Read Pashto (Nangahari) — د پښتو مقدس کتاب تثنيه 28 Bible Online

تثنيه 28 - Pashto (Nangahari) — د پښتو مقدس کتاب bible

تثنيه 28

¹که چېرې تاسو په وفادارۍ سره د خپل څښتن خدای اطاعت وکړئ او د هغه د ټولو امرونو څخه چې زه يې نن درکوم پيروي وکړئ، هغه به ستاسو قوم د دنيا د نورو ټولو قومونو څخه لوی کړي.

²د خپل څښتن خدای اطاعت کوئ، نو دا ټول برکتونه به ستاسو شي:

³څښتن به ستاسو په ښارونو او پټيو کې برکت واچوي.

⁴څښتن به تاسو ته ډېر اولادونه، پرېمانه فصلونه او ډېرې پادې او رمې درکړي.

⁵څښتن به ستاسو د غلو دانو په فصلونو او په هغو خواړو کې برکت واچوي چې تاسو يې د هغو فصلونو څخه تياروئ.

⁶څښتن به ستاسو په هر کار کې برکت واچوي.

⁷کله چې ستاسو دښمنان په تاسو باندې حمله کوي، څښتن به ستاسو سره مرسته وکړي چې هغوی ته ماتې ورکړئ. هغوی به د يوې لارې څخه حمله کوي، مګر هرې خواته به ستاسو څخه تښتي.

⁸ستاسو څښتن خدای به ستاسو په هر کار کې برکت واچوي او ستاسو ګودامونه به د غلو دانو څخه ډک کړي. هغه به تاسو ته په هغه ځمکه کې چې تاسو ته يې درکوي برکت درکړي.

⁹که چېرې تاسو د خپل څښتن خدای اطاعت وکړئ او د هغه هر امر په ځای کړئ، هغه به د خپلې وعدې سره سم ستاسو څخه خپل خاص قوم جوړ کړي.

¹⁰بيا به د دنيا ټول قومونه وويني چې څښتن تاسو د خپل قوم په توګه انتخاب کړي ياست او هغوی به ستاسو څخه ووېريږي.

¹¹څښتن به تاسو ته ډېر اولادونه، ډېر حيوانات او پرېمانه فصلونه په هغې خاوره کې درکړي چې ستاسو د نيکونو سره يې وعده کړې وه چې تاسو ته به يې درکړي.

¹²هغه به په صحيح وخت د خپلو غني آسماني زېرمو څخه په تاسو باران اوروي او ستاسو په ټولو کارونو کې به برکت واچوي ترڅو تاسو ډېرو قومونو ته قرض ورکړئ، مګر د هيڅ قوم څخه به څه شی په قرض نه اخلئ.

¹³که چېرې تاسو د څښتن هغو ټولو امرونو ته چې زه يې نن درکوم په وفادارۍ سره غاړه کېږدئ، ستاسو څښتن خدای به ستاسو قوم د نورو قومونو په منځ کې پيرو نه بلکه مشر کړي، تاسو به همېشه بريالي ياست او هيڅکله به نه ناکامېږئ.

¹⁴مګر تاسو بايد هيڅکله او په هيڅ ډول د دغو امرونو څخه سرغړونه ونه کړئ او نه د نورو خدايانو عبادت او خدمت وکړئ.

¹⁵مګر که چېرې تاسو د خپل څښتن خدای نافرماني وکړئ او په وفادارۍ سره د هغه د ټولو فرمانونو او قوانينو څخه چې زه يې نن درکوم پيروي ونه کړئ، دا ټول لعنتونه به په تاسو باندې راشي:

¹⁶څښتن به ستاسو په ښارونو او پټيو باندې لعنت ووايي.

¹⁷څښتن به ستاسو د غلو دانو په فصلونو او په هغو خواړو باندې لعنت ووايي چې تاسو يې ورڅخه تياروئ.

¹⁸څښتن به تاسو ته د لږو اولادونو، خرابو فصلونو او لږو پادو او رمو په درکولو سره په تاسو باندې لعنت ووايي.

¹⁹څښتن به ستاسو په هر کار باندې لعنت ووايي.

