Read Pashto (Nangahari) — د پښتو مقدس کتاب تثنيه 25 Bible Online

تثنيه 25 - Pashto (Nangahari) — د پښتو مقدس کتاب bible

تثنيه 25

¹فرض کړئ دوه اسرائيليان محکمې ته ورځي چې يوه دعوه حل کړي او يو تن يې بې ګناه او بل يې مجرم وګڼل شي.

²که چېرې په مجرم باندې د وهلو حکم وشي، قاضي دې هغه پړمخې څملوي او په قمچينه باندې دې ووهي. د قمچينې د ګوزارونو شمېر به د هغه په جرم پورې اړه ولري.

³هغه به د څلوېښتو ګوزارونو څخه زيات نه وهل کيږي، د هغې څخه زيات به په عام محضر کې د هغه د سپکاوي سبب شي.

⁴د غلو دانو د غوبل کولو په وخت کې د غويي خوله مه تړئ.

⁵که چېرې دوه ورونه په يو جايداد باندې ژوند کوي او د هغو څخه يو تن مړ شي او هيڅ زوی ورڅخه پاتې نشي، بيا دې د هغه کونډه د کورنۍ څخه بيرون د بل چا سره واده نشي. دا د مړه شوي سړي د ورور وظيفه ده چې د هغې سره واده وکړي.

⁶د هغوی اول زوی چې پيدا شي، هغه به د مړ شوي سړي زوی ګڼل کيږي ترڅو د هغه نوم د اسرائيلو له قوم څخه ورک نشي.

⁷مګر که چېرې د مړ شوي سړي ورور نه غواړي چې د هغې سره واده وکړي، نو هغه ښځه دې د ښار مشرانو ته چې د ښار په دروازه کې غونډه کوي ورشي او داسې دې ورته ووايي: زما لېور زما په حق کې خپل مسئوليت نه ترسره کوي، هغه د دې خبرې څخه انکار کوي چې د هغه ورور دې د اسرائيلو په قوم کې اولاده ولري.

⁸بيا دې د ښار مشران د هغې لېور راوغواړي او خبرې دې ورسره وکړي. که چېرې بياهم د هغې سره د واده کولو څخه انکار کوي،

⁹نو د هغه د ورور کونډه دې د ښار د مشرانو په حضور کې هغه ته ورشي، د هغه يوه څپلۍ دې وباسي، په مخ دې ورته لياړې توکړي او داسې دې ووايي: د هغه سړي سره چې نه غواړي د خپل مړ ورور کور يې ودان شي داسې کيږي.

¹⁰پس له دې به د هغه سړي کورنۍ په اسرائيلو کې د څپلۍ ويستل شوي د کورنۍ په نوم مشهوره شي.

¹¹که چېرې دوه نفره يو د بل سره جنګ کوي او د يو سړي ښځه هڅه وکړي چې خپل مېړه د هغه سړي څخه وژغوري او هغه سړی د تناسلي آلې څخه ونيسي،

¹²نو په هغې باندې هيڅ رحم مه کوئ. د هغې لاس پرې کړئ.

¹³۱۳‏-۱۴ دوه قسمه وزنونه يا اندازې چې خلک ورباندې وغولوئ مه استعمالوئ چې يو يې د کوم شي د اخيستلو دپاره استعمال کړئ چې زياته ګټه ترلاسه کړئ او بل يې د خرڅلاو دپاره چې خلکو ته کم شی ورکړئ.

¹⁵د صحيح وزنونو او اندازو څخه کار اخلئ ترڅو تاسو په هغه خاوره کې چې خپل څښتن خدای يې درکوي زيات عمر ولرئ.

¹⁶څښتن د داسې خلکو څخه چې ټګي او منافقت کوي، کرکه کوي.

¹⁷در په ياد کړئ کله چې تاسو د مصر څخه راتللئ، عماليقيانو په تاسو باندې څه وکړل.

¹⁸هغوی د خدای پاک څخه هيڅ وېره نه درلودله، په داسې حال کې چې تاسو ډېر ستړي وئ نو د شا له خوا يې درباندې حمله وکړه او هغه نفر چې شاته پاتې ؤو هغه ټول يې ووژل.

¹⁹نو بيا کله چې خپل څښتن خدای تاسو ته هغه وطن درکړي او د خپلو ټولو دښمنانو څخه مو چې ستاسو په شاوخوا کې اوسيږي خوندي وساتي، دا خبره هېره نه کړئ چې عماليقيان بايد په بشپړه توګه د ځمکې له مخ څخه ورک کړئ، ترڅو هيڅوک نور هغوی ياد نه کړي.