Read Pashto (Nangahari) — د پښتو مقدس کتاب تثنيه 22 Bible Online

تثنيه 22 - Pashto (Nangahari) — د پښتو مقدس کتاب bible

تثنيه 22

¹که چېرې تاسو د خپل اسرائيلي ورور غويی يا پسه ووينئ چې لاره يې ورکه کړې وي، نو خپلې سترګې ورباندې مه پټوئ، هغه حيوان بېرته د هغه خاوند ته بوزئ.

²مګر که چېرې د هغه خاوند لېرې اوسيږي يا تاسو نه پوهېږئ چې هغه حيوان د چا دی، بيا يې خپل کور ته بوزئ. کله چې خاوند يې د هغه د لټولو دپاره راشي، هغه ورته بېرته ورکړئ.

³که چېرې يو خر، ټوکر، يا بل داسې شی پيدا کړئ چې د يو اسرائيلي ورور څخه ورک شوی وي، همدا ډول کار ورسره وکړئ.

⁴که چېرې د يو اسرائيلي ورور خر يا غويی په لاره باندې لويدلی وي، په هغه باندې خپلې سترګې مه پټوئ، بلکه د هغه سره مرسته وکړئ چې خپل حيوان بېرته پورته کړي.

⁵ښځې دې د سړيو کالي نه اغوندي او سړي دې د ښځو کالي نه اغوندي. ستاسو څښتن خدای د هغو خلکو څخه چې داسې کارونه کوي کرکه کوي.

⁶که چېرې تاسو په يوه ونه کې يا په ځمکه باندې د مرغيو يوه ځاله پيدا کړئ چې د مرغيو مور په هګيو باندې يا د خپلو بچيانو سره ناسته وي، تاسو بايد د مرغيو مور وانخلئ.

⁷تاسو کولی شئ چې د مرغۍ بچيان واخلئ، مګر د مرغيو مور بايد خوشې کړئ ترڅو اوږد او خوشبخته ژوند ولرئ.

⁸کله چې تاسو يو نوی کور جوړوئ، د بام ګردچاپېره يو دېوال جوړ کړئ. بيا که چېرې څوک ورڅخه راغورزيږي او وژل کيږي، مسئوليت به يې ستاسو په غاړه نه وي.

⁹که چېرې تاسو د انګورو باغ جوړوئ نو په هغه کې د نورو مېوو ونې يا فصل مه کرئ، که چېرې داسې وکړئ نو تاسو ته د انګورو يا د نورو حاصلاتو استعمالول حرام کيږي.

¹⁰يو غويی او خر د قلبې دپاره د يو بل سره يوځای مه تړئ.

¹¹داسې کالي مه اغوندئ چې د دوه مختلفو ډولونو تار څخه يعنې د اوبدل شويو وړيو او کتان دواړو څخه ګډ جوړ شوي وي.

¹²د خپلې چپنې په څلورو کنجونو پورې زونډي وګنډئ.

¹³فرض کړئ يو سړی د يوې انجلۍ سره واده کوي او د هغې سره يوځای کيږي خو وروسته يې هغه نه خوښيږي

¹⁴او په هغې باندې د درواغو تور ولګوي او هغه بدنامه کړي ووايي: ما د دې انجلۍ سره واده وکړ، مګر کله چې مونږ سره څملاستو نو ماته معلومه شوه چې هغه پېغله نه وه.

¹⁵که چېرې داسې وشي، نو د انجلۍ مور او پلار دې د واده هغه روجايي چې په وينه باندې ککړه وي واخلي چې دا خبره ثابته کړي چې هغه پېغله وه. هغوی دې دا روجايي د ښار مشرانو ته د هغه ښار په دروازه کې وروښايي.

¹⁶د هغې پلار به هغوی ته داسې ووايي: ما خپله لور دې سړي ته په نکاح ورکړې ده او اوس زما لور د هغه نه خوښيږي.

