Read Pashto (Nangahari) — د پښتو مقدس کتاب تثنيه 20 Bible Online

تثنيه 20 - Pashto (Nangahari) — د پښتو مقدس کتاب bible

تثنيه 20

¹کله چې تاسو د خپلو دښمنانو سره د جګړې دپاره لاړ شئ او ووينئ چې د هغوی جنګي ګاډۍ او آسونه او لښکر ستاسو په پرتله زيات دي، د هغوی څخه مه وېرېږئ. ستاسو څښتن خدای چې تاسو يې د مصر څخه آزاد کړئ هغه به ستاسو سره مل وي.

²مخکې له دې چې تاسو جګړه پيل کړئ، يو کاهن دې مخکې راشي او لښکر ته دې داسې ووايي:

³د اسرائيلو خلکو، واورئ! تاسو نن جګړې ته روان يئ. د خپلو دښمنانو څخه ونه وېرېږئ او جرأت له لاسه ورنه کړئ او وارخطا نشئ.

⁴ځکه چې ستاسو سره خپل څښتن خدای روان دی چې ستاسو په خاطر ستاسو د دښمنانو په مقابل کې وجنګيږي او تاسو ته بری درکړي.

⁵بيا دې منصبداران لښکرو ته وينا وکړي او ودې وايي: آيا دلته داسې سړی شته چې نوی کور يې ودان کړی وي مګر لا تر اوسه پورې يې ورته کډه نه وي وروړې؟ که چېرې وي نو هغه دې کور ته لاړ شي. که نه، نو که چېرې هغه په جګړه کې ووژل شي، بل څوک به د هغه په کور کې واوسيږي.

⁶آيا دلته داسې سړی شته چې د انګورو باغ يې جوړ کړی وي، مګر لا تر اوسه يې دا موقع نه وي موندلې چې د هغه څخه انګور راټول کړي؟ که چېرې وي نو هغه دې کور ته لاړ شي. که نه، نو که چېرې هغه په جګړه کې ووژل شي، بل څوک به يې د مېوو څخه خوند واخلي.

⁷آيا دلته داسې څوک شته چې کوژدن يې کړې وي او تر اوسه پورې يې واده نه وي کړی؟ که چېرې وي نو هغه دې کور ته لاړ شي. که نه، نو که چېرې هغه په جګړه کې ووژل شي، بل څوک به د هغه د کوژدن شوې ښځې سره واده وکړي.

⁸منصبداران به لښکرو ته دا هم ووايي: آيا دلته داسې سړی شته چې خپل جرأت يې له لاسه ورکړی وي او وېريږي؟ که چېرې وي نو هغه دې کور ته لاړ شي. که نه، نو هغه به د نورو روحيه کمزورې کړي.

⁹کله چې منصبداران د لښکرو سره خپلې خبرې خلاصې کړي، نو قوماندانان دې د لښکرو مشري په غاړه واخلي.

¹⁰کله چې تاسو په يو ښار باندې د حملې کولو دپاره لاړ شئ، اول د هغه ځای خلکو ته د تسليمېدلو موقع ورکړئ.

¹¹که چېرې هغوی دروازې خلاصې کړي او تسليم شي، هغوی ټول دې ستاسو غلامان شي او ستاسو دپاره دې سخت کارونه کوي.

¹²مګر که چېرې د هغه ښار خلک تسليم نشي بلکه وجنګيږي، د خپلو لښکرو په وسيله هغه ښار محاصره کړئ.

¹³کله چې هغه ښار تاسو ته خپل څښتن خدای په لاس درکړي، بيا د هغه ټول سړي ووژنئ.

¹⁴مګر تاسو کولی شئ چې د هغه ښار ښځې، ماشومان، حيوانات او نور ټول شيان د غنيمت په توګه د ځان دپاره واخلئ. تاسو کولی شئ چې د خپلو دښمنانو هر شی استعمال کړئ. څښتن هغه تاسو ته درکړی دی.

¹⁵تاسو بايد د هغو ښارونو سره چې د وعده شوې ځمکې څخه لېرې دي همداسې چلند وکړئ.

¹⁶مګر کله چې تاسو په هغه خاوره کې چې خپل څښتن خدای يې درکوي، ښارونه ونيسئ د هغه ځای ټول خلک او حيوانات ووژنئ.

¹⁷د څښتن د حکم په مطابق ټول خلک په بشپړه توګه له منځه يوسئ يعنې حيتيان، اموريان، کنعانيان، فرزيان، حويان او يبوسيان.

¹⁸هغوی ووژنئ، ترڅو په تاسو باندې د هغو ټولو ناوړه شيانو په درزده کولو سره د څښتن په مقابل کې ګناه ونه کړي چې هغوی يې خپلو خدايانو ته په عبادت کې کوي.

¹⁹کله چې تاسو يو ښار د زيات وخت دپاره تر محاصرې لاندې نيسئ او د هغه په مقابل کې جنګېږئ چې ويې نيسئ، نو د هغه ځای د مېوې ونې مه وهئ ځکه چې تاسو کولی شئ د هغو مېوه وخورئ. ونې يې له منځه مه وړئ ځکه چې ونې ستاسو دښمنان نه دي.

²⁰کېدای شي چې تاسو د زينو او برجونو د جوړولو دپاره لرګيو ته اړتيا ولرئ چې دېوالونو ته په ختلو او د ښار په نيولو کې درسره مرسته وکړي. خو يوازې د هغو ونو څخه کار واخلئ چې په دې پوهېږئ چې هغه د مېوې ونې نه دي.