Read Pashto (Nangahari) — د پښتو مقدس کتاب تثنيه 16 Bible Online

تثنيه 16 - Pashto (Nangahari) — د پښتو مقدس کتاب bible

تثنيه 16

¹د ابيب په مياشت کې خپل څښتن خدای ته د فسحې د اختر په لمانځلو سره د هغه احترام وکړئ، ځکه چې په همدې مياشت کې څښتن د شپې له خوا تاسو د مصر څخه راوويستلئ.

²د فسحې د اختر قربانۍ بايد يو غويی، پسه يا وزه وي او تاسو بايد دا په هغه ځای کې خپل څښتن خدای ته وړاندې کړئ چې هغه يې د خپل عبادت دپاره انتخابوي.

³کله چې تاسو د قربانۍ غوښه خورئ، داسې ډوډۍ ورسره مه خورئ چې خميره ولري. اوه ورځې بايد تاسو د هغه وخت په شان فطيره ډوډۍ وخورئ کله چې تاسو په بيړه د مصر څخه وتلئ. دا ډوډۍ وخورئ، دا به د ځورېدلو د ډوډۍ په نوم ياده شي، نو ترڅو پورې چې تاسو ژوندي يئ، هغه ورځ به مو په ياد وي چې تاسو د مصر يعنې د ځورېدلو د ځای څخه راووتلئ.

⁴ستاسو په ټوله خاوره کې بايد هيڅوک اوه ورځې خميره ونلري او د هغه حيوان غوښه چې د اولې ورځې په ماښام حلال شوی وي بايد په هماغه شپه وخوړل شي.

⁵تاسو بايد د فسحې د اختر قرباني په هيڅ ښار کې چې خپل څښتن خدای يې درکوي وړاندې نه کړئ.

⁶دا قرباني بايد يوازې په هغه ځای کې وړاندې شي چې څښتن يې د خپل عبادت دپاره انتخابوي. د قربانۍ حيوان د لمرپرېواته په وخت کې حلال کړئ، ځکه چې تاسو له مصر څخه د لمرپرېواته په وخت کې راووتلئ.

⁷بيا د هغه غوښه پخه کړئ او د عبادت په ځای کې يې وخورئ او سهار خپلو خېمو ته ستانه شئ.

⁸په راتلونکو شپږو ورځو کې بايد فطيره ډوډۍ وخورئ او په اوومه ورځ د خپل څښتن خدای د عبادت دپاره راغونډ شئ او په هغه ورځ هيڅ کار مه کوئ.

⁹د هغه وخت څخه چې تاسو د غلو دانو رېبل پيل کړئ اوه هفتې وشمېرئ

¹⁰۱۰‏-۱۱ او بيا هغه ځای ته لاړ شئ چې څښتن يې د خپل عبادت دپاره انتخابوي او د خپل څښتن خدای د احترام دپاره د لو کولو اختر ولمانځئ او د هغه په حضور کې خوشالي وکړئ. هغه ته د خپل وس په مطابق يوه رضاکارانه نذرانه راوړئ يعنې څومره چې څښتن تاسو ته درکړي وي د هماغې په مطابق يې راوړئ. خپل اولادونه او خپل نوکران د ځان سره بوزئ. لاويانو، بېګانه خلکو، يتيمانو او کونډو ته هم بلنه ورکړئ چې ستاسو سره ګډون وکړي.

¹²تاسو به په غور سره د دغو امرونو اطاعت کوئ. دا خبره مه هېروئ چې تاسو په مصر کې غلامان وئ.

¹³کله چې تاسو خپلې غلې دانې غوبل کړلې او خپل انګور مو وټکول، اوه ورځې د جونګړو اختر ولمانځئ.

¹⁴د خپلو اولادونو او نوکرانو او د هغو لاويانو، بېګانه خلکو، يتيمانو او کونډو سره چې ستاسو په ښارونو کې اوسيږي په دې اختر کې خوشالي وکړئ.

¹⁵په هغه ځای کې چې څښتن يې د خپل عبادت دپاره انتخابوي اوه ورځې د دې اختر په لمانځلو سره د خپل څښتن خدای احترام وکړئ. تاسو به ډېر خوشاله شئ ځکه چې څښتن به ستاسو په ټولو حاصلاتو او په هر کار کې برکت واچوي.

¹⁶په هر کال کې درې اخترونه دي چې بايد ټول نارينه اسرائيليان په کې هغه ځای ته لاړ شي چې څښتن يې د خپل عبادت دپاره انتخابوي. هغه اخترونه دا دي: د فسحې اختر، د لو کولو اختر او د جونګړو اختر. هيڅوک دې څښتن ته تش لاس نه ورځي.

¹⁷څومره چې هغه حاصلات چې څښتن درکړي دي ډېر وي، هغومره بايد ستاسو سوغات غټ وي.

¹⁸د خپلې هرې قبيلې دپاره په هر ښار کې چې ستاسو څښتن خدای يې تاسو ته درکوي، قاضيان او نور ماموران مقرر کړئ. هغوی دې په خلکو باندې د انصاف له مخې قضاوت کوي.

¹⁹هغوی دې په خپلو قضاوتونو کې بې انصافي يا طرفداري نه کوي او رشوت دې نه اخلي ځکه چې رشوت حتیٰ د پوهو او صادقانو خلکو سترګې هم ړندوي او د دې سبب ګرځي چې هغوی غلطې فيصلې واوروي.

²⁰همېشه عادل او باانصافه اوسئ، ترڅو تاسو هغه خاوره ونيسئ چې خپل څښتن خدای يې درکوي او هلته خپل ژوند ته دوام ورکړئ.

²¹کله چې تاسو خپل څښتن خدای ته د قربانۍ ځای جوړوئ، د هغه په څنګ کې د لرګيو د اشيره بت مه ودروئ.

²²همدارنګه د بت پرستۍ دپاره تيږې مه ودروئ، ځکه چې څښتن د دغو شيانو څخه کرکه کوي.