Read Pashto (Nangahari) — د پښتو مقدس کتاب تثنيه 12 Bible Online

تثنيه 12 - Pashto (Nangahari) — د پښتو مقدس کتاب bible

تثنيه 12

¹کله چې تاسو هغې خاورې ته ورننوزئ چې ستاسو د نيکونو څښتن خدای تاسو ته درکړې ده، نو ترڅو پورې چې ژوندي يئ په دې قوانينو باندې بايد عمل وکړئ.

²مګر هغه قومونه چې هلته اوسيږي د نورو خدايانو عبادت کوي. نو کله چې تاسو هغه خاوره ونيوله بايد د هغوی د عبادت ځايونه په بشپړه توګه وران کړئ يعنې هغه ځايونه چې په غرونو او په غونډيو باندې دي او يا د لويو ونو لاندې دي.

³د هغوی د قربانۍ ځايونه راوغورزوئ او هغه لويې تيږې چې د هغوی د عبادت دپاره استعماليږي ټوټې ټوټې کړئ. د هغوی د اشيره بتان وسوزوئ او نور بتان يې راچپه کړئ ترڅو بيا هيڅکله په هغو ځايونو کې د هغو بتانو عبادت ونشي.

⁴د خپل څښتن خدای عبادت په داسې ډول مه کوئ لکه څنګه چې دا خلک د خپلو خدايانو عبادت کوي.

⁵ستاسو د ټولو قبيلو د سيمو څخه به څښتن يو ځای انتخاب کړي او هلته بايد تاسو د هغه حضور ته راشئ او د هغه عبادت وکړئ.

⁶تاسو بايد هلته خپلې سوزېدونکې نذرانې او نورې قربانۍ، خپل عشر او هديې، هغه سوغاتونه چې د نذر په توګه يې څښتن ته ورکوئ، خپلې رضاکارانه نذرانې او د خپلو پادو او رمو اولني زېږېدلي بچيان وړاندې کړئ.

⁷تاسو او ستاسو کورنۍ او نوکران به هلته د خپل څښتن خدای په حضور کې چې برکت يې درکړی دی خوراک کوئ او د هغو ښو شيانو دپاره به خوشالي کوئ چې تاسو د هغو دپاره کار کړی دی.

⁸په هغې خاوره کې چې تاسو يې نيسئ، بايد داسې کارونه ونه کړئ لکه څنګه چې دلته يې کوئ. تر اوسه پورې تاسو ټول د خپلې خوښې په مطابق عبادت کوئ،

⁹ځکه چې تاسو لا تر اوسه هغې خاورې ته چې خپل څښتن خدای يې درکوي او تاسو په کې په سوله کې ژوند کولی شئ نه يئ داخل شوي.

¹⁰کله چې تاسو د اردن د سيند څخه تېر شئ، څښتن به تاسو پرېږدي چې هغه خاوره ونيسئ او هلته واوسېږئ. هغه به تاسو د خپلو ټولو دښمنانو څخه په امن کې وساتي او په سوله کې به ژوند کوئ.

¹¹څښتن به د خپل عبادت دپاره يوازې يو ځای انتخاب کړي او تاسو بايد هلته هغه ته هر هغه شی چې ما يې امر کړی دی راوړئ يعنې ستاسو سوزېدونکې نذرانې او نورې قربانۍ، عشر او هديې او هغه خاص سوغاتونه چې د نذر په توګه يې څښتن ته ورکوئ.

¹²هلته د هغه په حضور کې د خپلو اولادونو، نوکرانو او د هغو لاويانو سره خوشالي کوئ چې ستاسو په ښارونو کې اوسيږي. په ياد لرئ چې لاويان به هيڅ خپله ځمکه ونلري.

¹³په هرځای کې چې ستاسو خوښه وي بايد هلته خپلې قربانۍ وړاندې نه کړئ.

¹⁴تاسو بايد يوازې په يو ځای کې هغه قربانۍ وړاندې کړئ يعنې هغه ځای چې څښتن به يې ستاسو د قبيلو څخه په يوې قبيلې کې انتخاب کړي. تاسو بايد يوازې په هغه ځای کې خپلې سوزېدونکې نذرانې وړاندې کړئ او هغه ټول کارونه وکړئ چې ما يې درته امر کړی دی.

¹⁵مګر تاسو په آزادانه ډول کولی شئ چېرته چې اوسېږئ هلته حيوانات حلال کړئ او ويې خورئ. څومره چې څښتن درکوي هغه وخورئ. تاسو ټول که په مذهبي لحاظ پاک يئ يا ناپاک کولی شئ چې هغه داسې وخورئ لکه څنګه چې د هوسۍ يا د غرڅه غوښه خورئ.

