Read Pashto (Nangahari) — د پښتو مقدس کتاب تثنيه 11 Bible Online

تثنيه 11 - Pashto (Nangahari) — د پښتو مقدس کتاب bible

تثنيه 11

¹د خپل څښتن خدای سره مينه کوئ او همېشه د هغه د ټولو قوانينو څخه اطاعت کوئ.

²نن ورځ دا په ياد ساتئ چې دا تاسو وئ، نه ستاسو اولادونه چې د خپل څښتن خدای انتظام، د هغه لويي، قدرت، قوت،

³او معجزې مو ليدلې دي. تاسو وليدل چې هغه د مصر د پادشاه فرعون او د هغه د ټول هېواد سره څه وکړل.

⁴تاسو وليدل چې څښتن څنګه د مصريانو لښکرې د هغوی د آسونو او جنګي ګاډيو سره تباه کړې او هغوی يې په داسې وخت کې په سره بحيره کې غرق کړل کله چې تاسو يې تعقيبولئ. څښتن هغوی د داسې تباهۍ سره مخامخ کړل چې تر اوسه پورې دوام لري.

⁵تاسو پوهېږئ مخکې له دې چې تاسو دلته راورسېدلئ څښتن ستاسو دپاره په دښته کې څه وکړل.

⁶در په ياد کړئ چې هغه د روبين د قبيلې د الياب په زامنو يعنې په داتان او ابيرام باندې څه وکړل. د ټولو خلکو په مخ کې ځمکه پرانيستل شوه او هغوی يې د خپلو کورنيو، خېمو او ټولو غلامانو او حيواناتو سره ژوندي تېر کړل.

⁷هو، تاسو هماغه خلک يئ چې دا ټول لوی لوی کارونه چې څښتن کړي دي، هغه مو ليدلي دي.

⁸د هغو ټولو قوانينو اطاعت کوئ چې نن مې درکړل. نو بيا به د دې قوت پيدا کړئ چې د اردن له سيند څخه تېر شئ او هغه خاوره ونيسئ چې تاسو ورننوزئ.

⁹تاسو به په هغه غني او حاصلخېزه خاوره کې ډېره موده ژوند وکړئ چې څښتن يې د ورکولو وعده ستاسو د نيکونو او د هغوی د اولادې سره کړې ده.

¹⁰کومه خاوره چې تاسو يې اوس نيسئ د مصر د خاورې په شان نه ده چې مخکې په کې اوسېدلئ. تاسو چې کله هلته تخم کاره، مجبور وئ چې پټيو ته د اوبو ورکولو دپاره ډېر زيار وباسئ.

¹¹خو هغه خاوره چې تاسو ورداخلېږئ، هلته غرونه او درې دي او د باران په واسطه ورته اوبه ورکول کيږي.

¹²ستاسو څښتن خدای په دې ځمکه باندې پام کوي او ټول کال هغه تر خپل نظر لاندې ساتي.

¹³نو بيا د هغو امرونو اطاعت کوئ چې نن مې درکړل. د خپل څښتن خدای سره مينه کوئ او د زړه له کومي د هغه خدمت کوئ.

¹⁴که چېرې داسې وکړئ نو هغه به د اړتيا په وخت يعنې په مني او پسرلي کې ستاسو په ځمکه باندې باران واوروي ترڅو تاسو ته غلې دانې، شراب او د زيتونو تېل درورسيږي

¹⁵او حيواناتو ته به مو واښه ورورسيږي. هرڅومره خواړه چې غواړئ تاسو ته به درورسيږي.

¹⁶پام کوئ. که نه، نو تاسو به وغولېږئ او بې لارې به شئ او د نورو خدايانو عبادت به وکړئ او هغو ته به سجده وکړئ.

