Read Pashto (Nangahari) — د پښتو مقدس کتاب لوقا 4 Bible Online

لوقا 4 - Pashto (Nangahari) — د پښتو مقدس کتاب bible

لوقا 4

¹عیسی چې د روح القدس څخه ډک ؤ د اردن د سیند څخه راستون شو او روح القدس هغه دښتې ته بوتلو

²او په هغه ځای کې څلوېښت ورځې د شیطان تر ازمایښت لاندې ؤ. په هغو ورځو کې هغه هیڅ ونه خوړل او په پای کی ډېر وږی شو.

³شیطان هغه ته وویل: «که ته د خدای زوی یې نو دې تیږې ته ووایه چې په ډوډۍ بدله شي.»

⁴خو عیسی ځواب ورکړ: «د خدای په کلام کې لیکل شوي دي چې انسان یوازې په ډوډۍ باندې ژوندی نه دی.»

⁵بیا شیطان هغه یو لوړ ځای ته بوتلو او د سترګو په رپ کې یې ورته د ټولې نړۍ پادشاهۍ وروښودلې.

⁶شیطان هغه ته وویل: «زه به د دې ټولو واک او اختیار او د هغې شان او شوکت تاته درکړم، ځکه چې دا ما ته راکړل شوي دي او هر چا ته چې زه وغواړم هغه ته یې ورکوم.

⁷که چېرې ته ماته سجده وکړې نو دا ټول به ستا شي.»

⁸عیسی ځواب ورکړ: «د خدای په کلام کې لیکل شوي دي چې خپل څښتن خدای ته عبادت کوه او یوازې د هغه خدمت کوه.»

⁹بیا شیطان هغه اورشلیم ته بوتلو او د خدای د کور په مناره یې ودرولو او ورته ویې ویل: «که چېرې ته د خدای زوی یې نو خپل ځان له دې ځایه ښکته وغورځوه.

¹⁰ځکه چې د خدای په کلام کې لیکل شوي دي چې خدای به خپلو فرښتو ته حکم وکړي چې تا وساتي.

¹¹همدارنګه لیکل شوي دي چې هغوی به تا په خپلو لاسونو کې پورته کړي ترڅو ستا پښه په تیږه ونه لګیږي.»

¹²خو عیسی په ځواب کې وویل: «د خدای په کلام کې ویل شوي دي چې خپل څښتن خدای مه ازمایئ.»

¹³کله چې شیطان ټولې وسوسې پای ته ورسولې نو هغه یې د یو څه وخت دپاره پرېښود.

¹⁴عیسی د روح القدس په قدرت سره جلیل ته راستون شو. د هغه په هکله په ټوله سیمه کې آوازه خپره شوه.

¹⁵هغه د یهودیانو په کنیساګانو کې تعلیم ورکاوه او ټولو خلکو د هغه ستاینه کوله.

¹⁶بیا عیسی د ناصریې ښار ته، یعنې هغه ځای ته چې هغه په کې لوی شوی ؤ راغی، او لکه څنګه چې د هغه عادت ؤ نو د سبت په ورځ کنیسا ته لاړ. هلته ودرېد چې د خدای کلام ولولي

¹⁷او د اشعیا پیغمبر طومار ورته ورکړل شو. هغه یې پرانیست او هغه ځای یې پیدا کړ چې په کې لیکل شوي وو:

¹⁸«د څښتن روح زما سره دی، ځکه چې زه یې غوره کړی یم ترڅو غریبانو ته زېری ورسوم. هغه زه رالېږلی یم چې اعلان وکړم چې بندیان به آزاد شي، ړانده به بینا شي او مظلومان به آزاد شي

¹⁹او دا اعلان کړم چې د څښتن د بخښنې وخت رارسېدلی دی.»

²⁰عیسی طومار بند کړ او هغه یې بېرته د کنیسا خدمتګار ته ورکړ او کښېناست. ټولو خلکو په کنیسا کې د هغه خواته سترګې نیولې وې.

²¹بیا عیسی خبرې پیل کړې او ویې ویل: «نن چې تاسو دا لیکنه واورېدله، هغه رښتیا شوه.»

²²هغوی ټولو په هغه باندې ښه وویل او په دې حیران شول چې داسې د فضل خبرې د هغه د خولې څخه راووتلې او ویل یې: «آیا دا د یوسف زوی نه دی؟»

²³عیسی هغوی ته وویل: «بې له شکه چې تاسو به ماته دا متل ووایئ: ای ډاکتره! خپل ځان روغ کړه. دا به هم راته ووایئ چې کوم کارونه تا د کفرناحوم په ښار کې کړي دي او مونږ د هغو په هکله اوریدلي، هماغه کارونه په خپل ښار کې هم وکړه.»

