Read Pashto (Nangahari) — د پښتو مقدس کتاب تثنيه 15 Bible Online

تثنيه 15 - Pashto (Nangahari) — د پښتو مقدس کتاب bible

تثنيه 15

¹د هر اووم کال په پای کې بايد تاسو د خپلو قرضدارانو قرضونه وروبخښئ.

²دا کار به په دې ډول کيږي: ستاسو څخه هرڅوک چې کوم بل اسرائيلي ته يې پيسې په قرض ورکړې وي بايد د هغه قرض وروبخښي. هغه دې د هغه اسرائيلي څخه دا پيسې بېرته ونه غواړي، ځکه چې څښتن په خپله دا قرض بخښل شوی اعلان کړی دی.

³تاسو کولی شئ چې د يو بېګانه څخه خپل قرض واخلئ، مګر بايد د خپلو خلکو څخه قرض بېرته ونه غواړئ.

⁴۴‏-۶ په اسرائيلو کې به هيڅوک غريب نه وي، په دې شرط چې تاسو د خپل څښتن خدای اطاعت وکړئ او په غور سره د هغه په ټولو حکمونو باندې چې زه يې نن درکوم عمل وکړئ. ستاسو څښتن خدای تاسو ته دا خاوره درکوي او هغه دا وعده کړې ده چې تاسو ته به په ټولو کارونو کې بری درکوي. تاسو به ډېرو قومونو ته پيسې په قرض ورکوئ، مګر د هيچا څخه به قرض اخيستلو ته اړ نشئ. تاسو به په ډېرو قومونو باندې حکومت وکړئ، مګر هيڅ قوم به په تاسو باندې حکومت ونه کړي.

⁷که چېرې ستاسو د خاورې په کوم ښار کې چې ستاسو څښتن خدای يې درکوي کوم بل اسرائيلی وي چې محتاج وي، نو زړه مه سختوئ او د هغه سره د مرستې کولو څخه انکار مه کوئ،

⁸بلکه سخي اوسئ او څومره پيسو ته چې اړتيا ولري په قرض يې ورکړئ.

⁹پام کوئ چې د خپل ځان سره داسې ونه وايئ چې اووم کال به ژر راورسيږي بيا به زه ونشم کولی چې خپلې پيسې بېرته واخلم. که تاسو داسې فکر وکړئ نو دا به ډېره بده وي چې د هغه غريب سره د کومک کولو څخه انکار وکړئ. که چېرې د هغه سره کومک ونه کړئ هغه به ستاسو په ضد څښتن ته فرياد وکړي او تاسو به ګناهکار وګڼل شئ.

¹⁰هغه ته په وړيا توګه او د پېرزوينې له مخې ورکړئ نو څښتن به تاسو ته په هر کار کې برکت درکړي.

¹¹همېشه به ځينې غريب او محتاج اسرائيليان موجود وي، نو زه تاسو ته امر کوم چې د هغوی سره د سخاوت څخه کار واخلئ.

¹²که چېرې کوم نارينه يا ښځينه عبرانی خپل ځان په تاسو باندې د غلام په توګه خرڅ کړي او شپږ کاله ستاسو خدمت وکړي، نو په اووم کال بايد هغه پرېږدئ چې آزاد شي او لاړ شي.

¹³د آزادېدلو په وخت کې هغه تش لاس مه لېږئ.

¹⁴څومره چې څښتن د برکت په توګه درکړي دي د هغو څخه د سخاوت له مخې ورکړئ يعنې پسونه، وزې، غلې دانې او شراب.

¹⁵په ياد لرئ چې تاسو په مصر کې غلامان وئ او خپل څښتن خدای آزاد کړئ، نو په دې خاطر زه نن تاسو ته دا امر درکوم.

¹⁶مګر کېدای شي چې ستاسو غلام ونه غواړي چې لاړ شي. کېدای شي چې هغه تاسو او ستاسو د کورنۍ سره مينه ولري او ورته بهتره وي چې ستاسو سره پاتې شي.

¹⁷بيا هغه د خپل کور دروازې ته بوزئ او هلته د هغه غوږ په رينه باندې سوری کړئ، بيا به هغه ټول عمر ستاسو غلام وي. د ښځينه غلامانو سره هم همداسې کوئ.

¹⁸کله چې تاسو يو غلام آزادوئ نو خفه کېږئ مه. آخر هغه د مزدور په نيمه بيه شپږ کاله ستاسو خدمت کړی دی. که چېرې داسې وکړئ نو تاسو ته به خپل څښتن خدای په هر کار کې برکت درکړي.

¹⁹د خپل څښتن خدای دپاره د خپلو پادو او رمو څخه ټول اولني زېږېدل شوي نران بېل کړئ. د اولنيو زېږېدل شويو غوايانو څخه کار مه اخلئ او اولني زېږېدل شوي پسونه مه سکولئ.

²⁰هر کال بايد تاسو او ستاسو کورنۍ د هغو غوښه د څښتن په حضور کې يعنې په هغه ځای کې وخورئ چې هغه يې د خپل عبادت دپاره انتخابوي.

²¹مګر که چېرې په حيواناتو کې کوم عيب وي، هغه معيوب يا ړوند وي يا کوم بل غټ عيب ولري، تاسو بايد هغه خپل څښتن خدای ته قرباني نه کړئ.

²²تاسو کولی شئ چې د داسې حيواناتو غوښه په خپل کور کې وخورئ. تاسو ټول که په مذهبي لحاظ پاک يئ يا ناپاک کولی شئ چې د هغو حيواناتو غوښه داسې وخورئ لکه څنګه چې د هوسۍ يا غرڅه غوښه خورئ.

²³خو تاسو بايد هيڅکله د حيوان وينه ونه خورئ، بلکه هغه د اوبو په شان په ځمکه باندې توی کړئ.