Read Pashto (Nangahari) — د پښتو مقدس کتاب لوقا 5 Bible Online

لوقا 5 - Pashto (Nangahari) — د پښتو مقدس کتاب bible

لوقا 5

¹یوه ورځ عیسی د جنیسارت د دریاب په غاړه ولاړ ؤ او خلکو یو او بل سره ټېله کول چې ځانونه هغه ته ورسوي ترڅو د خدای کلام واوري.

²هغه ولیدل چې د دریاب په غاړه دوه کشتۍ ولاړې وې، ماهي نیوونکي ترې راکوز شوي وو او جالونه یې مینځل.

³عیسی یوې کشتۍ ته چې د شمعون وه، وروخوت او د هغه څخه یې وغوښتل چې کشتۍ د غاړې څخه لږه لیرې بوزي. عیسی په کشتۍ کې ناست ؤ او له هغه ځایه یې خلکو ته تعلیم ورکاوه.

⁴کله چې هغه خبرې پای ته ورسولې، نو شمعون ته یې وویل: «کشتۍ د اوبو منځ ته یو ژور ځای ته بوځه او تاسو خپل جالونه اوبو ته وغورځوئ چې ماهیان ونیسئ.»

⁵شمعون ورته په ځواب کې وویل: «ای باداره! مونږ ټوله شپه خواري وکړه او هیڅ مو ونه نیول. خو که چېرې ته وایې نو زه به جالونه ورواچوم.»

⁶هغوی همداسې وکړل او دومره زیات ماهيان یې ونیول چې نږدې ؤ جالونه وشلیږي.

⁷نو هغوی خپلو ملګرو ته چې په بلې کشتۍ کې وو اشاره وکړه چې راشي او مرسته ورسره وکړي. هغوی راغلل او دواړه کشتۍ یې له ماهیانو څخه داسې ډکې کړې چې نږدې ؤ ډوبې شي.

⁸کله چې شمعون پطروس ولیدل چې څه وشول، هغه د عیسی پښو ته پرېوت او ویې ویل: «ای پاکه استاده! زما څخه لیرې شه. ځکه چې زه یو ګناهکار انسان یم.»

⁹پطروس او ټول ملګري یې د دومره زیاتو ماهيانو په نیولو حیران پاتې شول.

¹⁰همدارنګه د شمعون شریکان یعقوب او یوحنا چې د زبدي زامن وو هم حیران شول. عیسی شمعون ته وویل: «مه وېرېږه، له دې وروسته به ته ماهیان نه بلکه انسانان رانیسې.»

¹¹کله چې هغوی خپلې کشتۍ وچې ته راوستلې، نو هرڅه یې پرېښودل او په عیسی پسې روان شول.

¹²یوځل عیسی په یو ښار کې ؤ، هلته یو سړی ؤ چې د جذام په ناروغۍ اخته ؤ. کله چې هغه سړي عیسی ولید نو په پښو کې یې پرېوت او زارۍ یې ورته وکړې: «ای ښاغلیه‎! که چېرې ته وغواړې نو کولای شې چې ما پاک او روغ کړې.»

¹³عیسی خپل لاس وراوږد کړ او په هغه باندې یې کېښود او ویې ویل: «هو، زه غواړم، پاک او روغ شه.» نو هغه ناروغي سمدلاسه ورڅخه لیرې شوه.

¹⁴عیسی هغه ته امر وکړ: «په دې هکله هیچا ته څه ونه وایې، خو لاړ شه او کاهن ته خپل ځان وروښایه او کومه قرباني چې موسی یې حکم کړی دی وړاندې کړه، د دې دپاره چې خلکو ته ثابته شي چې ته پاک او روغ شوی یې.»

¹⁵خو د عیسی په هکله خبر نور هم زیات خپور شو او ډېر خلک راغلل چې د هغه خبرې واوري او د خپلو ناروغیو څخه روغتیا ومومي.

¹⁶خو هغه به ګوښه ځایونو ته تللو چې هلته دعا وکړي.

¹⁷یوه ورځ کله چې عیسی تعلیم ورکاوه، ځینې فریسیانو د شریعت عالمان چې د جلیل د هر کلي، یهودیې او اورشلیم څخه راغلي وو، هلته ناست وو او عیسی د خدای په قدرت سره ناروغان روغول.

¹⁸په دې وخت کې څو کسانو چې یو شل سړی یې په کټ کې راروان کړی ؤ، راغلل. هغوی هڅه کوله چې هغه دننه کور ته بوځي او د عیسی په مخکې یې کیږدي.

