته ویې ویل: «که چېرې ته د یهودیانو پادشاه یې نو خپل ځان دې وژغوره.»

³⁸د هغه د سر دپاسه یوه تخته لګول شوې وه چې ورباندې لیکل شوي وو: «دا د یهودیانو پادشاه دی.»

³⁹یو له هغو مجرمانو څخه چې هلته ځړول شوی ؤ عیسی ته پېغور ورکړ او ویې ویل: «آیا ته مسیح نه یې؟ نو بیا خپل ځان او مونږ وژغوره.»

⁴⁰خو هغه بل مجرم هغه ورټلو او ورته ویې ویل: «آیا ته له خدایه نه وېرېږې؟ ځکه چې په تا باندې هم د هغه په شان د مرګ حکم شوی دی.

⁴¹زمونږ سره انصاف شوی دی ځکه چې مونږ ته د خپلو عملونو سزا راکول کیږي. خو دې سړي کوم غلط کار نه دی کړی.»

⁴²بیا هغه وویل: «ای عیسی! کله چې خپلې پادشاهۍ ته ورسیدې نو ما هم درپه یاد کړه.»

⁴³عیسی هغه ته وویل: «زه تاته رښتیا وایم چې ته به نن زما سره په جنت فردوس کې واوسې.»

⁴⁴۴۴‏-۴۵ د غرمې شاوخوا دولس بجې وې چې لمر ورک شو او د ماسپښین تر درې بجو پورې په ټول وطن کې تیاره خپره شوه او د خدای د کور پرده په منځ کې دوه ټوټې شوه.

⁴⁵

⁴⁶عیسی په لوړ آواز چیغه ووهله او ویې ویل: «ای پلاره! زه خپل روح تاته سپارم.» دا یې وویل او ساه یې ورکړه.

⁴⁷کله چې رومي منصبدار دا هرڅه ولیدل نو د خدای ثناه یې وویله او ویې ویل: «بیشکه چې دا سړی بې ګناه ؤ.»

⁴⁸هغه خلک چې دې نندارې ته راټول شوي وو، کله یې چې دا پېښه ولیدله نو له غمه یې خپل ځانونه وهل او بېرته خپلو کورونو ته لاړل.

⁴⁹د عیسی ټول آشنایان او هغه ښځې چې د جلیل څخه په هغه پسې راغلې وې په لیرې فاصله کې ولاړې وې او دا هرڅه یې لیدل.

⁵⁰هلته د یوسف په نوم یو سړی ؤ چې په یهودیې کې د رامه د ښار اوسیدونکی ؤ او د یهودیې د شورا غړی ؤ. هغه یو نېک او رښتینی سړی ؤ.

⁵¹خو د هغوی د دې پرېکړې او دې کار سره جوړ نه ؤ او د خدای د پادشاهۍ په انتظار ؤ.

⁵²هغه پیلاتوس ته ورغی او د عیسی مړی یې ترې وغوښت.

⁵³بیا هغه د صلیب څخه مړی راکوز کړ او د کتان په ټوټه کې یې تاو کړ او په تیږه کې کیندل شوي قبر کې یې کېښود چې د دې نه مخکې په کې څوک نه ؤ ښخ شوی.

⁵⁴دا د جمعې ورځ وه، یعنې سبت ته د تیاري نیولو ورځ وه او د سبت ورځ شروع کېدله.

⁵⁵کومې ښځې چې د جلیل څخه د عیسی سره راغلې وې په یوسف پسې روانې وې. هغوی قبر ولید چې د عیسی مړی په کې څنګه ایښودل شوی ؤ.

⁵⁶بیا هغوی بېرته د اورشلیم ښار ته لاړې او د مړي دپاره یې خوشبویه مسالې او عطر تیار کړل او د شریعت د حکم له مخې یې د سبت په ورځ آرام وکړ.