Read Pashto (Nangahari) — د پښتو مقدس کتاب تثنيه 17 Bible Online

تثنيه 17 - Pashto (Nangahari) — د پښتو مقدس کتاب bible

تثنيه 17

¹خپل څښتن خدای ته داسې غويی او پسه مه قرباني کوئ چې کوم عيب په کې وي، څښتن له دې کار څخه کرکه کوي.

²۲‏-۳ ستاسو څښتن خدای تاسو ته د اوسېدلو دپاره ښارونه درکوي. خو وروسته کېدای شي يو سړی يا يوه ښځه په دې ښارونو کې د نورو خدايانو يا حتیٰ د لمر، سپوږمۍ يا ستورو ته عبادت شروع کړي. خو ما تاسو ته خبرداری درکړی دی چې د نورو خدايانو عبادت به نه کوئ، ځکه هرڅوک چې هغوی ته عبادت کوي هغه د څښتن د امر څخه سرغړونه کوي او هغه لوظ ماتوي چې څښتن ستاسو سره کړی دی.

⁴که چېرې تاسو داسې خبر واورئ، نو د هغې په هکله پوره څېړنه وکړئ. که چېرې دا خبره رښتيا وي چې په اسرائيلو کې داسې بد کار شوی دی،

⁵نو بيا هغه نفر د ښار څخه دباندې بوزئ او سنګسار يې کړئ چې مړ شي.

⁶خو بياهم هغه دې يوازې په هغه صورت کې ووژل شي چې دوه يا زيات شاهدان د هغه په ضد شاهدي ورکړي. که چېرې يوازې يو شاهد وي، هغه دې نه وژل کيږي.

⁷اول بايد شاهدان تيږې ګوزارې کړي او بيا دې نور ټول خلک هغه نفر سنګسار کړي. په دې ډول به تاسو د دې بدکارۍ څخه خلاص شئ.

⁸کېدای شي چې داسې دعوې وي چې د محلي قاضيانو دپاره يې فيصله کول ډېر ګران وي، لکه د جايداد د حقونو يا د چا د ټپي کولو دعوې يا داسې دعوې چې د قتل او د داسې مرګ ترمنځ فرق په کې شامل وي چې په سهوې سره شوی وي. کله چې داسې کار کيږي نو د عبادت هغه ځای ته ځئ چې ستاسو د څښتن خدای له خوا انتخابيږي.

⁹نو خپله دعوه لاوي کاهنانو او د هغه وخت قاضي ته وړاندې کوئ او هغوی پرېږدئ چې د دعوې فيصله وکړي.

¹⁰هغوی به خپله فيصله واوروي او تاسو بايد کټ مټ هماغسې وکړئ څنګه چې هغوی يې درته وايي.

¹¹د هغوی فيصله ومنئ او په لارښوونو باندې يې پوره عمل وکړئ.

¹²هرڅوک چې دا جرأت وکړي چې د قاضي يا هغه کاهن د امر څخه سرغړونه وکړي چې ستاسو د څښتن خدای خدمت کوي، هغه دې ووژل شي. په دې ډول به تاسو د اسرائيلو څخه دا بدکاري لېرې کړئ.

¹³بيا به ټول خلک له دې څخه خبر شي او وبه وېريږي او بل هيڅوک به دا جرأت ونه کړي چې داسې عمل وکړي.

¹⁴کله چې تاسو هغه ځمکه ونيسئ چې ستاسو څښتن خدای يې درکوي او هلته اوسېږئ، نو وبه وايئ چې مونږ هم لکه د خپل شاوخوا قومونو په شان پادشاه غواړو.

¹⁵ګورئ، کوم سړی چې تاسو د پادشاه په توګه انتخابوئ بايد هغه څوک وي چې د څښتن له خوا انتخاب شوی وي. هغه بايد ستاسو د قوم څخه وي. کوم بېګانه سړی خپل پادشاه نه کړئ.

¹⁶د پادشاه لښکر بايد زيات آسونه ونلري او هغه بايد مصر ته خلک د دې دپاره ونه لېږي چې هلته آسونه په بيه واخلي ځکه چې څښتن فرمايلي دي چې د هغه قوم دې هيڅکله هلته بېرته نه ځي.

¹⁷پادشاه بايد ډېرې ښځې ونلري ځکه چې هغوی به هغه ولمسوي چې د څښتن په مقابل کې بې وفا شي. بالاخره، پادشاه بايد د دې هڅه ونه کړي چې په زياته اندازه سره زر او سپين زر لاس ته راوړي.

¹⁸کله چې هغه پادشاه شي، هغه دې د دې قوانينو د نسخې يو نقل جوړ کړي چې اصلي نقل يې د لاوي کاهنانو سره دی.

¹⁹د قوانينو دا نقل دې د هغه سره وي او ټول عمر دې هغه لولي ترڅو د څښتن احترام کول زده کړي او په وفادارۍ سره د هغو ټولو امرونو اطاعت وکړي چې په دې قوانينو کې راغلي دي.

²⁰په دې کار سره به هغه داسې فکر نه کوي چې هغه د نورو اسرائيليانو په پرتله ښه سړی دی او د څښتن د امرونو څخه به هيڅ سرغړونه نه کوي. بيا به هغه او د هغه اولاده د ډېرو کلونو دپاره په اسرائيلو باندې حکومت وکړي.