Read Pashto (Nangahari) — د پښتو مقدس کتاب تثنيه 13 Bible Online

تثنيه 13 - Pashto (Nangahari) — د پښتو مقدس کتاب bible

تثنيه 13

¹فرض کړئ ستاسو په منځ کې يو نبي يا يو څوک راپيدا شي چې خوبونه تعبيروي او تاسو ته د کومې معجزې يا کوم عجيبه کار په باره کې پېشګويي وکړي.

²که چېرې هغه نښه يا هغه عجيبه کار چې د هغه په باره کې يې خبرې کړې وي رښتيا شي او هغه ووايي: راځئ چې د نورو خدايانو څخه پيروي او عبادت وکړو (هغه خدايان چې مخکې مو د هغو عبادت نه دی کړی)،

³نو تاسو بايد د هغه نبي يا د خوب تعبيروونکي خبرو ته غوږ ونه نيسئ. ستاسو څښتن خدای په تاسو باندې د دې دپاره ازمايښت کوي چې دا معلومه کړي چې د هغه سره د زړه له کومي مينه کوئ او که نه.

⁴د څښتن څخه پيروي کوئ او د هغه څخه وېره کوئ. د هغه د امرونو څخه اطاعت کوئ، عبادت يې کوئ او ورته وفادار اوسئ.

⁵مګر هغه خوب تعبيروونکی يا نبي ووژنئ چې تاسو ته وايي چې د څښتن يعنې هغه چا په مقابل کې سرکشي وکړئ چې تاسو يې د مصر څخه چې په کې غلامان وئ آزاد کړئ. داسې خلک بدکاره دي او هڅه کوي چې تاسو د هغې لارې څخه واړوي چې څښتن يې تاسو ته د پيروۍ کولو امر کړی دی. د دې دپاره چې تاسو خپل ځانونه له دې بدکارۍ څخه خلاص کړئ، نو هغوی بايد ووژل شي.

⁶حتیٰ کېدای شي چې خپل ورور يا خپل زوی يا خپله لور يا ښځه چې تاسو ورسره مينه کوئ يا خپل ترټولو نژدې ملګری په پټه تاسو دې ته تشويق کړي چې د نورو خدايانو عبادت وکړئ، يعنې د هغو خدايانو چې تاسو او ستاسو نيکونو يې هيڅکله عبادت نه دی کړی.

⁷کېدای شي چې د هغوی څخه کوم يو تاسو دې ته تشويق کړي چې د هغو خلکو د خدايانو عبادت وکړئ چې ستاسو سره نژدې اوسيږي يا د هغو خلکو چې ستاسو څخه لېرې اوسيږي.

⁸مګر هغه مه پرېږدئ چې تاسو تشويق کړي، حتیٰ غوږ هم ورته مه نيسئ. په هغه باندې رحم مه کوئ يا زړه ورباندې مه سوزوئ او د هغه راز پټ مه ساتئ.

⁹هغه ووژنئ! اول يې تاسو سنګسار کړئ او بيا نور ټول خلک پرېږدئ چې سنګسار يې کړي.

¹⁰هغه سنګسار کړئ چې مړ شي! ځکه چې د دې هڅه يې کړې ده چې تاسو د خپل څښتن خدای څخه واړوي چا چې تاسو د مصر څخه چې په کې غلامان وئ آزاد کړئ.

¹¹نو د اسرائيلو ټول قوم به د دې پېښې څخه خبر شي، نو هغوی به ووېريږي او بيا به هيڅوک داسې بد کار ونه کړي.

¹²کله چې تاسو په هغو ښارونو کې واوسېږئ چې ستاسو څښتن خدای يې درکوي، کېدای شي تاسو واورئ

¹³چې ستاسو د قوم ځينې خوشې خلکو د خپل ښار خلک بې لارې کړي دي چې د داسې خدايانو عبادت وکړي چې مخکې تاسو هيڅکله د هغو عبادت نه وي کړی.

¹⁴که چېرې تاسو داسې آوازې واورئ، د هغو په هکله پوره څېړنه وکړئ او که چېرې هغه رښتيا وي او داسې بده پېښه شوې وي،

¹⁵بيا د هغه ښار ټول خلک او د هغوی ټول حيوانات هم ووژنئ او هغه ښار په بشپړه توګه وران کړئ.

¹⁶د هغه ځای د اوسېدونکو ټول مال او جايداد راوړئ او د ښار په چوک کې يې انبار کړئ. بيا هغه ښار د هرڅه سره چې په کې دي خپل څښتن خدای ته د نذرانې په توګه وسوزوئ. هغه بايد د تل دپاره کنډواله پاتې شي او بيا هيڅکله ودان نشي.

¹⁷۱۷‏-۱۸ د هغو شيانو څخه چې بايد له منځه يوړل شي هيڅ شی هم د ځان دپاره مه ساتئ، نو بيا به د څښتن سخت قهر سوړ شي او په تاسو باندې به رحم وکړي. که چېرې تاسو د هغه د ټولو امرونو چې ما نن درکړي دي اطاعت وکړئ او د هغه غوښتنې ومنئ، هغه به په تاسو باندې رحم وکړي او لکه څنګه چې يې ستاسو د نيکونو سره وعده کړې ده، ستاسو څخه به يو لوی قوم جوړ کړي.