¹⁷که چېرې تاسو داسې وکړئ نو څښتن به درباندې په قهر شي. هغه به درباندې باران ودروي، ستاسو ځمکه به وچه شي او فصلونه به په کې نه راشنه کيږي. که څه هم هغه ځمکه چې هغه يې تاسو ته درکوي ښه ده، خو تاسو به په کې ژر مړه شئ.

¹⁸دا قوانين په ياده زده کړئ او د هغو په هکله فکر کوئ. هغه وليکئ او په خپلو مټو او تنديو باندې يې وتړئ چې د هغو په اطاعت کولو کې درسره مرسته وکړي.

¹⁹هغه خپلو اولادونو ته ورزده کړئ. هر وخت د هغو په هکله خبرې کوئ، که په کور کې يئ يا په لاره روان يئ يا آرام کوئ يا کار کوئ.

²⁰دا قوانين د خپلو کورونو د دروازو په چوکاټونو او د خپلو ښارونو په دروازو باندې وليکئ.

²¹بيا به تاسو او ستاسو اولاده په هغه خاوره کې ډېره موده ژوند وکړئ چې څښتن ستاسو د نيکونو سره د هغې د ورکولو وعده کړې ده. ترڅو پورې چې ځمکه او آسمان وي، تاسو به هلته ژوند کوئ.

²²د هغو ټولو قوانينو چې ما درکړي دي په وفادارۍ سره اطاعت کوئ. د خپل څښتن خدای سره مينه کوئ، د هغه هر امر په ځای کوئ او هغه ته وفادار اوسئ.

²³بيا به څښتن هغه ټول قومونه ستاسو له مخې څخه لېرې کړي او تاسو به د هغو قومونو ځمکه ونيسئ چې ستاسو څخه لوی او قوي دي.

²⁴په هرځای باندې چې تاسو قدم ږدئ هغه به ستاسو وي. ستاسو سيمه به د جنوبي دښتې څخه په شمال کې د لبنان تر غرونو پورې وغزيږي او د فرات د سيند څخه به چې په ختيځ کې دی د مديترانې تر بحيرې پورې چې په لويديځ کې ده وغزيږي.

²⁵د هغې خاورې هرځای ته چې تاسو لاړ شئ، ستاسو څښتن خدای به د خپلې وعدې سره سم د هغو خلکو په زړونو کې وېره واچوي چې ستاسو څخه ووېريږي او هيڅوک به ونشي کولی چې ستاسو په مقابل کې ودريږي.

²⁶زه نن تاسو ته دا فرصت درکوم چې د څښتن څخه برکت غواړئ يا غواړئ چې لعنت درباندې وشي.

²⁷که چېرې د خپل څښتن خدای د امرونو څخه چې زه يې نن درکوم اطاعت وکړئ، برکت به ومومئ.

²⁸خو که چېرې د دغو امرونو څخه سرغړونه وکړئ او د هغو نورو خدايانو عبادت وکړئ چې مخکې مو هيڅکله د هغو عبادت نه دی کړی، نو څښتن به درباندې لعنت ووايي.

²⁹کله چې څښتن تاسو هغې خاورې ته ورولي چې تاسو يې نيسئ، نو د جرزيم د غره څخه به د برکت اعلان وکړئ او د عيبال د غره څخه به د لعنت اعلان وکړئ.

³⁰(تاسو پوهېږئ چې دا دوه غرونه د اردن د سيند په لويديځ کې په هغې خاوره کې دي چې اوس د هغو کنعانيانو تر واکمنۍ لاندې ده چې د اردن په دره کې اوسيږي. دا غرونه د جلجال بلې خواته د موره مقدسو ونو ته نژدې دي.)

³¹تاسو به ژر د اردن د سيند څخه تېر شئ او هغه خاوره به ونيسئ چې ستاسو څښتن خدای يې درکوي. کله چې تاسو هغه خاوره ونيسئ او په کې اوسېږئ،

³²نو تاسو به په غور سره د هغو ټولو قوانينو اطاعت کوئ چې زه يې نن درکوم.