Read Pashto (Nangahari) — د پښتو مقدس کتاب تثنيه 23 Bible Online

تثنيه 23 - Pashto (Nangahari) — د پښتو مقدس کتاب bible

تثنيه 23

¹هيڅ داسې سړی چې خصي شوی وي يا د هغه تناسلي آله پرې کړل شوې وي د څښتن په قوم کې نشي شاملېدلی.

²هيڅ داسې نفر چې حرامي وي او د داسې نفر اولاده حتیٰ تر لسم نسله پورې د څښتن په قوم کې نشي شاملېدلی.

³هيڅ عمونی يا موآبی او د هغوی اولاده حتیٰ تر لسم نسله پورې د څښتن په قوم کې نشي شاملېدلی.

⁴دا په دې سبب کله چې تاسو د مصر څخه راوتلئ، هغوی تاسو ته د ډوډۍ او اوبو د برابرولو څخه انکار وکړ او د بعور زوی بلعام يې چې په بين النهرين کې د فتور د ښار څخه ؤ اجير ونيوه چې په تاسو باندې لعنت ووايي.

⁵مګر ستاسو څښتن خدای به بلعام ته غوږ نه نيوه، د هغې په ځای يې لعنت په برکت بدل کړ ځکه چې هغه ستاسو سره مينه درلودله.

⁶تاسو او ستاسو راتلونکي نسلونه د هغو قومونو سره د هيڅ شي مرسته ونه کړئ او د هغوی خوشبختي مه غواړئ.

⁷ادوميانو ته په سپکه سترګه مه ګورئ، ځکه چې هغوی ستاسو خپلوان دي. مصريانو ته هم په سپکه سترګه مه ګورئ، ځکه چې يو وخت تاسو د هغوی په خاوره کې اوسېدلئ.

⁸کېدای شي چې د هغوی لمسيان د څښتن په قوم کې شامل شي.

⁹کله چې تاسو د جنګ په وخت کې په کمپ کې يئ، بايد د هر هغه شي څخه چې تاسو په مذهبي لحاظ ناپاکه کوي ځانونه وساتئ.

¹⁰که چېرې د شپې له خوا شيطان يو سړی وغولوي او له دې کبله هغه ناپاک شي، هغه دې د کمپ څخه بيرون ووزي او هلته دې پاتې شي.

¹¹هغه دې مازديګر غسل وکړي او ماښام کولی شي چې بېرته کمپ ته راشي.

¹²د کمپ څخه بيرون يو داسې ځای جوړ کړئ چې د تشناب په توګه ورڅخه کار واخيستل شي.

¹³په خپلو سامانونو کې يو داسې شی ولرئ چې ځمکه ورباندې وکيندل شي. کله چې تاسو د حاجت د رفع کولو دپاره ځئ، په هغه باندې يوه کنده وباسئ. بيا وروسته له دې چې خپل حاجت رفع کړئ، خپل غايطه مواد په هغې کندې کې ښخوئ.

¹⁴څرنګه چې ستاسو څښتن خدای ستاسو په کمپ کې ګرځي چې ستاسو ساتنه وکړي او په خپلو دښمنانو باندې بری درکړي، نو ستاسو کمپ بايد مقدس وي ترڅو هغه ستاسو په منځ کې کوم خراب شی ونه ويني او ستاسو څخه مخ ونه ګرځوي.

¹⁵که چېرې يو غلام د خپل بادار څخه وتښتي او تاسو ته د پناه اخيستلو دپاره راشي، هغه بېرته خپل بادار ته په لاس مه ورکوئ.

¹⁶هغه کولی شي ستاسو په هر ښار کې چې د هغه خوښه وي واوسيږي او تاسو بايد د هغه سره بده رويه ونه کړئ.

¹⁷هيڅ اسرائيلی سړی يا ښځه بايد د عبادتخانې لواطت کار يا فاحشه * نشي.

¹⁸همدارنګه هيڅ داسې پيسې چې په دې ډول ګټل شوې وي د نذر د ورکولو دپاره دې ستاسو د څښتن خدای کور ته رانه وړل شي. څښتن د عبادتخانې د لواطت کارانو او فاحشو څخه کرکه کوي.

¹⁹کله چې تاسو يو اسرائيلي ورور ته پيسې يا ډوډۍ يا بل شی په قرض ورکړئ، د هغه څخه سود مه اخلئ.

²⁰تاسو کولی شئ چې د بېګانه نفر څخه سود واخلئ، مګر د اسرائيلي څخه نه. دا کار وکړئ، نو ستاسو څښتن خدای به ستاسو په هر کار کې چې تاسو يې په هغه خاوره کې کوئ چې تاسو يې نيسئ برکت واچوي.

²¹کله چې تاسو خپل څښتن خدای ته نذر منئ، د خپلې وعدې په پوره کولو کې ځنډ مه کوئ، ځکه چې ستاسو څښتن خدای به ستاسو څخه وغواړي چې هغه وعده پوره کړئ. که نه، نو تاسو به ګناهکار وګڼل شئ.

²²دا کومه ګناه نه ده چې تاسو څښتن ته نذر ونه منئ.

²³څه چې تاسو ويلي دي هغه بايد خامخا پوره کړئ، ځکه چې تاسو په خپله خوښه او په خپلې خولې څښتن ته نذر منلی دی.

²⁴کله چې تاسو د بل چا د انګورو باغ ته ورننوزئ، څومره انګور چې غواړئ خوړلی يې شئ، مګر هغه بايد په يو لوښي کې د خپل ځان سره يونسئ.

²⁵کله چې تاسو د بل چا د غلو دانو پټي ته ورننوزئ، کولی شئ چې په خپلو لاسونو باندې وږي راټول کړئ او هغه وخورئ، مګر هغه بايد په لور باندې ونه رېبئ.