²⁰که چېرې تاسو بد کارونه وکړئ او څښتن رد کړئ، هغه به تر هغه وخته پورې ستاسو په هر کار کې آفت، وارخطايي او تکليف رامنځته کوي ترڅو تاسو ژر او په بشپړه توګه تباه شئ.

²¹هغه به تر هغه وخته پورې تاسو په پرله پسې ناروغيو باندې اخته کوي ترڅو ستاسو څخه هيڅوک په هغې خاورې کې پاتې نشي چې تاسو به يې ژر ونيسئ.

²²څښتن به تاسو په ساري ناروغيو، پړسوب او تبې باندې اخته کړي. هغه به وچکالي او چڼاسکې رامنځته کړي او سوزوونکي بادونه به رانازل کړي چې ستاسو فصلونه له منځه يوسي. دا آفتونه به په تاسو باندې تر هغه وخته پورې وي ترڅو مړه شئ.

²³باران به هيڅ نه اوريږي او ستاسو ځمکه به د اوسپنې په شان کلکه شي.

²⁴د باران په ځای به څښتن د ګردونو او شګو طوفانونه تر هغه وخته پورې په تاسو باندې نازلوي ترڅو تاسو تباه شئ.

²⁵څښتن به ستاسو دښمنانو ته په تاسو باندې بری ورکړي. تاسو به د يوې لارې څخه په هغوی باندې حمله کوئ، مګر د هغوی څخه به هرې خواته تښتئ او کله چې د دنيا ټول خلک دا پېښې وويني چې په تاسو باندې تېريږي، نو هغوی به سخت ووېريږي.

²⁶کله چې تاسو مړه شئ، مرغان او وحشي حيوانات به راځي او ستاسو مړي به خوري او هيڅوک به نه وي چې هغوی وشړي.

²⁷څښتن به په تاسو باندې دانې راوخېژوي لکه څنګه چې هغه په مصريانو باندې راخېژولې وې. هغه به ستاسو په بدنونو باندې زخمونه راپيدا کړي. تاسو به د داغونو څخه ډک شئ او خارښت به درباندې ولګيږي، مګر هيڅ علاج به يې نه وي.

²⁸څښتن به تاسو لېوني کړي، هغه به تاسو ړانده او وارخطا کړي.

²⁹تاسو به په رڼا ورځ د ړانده په شان لاس او پښې وهئ او خپله لاره به نشئ پيدا کولی. په خپل هيڅ کار کې به نه کاميابېږئ. په تاسو باندې به همېشه ظلم کيږي او لوټل کېږئ به او هيڅوک به نه وي چې مرسته درسره وکړي.

³⁰تاسو به د يوې پېغلې سره کوژدن کوئ، مګر بل څوک به په زور د هغې سره څملي. تاسو به کور جوړوئ، مګر هيڅکله به په کې ونه اوسېږئ. تاسو به د انګورو باغ جوړوئ، مګر هيڅکله به د هغه انګور ونه خورئ.

³¹ستاسو غوايان به ستاسو په مخکې حلال کړای شي، مګر تاسو به د هغو غوښه ونه خورئ. خره به مو په زور بيول کيږي او تاسو به ورته ګورئ خو بېرته به تاسو ته نه درکول کيږي. ستاسو دښمنان به ستاسو پسونه بوزي او هيڅوک به نه وي چې مرسته درسره وکړي.

³²ستاسو زامن او لورګانې به ستاسو په مخکې بېګانه خلکو ته د غلامانو په توګه ورکول کيږي. هره ورځ به تاسو خپلې اوښکې تويوئ او بې ځايه به خپلو اولادونو ته سترګې په لاره يئ چې راستانه به شي.

³³يو بېګانه قوم به ستاسو ټول فصلونه چې تاسو په ډېر زحمت سره کرلي دي اخلي خو تاسو به د دوامداره ظلم او بدې رويې څخه پرته هيڅ شی ترلاسه نه کړئ.

³⁴څه چې تاسو وينئ هغه به دومره وېروونکي وي چې تاسو به لېوني شئ.

³⁵څښتن به تاسو ته داسې سزا درکړي چې د سر څخه نيولې تر پښو پورې له دردناکو دانو څخه ډک شئ چې هيڅ علاج به يې نه وي.

