Read Pashto (Nangahari) — د پښتو مقدس کتاب تثنيه 21 Bible Online

تثنيه 21 - Pashto (Nangahari) — د پښتو مقدس کتاب bible

تثنيه 21

¹فرض کړئ د هغه هېواد په يوه بانډه کې چې خپل څښتن خدای يې تاسو ته درکوي يو قتل شوی نفر موندل کيږي او تاسو نه پوهېږئ چې هغه چا وژلی دی.

²ستاسو مشران او قاضيان دې لاړ شي او له هغه ځای څخه چې مړی په کې موندل شوی دی تر شاوخوا ښارونو پورې دې فاصله اندازه کړي.

³بيا د هغه ښار مشران چې هغه ځای ته ترټولو نژدې وي چېرته چې مړی موندل شوی وي، يوه داسې خوسۍ انتخاب کړي چې هيڅ کار ورڅخه اخيستل شوی نه وي او جغ ورباندې نه وي ايښودل شوی.

⁴هغوی دې دا خوسۍ يوې داسې ويالې ته نژدې يو ځای ته کوزه کړي چې هيڅ نه وچيږي او چېرته چې ځمکه هيڅکله قلبه شوې نه وي او څه په کې کرل شوي نه وي او هلته دې هغوی د هغې اورمېږ مات کړي.

⁵لاوي کاهنان دې هم هلته لاړ شي ځکه چې هغوی د هرې قانوني دعوې پرېکړه کوي چې ظلم او زياتی په کې وي. ستاسو څښتن خدای هغوی د عبادت ځای د خاص خدمت دپاره او د دې دپاره انتخاب کړي دي چې د هغه په نوم برکت ورکړي.

⁶بيا به د هغه ښار ټول مشران چې هغه ځای ته ترټولو نژدې وي چېرته چې مړی موندل شوی وي، خپل لاسونه د مړې خوسۍ دپاسه ومينځي

⁷او داسې اعلان دې وکړي: مونږ دا نفر په قتل نه دی رسولی او په دې نه پوهېږو چې چا دا قتل کړی دی.

⁸څښتنه، خپل قوم اسرائيل چې تا د مصر څخه آزاد کړی دی وبخښه. مونږ وبخښه او د يو بې ګناه نفر د قتل مسئوليت زمونږ په غاړه مه اچوه.

⁹نو تاسو به خپل ځانونه د بې ګناه وينې د تويولو د جرم څخه پاک کړئ ځکه چې تاسو داسې کار وکړ چې د څښتن په نظر کې صحيح دی.

¹⁰کله چې تاسو ته خپل څښتن خدای په جګړه کې بری درکړي او تاسو خلک اسيران کړئ،

¹¹نو کېدای شي چې د هغوی په منځ کې يوه داسې ښايسته انجلۍ ووينئ چې ستاسو خوښيږي او غواړئ چې واده ورسره وکړئ.

¹²هغه خپل کور ته راولئ. هلته به هغه خپل سر وخرايي، خپل نوکان به پرې کړي

¹³او خپل د اسيرتوب کالي به وباسي. هغه دې يوه مياشت ستاسو په کور کې پاتې شي او د خپل مور او پلار دپاره دې وژاړي. له هغې څخه وروسته تاسو کولی شئ چې واده ورسره وکړئ.

¹⁴وروسته که چېرې تاسو د هغې سره خوشاله نه وئ، نو طلاق ورته ورکړئ او هغه پرېږدئ چې هر چېرته چې غواړي لاړه شي. هغه د يوې غلامې په توګه نشئ خرڅولی او نه يې خپله غلامه کولی شئ ځکه چې تاسو د هغې سره يوځای شوي يئ.

¹⁵فرض کړئ يو سړی دوه ښځې لري چې يوه ورباندې ګرانه وي او بله ورباندې ګرانه نه وي او هغوی دواړه هغه ته زامن وزېږوي، مګر مشر زوی يې د هغې ښځې اولاد وي چې د هغه خوښه نه ده.

¹⁶کله چې هغه سړی پرېکړه کوي چې څنګه به هغه د خپلو زامنو ترمنځ خپل جايداد ووېشي، نو هغه دې د مشر زوی د برخې په ورکولو سره د خپلې هغې ښځې د زوی طرفداري نه کوي چې هغه يې خوښه ده.

¹⁷هغه دې د خپل مال څخه مشر زوی ته دوه چنده برخه ورکړي، که څه هم هغه د هغې ښځې زوی نه دی چې د هغه خوښه ده. يو سړی بايد خپل مشر زوی قبول کړي او هغه برخه ورته ورکړي چې هغه يې په قانوني توګه مستحق دی.

¹⁸فرض کړئ يو سړی يو سرزوری او سرکش زوی لري، سره له دې چې مور او پلار ورته سزا هم ورکوي خو د هغوی اطاعت نه کوي.

¹⁹د هغه مور او پلار دې هغه د ښار دروازې ته چېرته چې د ښار مشران غونډه کوي ورولي.

²⁰هغوی دې مشرانو ته داسې ووايي: زمونږ زوی سرزوری او سرکش دی او زمونږ اطاعت نه کوي، هغه پيسې بې ځايه مصرفوي او شرابي دی.

²¹بيا دې د ښار خلک هغه سنګسار کړي چې مړ شي او په دې ډول به تاسو خپل ځانونه د دې بدکارۍ څخه خلاص کړئ. په اسرائيلو کې به ټول خلک د دې پېښې څخه خبر شي او وبه وېريږي.

²²که چېرې يو نفر د يو جرم له کبله وژل شوی وي او د هغه مړی په يوه ونه کې ځوړند وي،

²³دا مړی بايد ټوله شپه هلته پاتې نشي. هغه بايد په هماغه ورځ ښخ شي ځکه چې يو داسې مړی چې په ونه کې ځوړند وي په وطن باندې د خدای پاک لعنت راولي. نو هغه مړی ښخ کړئ ترڅو تاسو هغه وطن ناپاکه نه کړئ چې خپل څښتن خدای يې درکوي.