²⁴عیسی زیاته کړه: «زه تاسو ته رښتیا وایم چې هیڅ پیغمبر په خپل وطن کې چا نه دی قبول کړی.

²⁵دا رښتیا دي چې د الیاس پیغمبر په زمانه کې په اسراییلو کې ډېرې کونډې وې. په هغه وخت کې درې نیم کاله بارانونه نه وو شوي او په ټول وطن کې سخته قحطي راغلې وه.

²⁶خو الیاس په هغو کونډو کې یوې ته هم د مرستې دپاره ونه لېږل شو، خو یوازې هغې کونډې ته ولېږل شو چې د صیدون د زرفت په سیمه کې وه.

²⁷همدارنګه د الیشع پیغمبر په زمانه کې په اسراییلو کې ډېر خلک وو چې د جذام په ناروغیو اخته وو، خو د هغوی څخه یو هم پاک او روغ نه شو، یوازې نعمان چې سوریایي ؤ روغ شو.»

²⁸کله چې په کنیسا کې خلک و دا خبرې واورېدلې نو ډېر په قهر شول.

²⁹هغوی راپاڅېدل او عیسی یې له ښاره وویست او د هغې غونډۍ سرته یې وخیژولو چې دا ښار ورباندې جوړ شوی ؤ ترڅو لاندې یې وغورځوي.

³⁰خو هغه د هغوی له منځ څخه تېر شو او لاړ.

³¹بیا عیسی کفرناحوم ته چې د جلیل یو ښار ؤ لاړ او د سبت په ورځ یې خلکو ته تعلیم ورکاوه.

³²خلک د هغه په تعلیم حیران شول، ځکه چې په پوره اختیار سره یې خبرې کولې.

³³په کنیسا کې یو سړی ؤ چې پېریانو نیولی ؤ او په لوړ آواز یې چیغې ووهلې:

³⁴«ای ناصري عیسی! زمونږ سره څه کار لرې؟ ته راغلی یې چې مونږ تباه کړې؟ زه دې پېژنم چې ته څوک یې، ته د خدای سپیڅلی یې.»

³⁵عیسی پېری ته حکم وکړ: «غلی شه او د دې سړي څخه راووځه.» پېری هغه سړی د هغوی په مخکې په ځمکه راوویشت او بې له دې چې کوم زیان ورته ورسوي ورڅخه ووت.

³⁶ټول خلک حیران شول او یو بل ته یې ویل: «دا څه خبره ده چې دا سړی په پوره اختیار او قدرت سره پېریانو ته امر کوي او هغوی وځي؟»

³⁷او په دې ډول دا خبره په ټوله سیمه کې خپره شوه.

³⁸عیسی د کنیسا څخه راووت او د شمعون کور ته لاړ. د شمعون خواښې سختې تبې نیولې وه او هغوی د عیسی څخه وغوښتل چې له هغې سره مرسته وکړي.

³⁹عیسی لاړ او د هغې په خوا کې ودرېد او تبې ته یې امر وکړ چې هغه پرېږدي. تبې هغه ښځه پرېښودله او سمدلاسه پاڅېدله او د هغوی خدمت یې شروع کړ.

⁴⁰د لمر پرېوتو په وخت کې ‎خلکو خپل ناروغان چې په ډول ډول ناروغیو اخته وو عیسی ته راوستل. هغه په هر یو باندې خپل لاس کېښود او ټول یې روغ کړل.

⁴¹د ډېرو خلکو څخه پېریان ووتل او چیغې یې وهلې: «ته د خدای زوی یې.» خو عیسی پېریانو ته حکم وکړ او هغوی یې پرېنښودل چې خبرې وکړي، ځکه هغوی پوهېدل چې هغه مسیح دی.

⁴²کله چې سهار شو نو عیسی له ښاره روان شو او یو ګوښه ځای ته لاړ. خلکو هغه لټولو او چې کله یې پیدا کړ نو کوښښ یې وکړ چې د هغه د تللو مخه ونیسي.

⁴³خو هغه ورته وویل: «زه باید نورو ښارونو ته هم د خدای د پادشاهۍ زېری ورسوم، ځکه چې د همدې کار دپاره رالېږل شوی یم.»

⁴⁴نو هغه د یهودیې په ټولو کنیسا ګانو کې وعظ کاوه.