Read Pashto (Nangahari) — د پښتو مقدس کتاب تثنيه 19 Bible Online

تثنيه 19 - Pashto (Nangahari) — د پښتو مقدس کتاب bible

تثنيه 19

¹کله چې ستاسو څښتن خدای هغه خلک تباه کړي چې ځمکه يې تاسو ته درکوي او تاسو د هغوی ښارونه او کورونه ونيسئ او په کې واوسېږئ،

²۲‏-۳ هغه سيمه په دريو برخو ووېشئ. په هرې برخې کې يو داسې ښار انتخاب کړئ چې خلک وکولی شي د خوندي پاتې کېدلو دپاره لاړ شي. دغو ښارونو ته لارې جوړې کړئ ترڅو خلک وکولی شي په آسانۍ سره هغو ځايونو ته ورورسيږي. بيا که څوک يو نفر ووژني هغه به وکولی شي چې د دې ښارونو څخه کوم يو ته وتښتي او خوندي پاتې شي.

⁴که چېرې څوک په سهوې سره يو نفر ووژني چې د هغه دښمن نه ؤ، هغه کولی شي چې دغو ښارونو ته وتښتي او خپل ژوند وژغوري.

⁵د مثال په ډول، که چېرې دوه تنه د لرګيو د ماتولو دپاره ځنګل ته لاړ شي او په داسې حال کې چې يو تن ونه په تبر وهي، د تبر سر د لاستي څخه ووزي او بل نفر ورباندې ووژل شي، بيا هغه کولی شي چې د دغو دريو ښارونو څخه يو ښار ته وتښتي او خپل ژوند وژغوري.

⁶که چېرې د پناه اخيستلو ښار ډېر لېرې وي نو کېدای شي چې هغه بدل اخيستونکی چې ډېر په قهر دی وکولی شي په هغه قاتل پسې ورورسيږي او هغه ووژني. که څه هم اولنی قتل يوه تصادفي پېښه وه خو هغه به ووژل شي.

⁷په دې خاطر زه تاسو ته حکم کوم چې د پناه اخيستلو دپاره درې ښارونه بېل کړئ.

⁸کله چې ستاسو څښتن خدای ستاسو سيمه پراخه کړي لکه څنګه چې هغه ستاسو نيکونو ته فرمايلي ؤو او هغه ټوله ځمکه درکړي چې د هغوی سره يې وعده کړې ده،

⁹بيا بايد تاسو درې نور ښارونه انتخاب کړئ. (هغه به په دې شرط دا ځمکه درکړي چې تاسو هغه ټول امرونه په ځای کړئ چې زه يې نن درکوم او د خپل څښتن خدای سره مينه وکړئ او همېشه د هغه د تعليم سره سم ژوند وکړئ.)

¹⁰دا کار وکړئ ترڅو بې ګناه خلک مړه نشي او تاسو په هغه خاوره کې چې څښتن يې درکوي د هغوی د وژلو مجرم نشئ.

¹¹مګر فرض کړئ يو نفر خپل دښمن په سړه سينه په قصدي توګه په قتل رسوي او بيا د هغو ښارونو څخه يو ښار ته د خوندي پاتې کېدو دپاره وتښتي.

¹²په هغه صورت کې دې د قاتل د ښار مشران هغه راوغواړي او د وژل شوي نفر خپلوان ته دې چې د قتل د بدل اخيستلو مسئوليت په غاړه لري وسپاري ترڅو ووژل شي.

¹³په هغه باندې هيڅ رحم مه کوئ. تاسو بايد اسرائيل د بې ګناه وينې توئېدلو د جرم څخه پاک کړئ، ترڅو ستاسو هر کار په ښه ډول پرمخ لاړ شي.

¹⁴په هغه خاوره کې چې څښتن يې تاسو ته درکوي، هلته له مخکې څخه تيږې ودرول شوې دي چې ستاسو او ستاسو د ګاونډيانو د پټيو ترمنځ د جايداد حد په نښه کړي. نو هغه تيږې مه بېځايه کوئ.

¹⁵د دې دپاره يو شاهد بس نه دی چې په يو چا باندې د جرم تور ثابت کړي، دوه يا درې شاهدان ضرور دي چې په يو چا باندې جرم ثابت کړي.

¹⁶که چېرې څوک دا هڅه وکړي چې بل چاته د درواغو د تور لګولو په وسيله زيان ورسوي،

¹⁷هغه دواړه دې هغه ځای ته لاړ شي چېرته چې د څښتن عبادت کيږي او د کاهنانو او د هغه وخت د قاضيانو له خوا دې ورباندې قضاوت وشي.

¹⁸قاضيان بايد د دعوې پوره څېړنه وکړي او که چېرې چا په خپل اسرائيلي ورور باندې د درواغو تور لګولی وي،

¹⁹هغه ته دې هغه سزا ورکړل شي چې تورن شوي نفر ته به ورکړل شوې وای. په دې ډول به تاسو خپل ځانونه د دې بدکارۍ څخه خلاص کړئ.

²⁰بيا به نور ټول خلک د دې پېښې څخه خبر شي او وبه وېريږي او هيڅوک به بيا هيڅکله داسې بد کار نه کوي.

²¹په داسې صورت کې هيڅ رحم مه کوئ: د ژوند په بدل کې سزا ژوند دی، د سترګې په بدل کې سترګه، د غاښ په بدل کې غاښ، د لاس په بدل کې لاس او د پښې په بدل کې پښه.