¹⁹خو د ګڼې ګوڼې له امله یې لاره ونه موندله ترڅو هغه دننه بوځي. نو هغه شل سړی یې پاس بام ته پورته کړ، د پخو خښتو په منځ کې یې یو سوری جوړ کړ او هغه یې په کټ کې لاندې کوز کړ او د ګڼې ګوڼې په منځ کې یې د عیسی په مخکې کېښود.

²⁰کله چې عیسی د هغوی ایمان ولید نو هغه سړي ته یې وویل: «ای وروره! ستا ګناهونه وبخښل شول.»

²¹هغه وخت د شریعت عالمانو او فریسیانو یو له بله سره بحث پیل کړ: «دا سړی څوک دی چې کفر وایي؟ آیا بې له خدایه څوک کولای شي چې ګناهونه وبخښي؟»

²²عیسی د هغوی په خیالونو پوه شو او ورته ویې وویل: «تاسو ولې په خپلو زړونو کې داسې فکرونه کوئ؟

²³آیا دا خبره آسانه ده چې وویل شي چې ستا ګناهونه وبخښل شول یا وویل شي چې پاڅېږه او وګرځه؟

²⁴خو زه به تاسو ته ثابته کړم چې د انسان زوی د ځمکې په مخ دا اختیار لري چې ګناهونه وبخښي.» نو هغه شل سړي ته یې وویل: «زه تاته وایم پاڅېږه، کټ دې واخله او خپل کور ته لاړ شه.»

²⁵نو سمدلاسه هغه سړی د ټولو خلکو په مخکې پاڅېد، خپل کټ یې چې ورباندې پروت ؤ واخیست او په داسې حال کې چې د خدای ثناه یې ویله خپل کور ته روان شو.

²⁶هغوی ټول حیران پاتې شول. وېرې واخیستل او د خدای ثناه او صفت یې کاوه او ویل یې: «مونږ نن څه حیرانوونکي شیان ولیدل.»

²⁷له هغې وروسته عیسی دباندې ووت او د لاوي په نوم یو مالیه ټولوونکی یې ولیده چې د مالیې راټولولو په ځای کې ناست ؤ. عیسی هغه ته وویل: «ما پسې راځه.»

²⁸لاوي راپاڅېد، هرڅه یې پرېښودل او په هغه پسې روان شو.

²⁹بیا لاوي په خپل کور کې د عیسی دپاره یوه لویه میلمستیا جوړه کړه او په میلمنو کې زیات شمیر مالیه ټولوونکي او نور خلک هم وو.

³⁰خو ځینو فریسیانو او د شریعت عالمان چې د هغوی د ډلې څخه وو د عیسی په شاګردانو اعتراض وکړ او پوښتنه یې وکړه: «تاسو ولې د مالیه ټولوونکو او نورو ګناهکارانو سره یوځای خورئ او څښئ؟»

³¹عیسی ورته په ځواب کې وویل: «روغ خلک ډاکتر ته اړتیا نه لري، بلکې ناروغه خلک ورته اړتیا لري.

³²زه د پرهېزګارانو دپاره نه یم راغلی بلکې د ګناهکارانو دپاره، ترڅو هغوی توبه وباسي.»

³³ځینو خلکو عیسی ته وویل: «د یحیی شاګردان زیات وخت روژه نیسي او دعاګانې کوي او د فریسیانو شاګردان هم همداسې کوي، خو ستا شاګردان خوري او څښي.»

³⁴عیسی ځواب ورکړ: «آیا تاسو کولای شئ چې د زوم ملګري د واده په میلمستیا کې په داسې حال کې چې زوم ورسره وي مجبور کړئ چې روژه ونیسي؟ بې شکه چې نه.

³⁵خو داسې وخت به راشي چې زوم به له هغوی څخه بوتلل شي او په هغه وخت کې به هغوی روژه نیسي.»

³⁶همدارنګه عیسی هغوی ته دا مثال راوړ: «هیڅوک د نویو کالیو څخه یوه ټوټه نه شلوي چې په زړو کالیو باندې یې پیوند کړي. که داسې وکړي نو هم به هغه نوي کالي وشلیږي او هم به د نویو کالیو ټوټه د زړې سره جوړه رانه شي.

³⁷نه به څوک تازه شراب په زړو مشکونو کې واچوي، ځکه چې تازه شراب به هغه مشکونه وشلوي، شراب به توی شي او مشکونه به له منځه لاړ شي.

³⁸خو تازه شراب باید په نویو مشکونو کې واچول شي.

³⁹هیڅوک نه غواړي چې د زړو شرابو له څښلو وروسته تازه شراب وڅښي، ځکه داسې وایي چې زاړه شراب ډېر ښه دي.»