Read Pashto (Nangahari) — د پښتو مقدس کتاب تثنيه 18 Bible Online

تثنيه 18 - Pashto (Nangahari) — د پښتو مقدس کتاب bible

تثنيه 18

¹د لاوي د قبيلې خلک به د کاهنانو په شمول د نورو قبيلو سره هيڅ ځمکه ترلاسه نه کړي. د هغې په ځای به هغوی د هغو قربانيو يوه برخه چې څښتن ته وړاندې کيږي اخلي.

²هغوی دې هيڅ ځمکه ونلري لکه څنګه چې نورې قبيلې يې لري. د څښتن د وعدې سره سم د هغوی برخه دا امتياز دی چې هغوی د څښتن کاهنان دي.

³کله چې غوايان يا پسونه قرباني کيږي، کاهنانو ته دې اوږه، ژامه او لری ورکول کيږي.

⁴هغوی ته دې د غلو دانو، شرابو، د زيتونو د تېلو او د پسونو د وړيو اولنی حاصل ورکول کيږي.

⁵ستاسو څښتن خدای ستاسو د ټولو قبيلو څخه د لاوي قبيله انتخاب کړه چې د تل دپاره د کاهنانو په توګه د هغه خدمت وکړي.

⁶هر لاوي چې زړه يې وغواړي کولی شي د اسرائيلو د هر ښار څخه چې په کې اوسيږي هغه ځای ته ورشي چې څښتن يې د خپل عبادت دپاره انتخابوي

⁷او کولی شي د نورو ټولو لاويانو په شان چې هلته خدمت کوي هغه هم هلته د خپل څښتن خدای د کاهن په توګه خدمت وکړي.

⁸که څه هم کېدای شي چې هغه د خپلې کورنۍ د مال د خرڅولو په وسيله پيسې ترلاسه کړې وي، هغه دې د نورو کاهنانو په اندازه خواړه ترلاسه کوي.

⁹کله چې تاسو هغې خاورې ته ورداخل شئ چې خپل څښتن خدای يې درکوي، د هغه ځای د قومونو د ناوړه رواجونو څخه پيروي مه کوئ.

¹⁰په خپلو قربانګاوو باندې خپل اولادونه په اور کې مه قرباني کوئ او خپل خلک مه پرېږدئ چې فال وګوري يا کوډو پسې وګرځي يا جادو وکړي

¹¹يا تعويذ استعمال کړي. همدارنګه خلک مه پرېږدئ چې د مړو سره د مشورې کولو کوښښ وکړي.

¹²ستاسو څښتن خدای د هغو خلکو څخه کرکه کوي څوک چې داسې ناوړه کارونه کوي، نو په دې خاطر څښتن هغه قومونه ستاسو له مخې څخه لېرې کوي.

¹³څښتن ته پوره وفادار اوسئ.“

¹⁴بيا حضرت موسیٰ وفرمايل: ”په هغه خاوره کې چې تاسو به يې ژر ونيسئ، خلک د هغه چا د مشورې څخه پيروي کوي څوک چې کوډې کوي او فال ګوري. مګر تاسو ته خپل څښتن خدای اجازه نه درکوي چې داسې کار وکړئ.

¹⁵د دې په ځای به هغه تاسو ته ستاسو د قوم څخه زما په شان يو نبي درولېږي او تاسو بايد د هغه اطاعت وکړئ.

¹⁶په هغه ورځ چې تاسو د سينا د غره سره راغونډ شوئ نو ومو ويل چې مونږ نور نه غواړو د خپل څښتن خدای آواز واورو او دا وېروونکی اور ووينو ځکه مونږ وېرېږو چې مړه به شو.

¹⁷نو څښتن ماته وفرمايل: هغوی صحيح وايي.

¹⁸زه به هغوی ته د هغوی د خپل قوم څخه ستا په شان يو نبي ورولېږم. زه به ورته ووايم چې څه بايد ووايي او هغه به قوم ته هغه څه وايي چې زه يې امر کوم.

¹⁹هغه به زما په نوم خلکو ته خبرې کوي او زه به هر هغه چاته سزا ورکړم چې هغه ته د اطاعت کولو څخه انکار وکړي.

²⁰مګر که چېرې يو نبي جرأت وکړي او په داسې وخت کې زما په نوم يو پيغام واوروي چې ما ورته امر نه وي کړی، نو هغه بايد مړ شي او هغه نبي هم بايد مړ شي چې د نورو خدايانو په نوم خبرې کوي.

²¹کېدای شي چې ستاسو سره دا سوال پيدا شي چې مونږ څنګه پوهېدلی شو چې د نبي پيغام د څښتن له خوا څخه نه دی؟

²²که چېرې يو نبي د څښتن په نوم خبرې وکړي او د هغه خبرې رښتيا نشي، بيا هغه د څښتن پيغام نه دی. هغه نبي له خپله ځانه دا خبرې کړې دي نو بايد د هغه څخه ونه وېرېږئ.