³⁶څښتن به تاسو او هغه پادشاه چې تاسو به يې انتخاب کړئ پرېږدي چې يو داسې بېګانه هېواد ته د اسيرانو په توګه يوړل شئ چې نه تاسو او نه ستاسو نيکونو پېژانده. هلته به تاسو د داسې خدايانو عبادت کوئ چې د لرګيو او تيږو څخه جوړ شوي وي.

³⁷په هغو هېوادونو کې چې څښتن به تاسو په کې خپاره کړي، د هغو ځايونو خلک به د دې پېښو په ليدلو سره چې په تاسو باندې تېريږي له وېرې ولړزيږي او په تاسو باندې به ملنډې وهي.

³⁸تاسو به په کافي اندازه تخم وکرئ، مګر لږ حاصل به ورېبئ ځکه چې ملخان به ستاسو فصلونه وخوري.

³⁹تاسو به د انګورو باغونه جوړ کړئ او د هغو ساتنه به وکړئ، مګر انګور به ورڅخه راټول نه کړئ او د هغو شراب به ونه څښئ، ځکه چې تاکونه به چينجي وخوري.

⁴⁰ستاسو په وطن کې به په هرځای کې د زيتونو ونې شنې کيږي، مګر د هغو په تېلو باندې به خپل ځانونه غوړ نه کړئ ځکه چې زيتون به له پخېدلو څخه مخکې راغورزيږي.

⁴¹تاسو به زامن او لورګانې ولرئ، مګر هغوی به له لاسه ورکړئ ځکه چې هغوی به د جنګي اسيرانو په توګه يوړل شي.

⁴²ستاسو ټولې ونې او فصلونه به د ملخانو له خوا له منځه يوړل شي.

⁴³هغه بېګانه خلک چې ستاسو په خاوره کې اوسيږي هغوی به نور هم شتمن او قدرتمند شي، خو تاسو به نور هم غريبان او بې وزلي شئ.

⁴⁴هغوی به پيسې ولري چې تاسو ته يې په قرض درکړي، مګر تاسو به هيڅ شی نه لرئ چې هغوی ته يې په قرض ورکړئ. په آخر کې به هغوی ستاسو مشران شي.

⁴⁵که چېرې تاسو د هغو ټولو قوانينو چې ستاسو څښتن خدای يې درکوي اطاعت ونه کړئ، نو هغه به دا ټول آفتونه په تاسو باندې نازل کړي. دا آفتونه به تر هغه پورې په تاسو باندې وي ترڅو تباه شئ.

⁴⁶دا به د تل دپاره په تاسو او ستاسو په اولادې باندې د څښتن د قضاوت نښه وي.

⁴⁷څښتن تاسو ته په هر لحاظ برکت درکړ، مګر تاسو په خوشاله زړونو د هغه خدمت ونه کړ.

⁴⁸په دې خاطر به څښتن ستاسو دښمنان راولېږي چې په تاسو باندې حمله وکړي او تاسو به د غلامانو په توګه د هغوی خدمت کوئ. تاسو به وږي، تږي، لوڅ او د هر شي دپاره به حاجتمند ياست. څښتن به ستاسو دښمنان دې ته پرېږدي چې په تاسو باندې سخت ظلم وکړي ترڅو مړه شئ.

⁴⁹څښتن به د دنيا د بل سر څخه ستاسو په ضد يو داسې قوم راولي چې تاسو به يې په ژبه نه پوهېږئ. هغوی به د عقاب په شان په تاسو باندې راکوز شي.

⁵⁰هغوی به بې رحمه وي او په هيچا به رحم نه کوي، نه په ځوانانو او نه په زړو خلکو.

⁵¹هغوی به ستاسو حيوانات او فصلونه واخلي او تاسو به له لوږې مړه شئ. هغوی به تاسو ته هيڅ غلې دانې، شراب، د زيتونو تېل، پادې او رمې پرېنږدي او تاسو به مړه شئ.

⁵²هغوی به ټول ښارونه چې په هغه خاوره کې دي چې خپل څښتن خدای يې درکوي محاصره کړي او هغه لوړ او قوي دېوالونه به راوغورزوي چې تاسو ورباندې ډاډه يئ.