¹⁷په هغې باندې يې د درواغو تور لګولی دی او داسې وايي: کله چې ما د هغې سره واده وکړ هغه پېغله نه وه. مګر دا زما د لور د پېغلتوب ثبوت دی. د واده په روجايي باندې د وينې داغونه وګورئ!

¹⁸بيا دې د ښار مشران د هغې مېړه په قمچينه باندې ووهي.

¹⁹هغوی دې هغه سړی سل مثقاله سپين زر جريمه هم کړي او هغه دې د ښځې پلار ته ورکړي ځکه چې هغه يوه اسرائيلۍ ښځه بدنامه کړې ده. له دې سره سره به هغه د هغه سړي ښځه پاتې شي او ترڅو پورې چې هغه ژوندی وي هغې ته طلاق نشي ورکولی.

²⁰مګر که چېرې دا تور حقيقت ولري او د هغې د پېغلتوب هيڅ ثبوت نه وي،

²¹بيا دې هغوی هغه ښځه د خپل پلار د کور د دروازې خولې ته وباسي او د هغه ښار خلک دې هغه هلته سنګساره کړي چې مړه شي. ځکه چې هغې په داسې حال کې چې لا د خپل پلار په کور کې اوسېدله د واده څخه مخکې د کوم سړي سره د زنا کولو په سبب زمونږ د قوم په منځ کې له شرمه ډک کار کړی دی. نو د هغې په وژلو سره بايد تاسو خپل ځانونه د دې بدکارۍ څخه خلاص کړئ.

²²که چېرې يو سړی د بل سړي د ښځې سره د زنا کولو په حال کې ونيول شي، هغوی دواړه دې ووژل شي. په دې ډول به تاسو د دې بدکارۍ څخه خلاص شئ.

²³فرض کړئ په يو ښار کې يو سړی د يوې داسې پېغلې سره د زنا کولو په حال کې نيول کيږي چې د بل چا سره يې کوژدن شوې وي.

²⁴تاسو بايد هغوی دواړه د ښار څخه بيرون وباسئ او سنګسار يې کړئ چې مړه شي. هغه پېغله دې ځکه مړه شي چې د مرستې دپاره يې چيغې نه دي وهلې، که څه هم هغه په ښار کې وه او کېدای شو چې هلته د هغې چيغې اورېدل شوې وای. او سړی دې ځکه مړ شي چې هغه د هغه چا سره زنا کړې ده چې کوژدن شوې وه. تاسو بايد خپل ځانونه د دې بدکارۍ څخه خلاص کړئ.

²⁵فرض کړئ يو سړی د ښار څخه بيرون په يوه بانډه کې يوه داسې پېغله بې عزته کړي چې د بل چا سره يې کوژدن شوې وي. بيا دې يوازې سړی ووژل شي،

²⁶پېغلې ته دې هيڅ شی ونه ويل شي ځکه چې هغې داسې ګناه نه ده کړې چې د مرګ لايقه وي. دا هماغه شان دعوه ده لکه څنګه چې يو سړی په بل سړي باندې حمله وکړي او هغه په قتل ورسوي.

²⁷هغه سړي په بانډه کې کوژدن شوې پېغله بې عزته کړه او که څه هم هغې د مرستې دپاره چيغې ووهلې، خو هلته هيڅوک نه ؤ چې د هغې سره مرسته وکړي او هغه وژغوري.

²⁸فرض کړئ يو سړی د يوې داسې پېغلې په بې عزته کولو نيول کيږي چې کوژدن شوې نه وي.

²⁹هغه سړی دې د هغې پلار ته د مهر بيه يعنې پنځوس مثقاله سپين زر ورکړي او د هغې پېغلې سره دې واده وکړي، ځکه چې هغه يې مجبوره کړې وه چې ورسره څملي. ترڅو پورې چې هغه ژوندی وي هغې ته طلاق نشي ورکولی.

³⁰هيڅ سړی دې د خپل پلار د کومې ښځې سره د زنا کولو په سبب خپل پلار نه سپکوي.