Read Pashto (Nangahari) — د پښتو مقدس کتاب تثنيه 10 Bible Online

تثنيه 10 - Pashto (Nangahari) — د پښتو مقدس کتاب bible

تثنيه 10

¹بيا څښتن ماته وفرمايل: د اولنيو لوحو په شان د تيږو دوه لوحې تيارې کړه او د لرګيو يو صندوق جوړ کړه چې هغه په کې کېږدې. بيا ماته غره ته راوخېژه.

²زه به په دې لوحو باندې هغه خبرې وليکم کومې چې په هغو لوحو باندې ليکلې شوې وې چې تا ماتې کړې او بيا هغه په صندوق کې کېږده.

³نو ما د غز له لرګيو څخه يو صندوق جوړ کړ او د اولنيو لوحو په شان مې د تيږو دوه لوحې تيارې کړې او غره ته مې وخېژولې.

⁴بيا څښتن په دې لوحو باندې هماغه خبرې وليکلې کومې چې هغه اول ځل ليکلې وې، يعنې هغه لس حکمونه چې په هغه وخت کې هغه درکړل کله چې ستاسو سره يې د اور له منځ څخه خبرې وکړې. دا کار په هغه ورځ وشو چې تاسو د غره تر څنګ راغونډ شوي وئ. څښتن هغه لوحې ماته راکړې،

⁵بيا زه بېرته د غره څخه راکوز شوم. د څښتن د امر سره سم مې هغه لوحې په هماغه صندوق کې کېښودلې کوم چې ما جوړ کړی ؤ او د هماغه وخته راهيسې په کې پرتې دي.“

⁶(اسرائيليان د يعقان د خلکو د کوهيانو څخه روان شول او موسيره ته لاړل. هلته حضرت هارون وفات شو او ښخ کړای شو او د هغه زوی العازار د هغه په ځای کاهن شو.

⁷هغوی د هغه ځای څخه جدجوده ته او بيا يطبات ته سفر وکړ يعنې يوې خاورې ته چې د اوبو ويالې په کې وې.

⁸په هغه وخت کې څښتن د لاوي قبيله انتخاب کړله چې د لوظ صندوق يوسي، د کاهنانو په توګه د څښتن خدمت وکړي او د هغه په نوم برکت ورکړي. تر اوسه پورې دا د هغوی وظيفې دي.

⁹نو ځکه د لاوي قبيلې د نورو قبيلو په شان ځمکه ترلاسه نه کړه. ستاسو د څښتن خدای د وعدې سره سم څه چې هغوی ترلاسه کړل هغه د څښتن د کاهنتوب امتياز ؤ.)

¹⁰”زه د لومړي ځل په شان څلوېښت شپې او ورځې په غره کې پاتې شوم. څښتن يو ځل بيا زما دعا قبوله کړه او په دې راضي شو چې تاسو تباه نه کړي.

¹¹بيا هغه ماته وفرمايل چې لاړ شم او ستاسو مشري وکړم ترڅو تاسو وکولی شئ هغه ځمکه ترلاسه کړئ چې هغه وعده کړې وه چې ستاسو نيکونو ته به يې ورکړي.

¹²د اسرائيلو خلکو، ستاسو څخه خپل څښتن خدای څه غواړي؟ د هغه څخه ووېرېږئ او ټول امرونه يې په ځای کوئ. د هغه سره مينه کوئ او د زړه له کومي يې خدمت کوئ

¹³او د هغه د ټولو قوانينو اطاعت کوئ. زه نن دا قوانين تاسو ته ستاسو د ګټې په خاطر درکوم.

¹⁴ټول آسمانونه ستاسو د څښتن خدای دي. ځمکه او هرڅه چې په کې دي هغه هم د څښتن دي.

¹⁵خو څښتن ستاسو د نيکونو سره دومره زياته مينه کوله چې تاسو يې د ځمکې په مخ د ټولو قومونو څخه انتخاب کړئ او تر نن ورځې پورې د هغه انتخاب شوی قوم يئ.

¹⁶نو بيا د څښتن اطاعت کوئ او نور سرزوري مه کوئ.

¹⁷ستاسو څښتن خدای د ټولو خدايانو او حاکمانو څخه ډېر قدرتمند دی. هغه لوی او قوي دی او د هغه څخه وېره په کار ده. هغه د چا پلوي نه کوي او همېشه عادلانه فيصلې کوي.

¹⁸څښتن د يتيمانو او کونډو د حقونو څخه دفاع کوي. هغه د هغو بېګانه خلکو سره مينه کوي چې زمونږ د قوم سره اوسيږي او هغوی ته خواړه او کالي ورکوي.

¹⁹نو بيا د هغو بېګانه خلکو سره مينه کوئ ځکه چې تاسو خپله يو وخت په مصر کې بېګانه وئ.

²⁰د خپل څښتن خدای څخه وېره کوئ او يوازې د هغه عبادت کوئ. هغه ته وفادار اوسئ او يوازې د هغه په نوم قسم خورئ.

²¹د هغه ستاينه کوئ. هغه ستاسو خدای دی او تاسو هغه لوی لوی او عجيبه کارونه په خپلو سترګو وليدل چې ستاسو دپاره يې کړي دي.

²²کله چې ستاسو نيکونه مصر ته لاړل چې هلته واوسيږي، هغوی يوازې اويا تنه ؤو. مګر اوس ستاسو څښتن خدای ستاسو شمېر د آسمان د ستورو په شان زيات کړی دی.