¹⁶مګر د هغوی وينه بايد ونه خورئ، تاسو بايد هغه د اوبو په شان په ځمکه باندې توی کړئ.

¹⁷هيڅ شی چې تاسو يې څښتن ته وړاندې کوئ بايد ستاسو د اوسېدلو په ځايونو کې ونه خوړل شي يعنې ستاسو د غلو دانو عشر، د شرابو يا د زيتونو د تېلو عشر، د پادو او رمو اولني زېږېدلي بچيان، هغه سوغاتونه چې څښتن ته يې د نذر په توګه ورکوئ، رضاکارانه نذرانې يا داسې نورې نذرانې.

¹⁸تاسو او ستاسو اولادونه دې ستاسو د نوکرانو او هغو لاويانو سره چې ستاسو په ښارونو کې اوسيږي دا نذرانې يوازې د خپل څښتن خدای په حضور کې يعنې د عبادت په هغه ځای کې وخورئ چې د هغه له خوا انتخاب کړای شوی دی. په هر کار کې چې کوئ يې د هغه په حضور کې خوشالي وکړئ.

¹⁹ترڅو پورې چې تاسو په خپله خاوره کې اوسېږئ، پام کوئ چې لاويان هېر نه کړئ.

²⁰کله چې ستاسو څښتن خدای د خپلې وعدې سره سم ستاسو سيمه پراخه کړي، هر وخت چې هرڅومره غوښه وغواړئ تاسو يې خوړلی شئ.

²¹که چېرې د عبادت ځای ستاسو څخه لېرې وي نو لکه څنګه چې مې درته ويلي دي تاسو کولی شئ چې د خپلې پادې يا رمې يو حيوان چې څښتن درکړی وي حلال کړئ او غوښه يې په خپلو کورونو کې وخورئ.

²²هرڅوک که په مذهبي لحاظ پاک وي يا ناپاک، کولی شي چې هغه غوښه داسې وخوري لکه څنګه چې د هوسۍ يا د غرڅه غوښه خوري.

²³۲۳‏-۲۴ پام کوئ چې وينه ونه خورئ، ځکه چې دا د هغه حيوان ژوند دی، نو پرېږدئ چې هغه د غوښې د خوړلو څخه مخکې د اوبو په شان په ځمکه باندې توی شي.

²⁵که چېرې تاسو د دې امر اطاعت وکړئ، څښتن به خوشاله شي او ستاسو او ستاسو د اولادې هر کار به سم شي.

²⁶هغه نذرانې او سوغاتونه چې څښتن ته يې د نذر په توګه ورکوئ، هغه ځای ته يوسئ چې څښتن يې د خپل عبادت دپاره انتخابوي.

²⁷هلته هغه قربانۍ چې د څښتن په قربانګاه باندې په بشپړه توګه سوزول کيږي وړاندې کړئ. همدارنګه هغه قربانۍ هم وړاندې کړئ چې غوښه يې خورئ او وينه يې په قربانګاه باندې تويوئ.

²⁸په وفادارۍ سره د دغو ټولو شيانو چې ما درته حکم کړی دی اطاعت کوئ نو ستاسو او ستاسو د اولادې هر کار به د تل دپاره سم وي، ځکه چې تاسو به هغه کارونه کوئ چې هغه صحيح وي او ستاسو څښتن خدای ورباندې خوشاليږي.

²⁹څنګه چې تاسو د هغوی په خاوره باندې حمله وکړئ ستاسو څښتن خدای به هغه قومونه تباه کړي او تاسو به هغه ځای ونيسئ او په کې به اوسېږئ.

³⁰کله چې څښتن هغه قومونه تباه کړل، پام کوئ چې د هغوی د مذهبي رواجونو څخه پيروي ونه کړئ ځکه چې دا به ستاسو دپاره يو وژونکی دام وي. د دې خبرې د معلومولو هڅه مه کوئ چې هغوی په کوم ډول د خپلو خدايانو عبادت کوي د دې دپاره چې تاسو هم همدا ډول عبادت وکړئ.

³¹د خپل څښتن خدای عبادت په هغه ډول مه کوئ لکه څنګه چې هغوی د خپلو خدايانو عبادت کوي، ځکه چې هغوی په خپل عبادت کې ټول هغه ناوړه کارونه کوي چې څښتن ورڅخه کرکه کوي. هغوی حتیٰ د قربانۍ په ځايونو باندې خپل اولادونه هم په اور کې قرباني کوي.

³²ما چې کوم حکمونه تاسو ته درکړي دي په هغو باندې عمل کوئ. د هغو څخه مه څه کموئ او مه يې ورزياتوئ.