Read Pashto (Nangahari) — د پښتو مقدس کتاب تثنيه 26 Bible Online

تثنيه 26 - Pashto (Nangahari) — د پښتو مقدس کتاب bible

تثنيه 26

¹کله چې تاسو هغه خاوره ونيسئ چې خپل څښتن خدای يې درکوي او هلته واوسېږئ،

²تاسو هر يو بايد د هر فصل اوله برخه چې تاسو يې رېبئ په يوې ټوکرۍ کې واچوئ او د خپلو ځانونو سره يې هغه ځای ته يوسئ چې ستاسو څښتن خدای يې د خپل عبادت دپاره انتخابوي.

³بيا د هغه وخت کاهن ته ورشئ او داسې ورته ووايئ: زه نن خپل څښتن خدای ته دا اقرار کوم چې زه هغه وطن ته ورداخل شوی يم چې هغه يې زمونږ د نيکونو سره وعده کړې وه چې مونږ ته به يې راکړي.

⁴کاهن به ستاسو څخه ټوکرۍ واخلي او د څښتن خدای د قربانۍ د ځای په مخ کې به يې کېږدي.

⁵بيا به تاسو د څښتن په حضور کې دا خبرې بيان کړئ: زما نيکه چې د ارام څخه ؤ يو در په در ګرځېدونکی سړی ؤ. هغه خپله کورنۍ مصر ته بوتله چې هلته واوسيږي. کله چې هغوی هلته لاړل، د هغوی شمېر کم ؤ، مګر يو لوی او قدرتمند قوم ورڅخه جوړ شو.

⁶مصريانو زمونږ سره بده رويه کوله او مونږ يې دې ته مجبورولو چې د غلامانو په توګه کار وکړو.

⁷بيا مونږ د خپلو نيکونو څښتن خدای ته د مرستې دپاره فرياد وکړ. هغه زمونږ فرياد واورېد او ويې ليدل چې مونږ څومره بې وزلي ؤو چې مصريانو راباندې ظلم کاوه او مونږ يې مجبورولو چې سخت کار وکړو.

⁸هغه د زورورو معجزو په ښودلو سره مصريان سخت ووېرول او په خپل لوی قدرت او قوت سره يې مونږ د مصر څخه آزاد کړو.

⁹هغه مونږ دلته راوستلو او دا غني او حاصلخېزه ځمکه يې مونږ ته راکړه.

¹⁰نو اوس زه تاته د هغو حاصلاتو اولنۍ برخه راوړم چې تا څښتن راته راکړي دي. ټوکرۍ د څښتن په حضور کې کېږدئ او هلته عبادت وکړئ.

¹¹بيا لاړ شئ او د هغو ټولو ښو شيانو په خاطر چې ستاسو څښتن خدای تاسو او ستاسو کورنيو ته درکړي دي جشن ونيسئ. دا ياد ساتئ چې لاويانو او هغه بېګانه خلکو ته چې ستاسو په منځ کې اوسيږي په دې جشن کې بلنه ورکړئ.

¹²په هر دريم کال د خپلو حاصلاتو لسمه برخه يعنې عشر هغو لاويانو، بېګانه خلکو، يتيمانو او کونډو ته چې ستاسو په ښارونو کې اوسيږي ورکوئ، ترڅو هغوی د خوراک دپاره هرڅه ولري.

¹³بيا څښتن ته داسې ووايئ: ما د خپل کور څخه هغه لسمه برخه چې مقدسه ده واخيستله او هغه مې ستا د امر سره سم لاويانو، بېګانه خلکو، يتيمانو او کونډو ته ورکړه. ما ستا د هغو امرونو څخه چې د عشر په هکله دي، د هيڅ يو څخه سرغړونه نه ده کړې او نه مې هېر کړی دی.

¹⁴ما د غمرازۍ په وخت کې د دې مقدس عشر څخه هيڅ شی نه دی خوړلی. کله چې زه ناپاک وم هغو ته مې لاس نه دی وروړی او نه مې د هغو څخه د مړو په نوم څه ورکړي دي. ای څښتنه، ما ستا اطاعت کړی دی او تا چې ماته هر حکم کړی دی هغه مې په ځای کړی دی.

¹⁵ای څښتنه، د خپل مقدس ځای څخه چې په آسمان کې دی لاندې وګوره او خپل قوم يعنې اسرائيلو ته برکت ورکړه. په هغې غني او حاصلخېزې ځمکې کې هم برکت واچوه چې تا مونږ ته د هغې وعدې سره سم راکړې ده چې زمونږ د نيکونو سره دې کړې وه.

¹⁶نن تاسو ته خپل څښتن خدای امر کوي چې د هغه ټولو قوانينو ته غاړه کېږدئ. نو په وفادارۍ سره او د زړه له کومي هغو ته غاړه کېږدئ.

¹⁷نن تاسو اقرار وکړ چې څښتن ستاسو خدای دی. تاسو وعده کړې ده چې د هغه اطاعت به کوئ، د هغه د ټولو قوانينو څخه به پيروي کوئ او د هغه په ټولو حکمونو باندې به عمل کوئ.

¹⁸څښتن د خپلې وعدې سره سم نن دا اقرار کړی دی چې تاسو د هغه خاص قوم يئ او تاسو ته امر کوي چې د هغه ټولو قوانينو ته غاړه کېږدئ.

¹⁹څښتن به ستاسو قوم د نورو ټولو قومونو څخه چې هغه پيدا کړي دي لوی کړي او ستاسو صفت او عزت به کيږي. تاسو به د څښتن د وعدې سره سم د هغه خپل قوم يئ.“