Read Pashto (Nangahari) — د پښتو مقدس کتاب تثنيه 27 Bible Online

تثنيه 27 - Pashto (Nangahari) — د پښتو مقدس کتاب bible

تثنيه 27

¹بيا حضرت موسیٰ د اسرائيلو د مشرانو سره ولاړ ؤ او قوم ته يې وويل: ”هغو ټولو حکمونو ته غاړه کېږدئ چې زه يې نن تاسو ته درکوم.

²۲‏-۴ تاسو به ژر د اردن د سيند څخه تېر شئ او هغې خاورې ته به ورداخل شئ چې ستاسو څښتن خدای وعده کړې ده چې تاسو ته به يې درکوي. دا هغه خدای دی چې ستاسو نيکونو يې عبادت کاوه. دا غني او حاصلخېزه خاوره ده. څنګه چې هغې خاورې ته ورننوزئ نو د عيبال غره ته لاړ شئ. هلته لويې لويې تيږې ودروئ او د ګچ اخېړ ورته ورکړئ. بيا په هغو باندې دا ټول قوانين وليکئ.

⁵په هغه ځای کې يوه قربانګاه جوړه کړئ، خو د داسې تيږو څخه په کې کار مه اخلئ چې د اوسپنيز سامان په وسيله پرې کړل شوې وي،

⁶ځکه تاسو چې خپل څښتن خدای ته د قربانۍ ځای جوړوئ بايد د داسې تيږو څخه جوړ شي چې پرې کړل شوې نه وي. هلته بايد تاسو سوزېدونکې نذرانې وړاندې کړئ

⁷او هلته بايد خپلې د سلامتۍ نذرانې قرباني کړئ او هغه وخورئ او د خپل څښتن خدای په حضور کې خوشالي وکړئ.

⁸په هغو تيږو باندې چې د ګچ اخېړ ورته ورکړل شوی دی، په واضيح ډول د خدای پاک د قوانينو ټولې خبرې وليکئ.“

⁹بيا حضرت موسیٰ او لاوي کاهنانو د اسرائيلو ټول قوم ته وويل: ”ای د اسرائيلو خلکو، غلي شئ او غوږ ونيسئ. نن تاسو د خپل څښتن خدای قوم شوئ.

¹⁰نو د هغه اطاعت کوئ او د هغه د ټولو قوانينو څخه چې زه يې نن درکوم پيروي کوئ.“

¹¹په هماغه ورځ حضرت موسیٰ د اسرائيلو قوم ته حکم وکړ:

¹²”کله چې تاسو د اردن له سيند څخه تېر شوئ، دغه قبيلې دې د جرزيم په غره باندې ودريږي چې قوم ته برکتونه اعلان کړي: شمعون، لاوي، يهودا، يساکار، يوسف او بنيامين.

¹³دغه قبيلې به د عيبال په غره باندې ودريږي کله چې د لعنتونو اعلان کيږي: روبين، جاد، اشير، زبولون، دان او نفتالي.

¹⁴لاويان به د اسرائيلو ټول قوم ته په لوړ آواز سره دا خبرې وکړي:

¹⁵د خدای پاک لعنت دې وي په هر هغه چا باندې چې د تيږې، لرګي يا د فلز څخه بت جوړوي او په پټه د هغه عبادت کوي. څښتن د بت پرستۍ څخه کرکه کوي. ټول قوم به په ځواب کې ووايي: آمين!

¹⁶د خدای پاک لعنت دې وي په هر هغه چا باندې چې د خپل پلار او مور بې احترامي کوي. ټول قوم به په ځواب کې ووايي: آمين!

¹⁷د خدای پاک لعنت دې وي په هر هغه چا باندې چې هغه تيږې بېځايه کوي چې د ګاونډي د جايداد حد ورباندې په نښه کيږي. ټول قوم به په ځواب کې ووايي: آمين!

¹⁸د خدای پاک لعنت دې وي په هر هغه چا باندې چې ړانده ته غلطه لار ورښايي. ټول قوم به په ځواب کې ووايي: آمين!

¹⁹د خدای پاک لعنت دې وي په هر هغه چا باندې چې بېګانه خلک، يتيمان او کونډې د خپلو حقونو څخه محروموي. ټول قوم به په ځواب کې ووايي: آمين!

²⁰د خدای پاک لعنت دې وي په هر هغه چا باندې چې د خپل پلار د ښځې سره د زنا کولو په سبب خپل پلار سپکوي. ټول قوم به په ځواب کې ووايي: آمين!

²¹د خدای پاک لعنت دې وي په هر هغه چا باندې چې د حيوان سره جنسي اړيکې ساتي. ټول قوم به په ځواب کې ووايي: آمين!

²²د خدای پاک لعنت دې وي په هر هغه چا باندې چې د خپلې سکه يا ناسکه خور سره زنا کوي. ټول قوم به په ځواب کې ووايي: آمين!

²³د خدای پاک لعنت دې وي په هر هغه چا باندې چې د خپلې خواښې سره زنا کوي. ټول قوم به په ځواب کې ووايي: آمين!

²⁴د خدای پاک لعنت دې وي په هر هغه چا باندې چې په پټه قتل کوي. ټول قوم به په ځواب کې ووايي: آمين!

²⁵د خدای پاک لعنت دې وي په هر هغه چا باندې چې د يو بې ګناه نفر د قتلولو دپاره پيسې اخلي. ټول قوم به په ځواب کې ووايي: آمين!

²⁶د خدای پاک لعنت دې وي په هر هغه چا باندې چې د هغه د دې ټولو قوانينو اطاعت نه کوي. ټول قوم به په ځواب کې ووايي: آمين!