⁵³د هغو تکليفونو له امله چې ستاسو دښمنان به يې د محاصرې په وخت کې په تاسو باندې راولي، تاسو به دومره وږي شئ چې حتیٰ خپل اولادونه به چې خپل څښتن خدای درکړي دي هم وخورئ.

⁵⁴۵۴‏-۵۵ حتیٰ ترټولو مهربان او نرم سړی به هم د محاصرې په وخت کې دومره وږی شي چې د نورو خواړو د نشتوالي له کبله به د خپلو اولادونو غوښې وخوري. هغه به خپل ورور يا خپلې ښځې ته چې مينه ورسره کوي او خپلو پاتې اولادونو ته د هغې د ورکولو څخه په کلکه انکار کوي.

⁵⁵

⁵⁶۵۶‏-۵۷ حتیٰ ترټولو مهربانه او نازکه ښځه چې دومره شتمنه وي چې د نازه خپله پښه په ځمکه نه ږدي، هغه به هم همداسې چلند وکړي. کله چې دښمن د هغې ښار محاصره کړي، هغه ښځه به دومره وږې شي چې په پټه به خپل نوی زېږېدلی ماشوم او د هغه پېروان هم وخوري. هغه به خپل مېړه چې ورسره مينه کوي يا خپل نور اولادونه په هغې کې شريک نه کړي.

⁵⁷

⁵⁸که چېرې تاسو د خدای پاک د ټولو قوانينو څخه چې په دې کتاب کې ليکلي دي په وفادارۍ سره اطاعت ونه کړئ او د خپل څښتن خدای د جلالي او هيبتناکه نوم احترام ونه کړئ،

⁵⁹هغه به تاسو او ستاسو اولاده په وېروونکو بلاګانو او داسې خطرناکو ناروغيو اخته کړي چې علاج به يې نه کيږي.

⁶⁰هغه به په تاسو باندې هغه ټول مرضونه راولي چې په مصر کې ورڅخه وېرېدلئ او هيڅکله به روغ نشئ.

⁶¹حتیٰ هغه به تاسو په هر ډول ناروغيو او بلاګانو باندې چې د خدای پاک د قوانينو په دې کتاب کې ورڅخه يادونه نه ده شوې هم اخته کړي او تباه به شئ.

⁶²که څه هم يو وخت ستاسو شمېر د آسمان د ستورو په شان زيات ؤ، مګر ستاسو څخه به يوازې څو تنه ژوندي پاتې شي ځکه چې تاسو د خپل څښتن خدای اطاعت ونه کړ.

⁶³لکه څنګه چې څښتن خوشاله ؤ چې ستاسو سره نېکي وکړي او ستاسو شمېر زيات کړي، همداسې به هغه خوشاله شي چې تاسو له منځه يوسي او تباهي درباندې راولي. تاسو به د هغې خاورې څخه چې ژر به يې ونيسئ بيخي وويستل شئ.

⁶⁴څښتن به تاسو د دنيا د يو سر څخه تر بل سره پورې په ټولو قومونو کې خپاره کړي او هلته به د داسې خدايانو عبادت کوئ چې د لرګيو او تيږو څخه جوړ شوي وي، د داسې خدايانو چې نه تاسو او نه ستاسو نيکونو مخکې د هغو عبادت کړی وي.

⁶⁵تاسو به په هيڅ ځای کې آرامي نه مومئ، همېشه به د کور په ارمان يئ. څښتن به تاسو په اندېښنو، نااميدۍ او مايوسۍ کې غرق کړي.

⁶⁶ستاسو ژوند به همېشه په خطر کې وي. تاسو به شپه او ورځ سخت وېرېږئ او د مرګ په دوامداره وېره کې به ژوند کوئ.

⁶⁷تاسو چې هر شي ته ګورئ زړونه به مو د وېرې له لاسه درزيږي. هر سهار به وايئ، کاشکې شپه وای او هره شپه به وايئ، کاشکې سهار وای.

⁶⁸څښتن به تاسو بېرته په کشتيو کې مصر ته ولېږي که څه هم هغه فرمايلي دي چې تاسو به هيڅکله نه مجبوره کېږئ چې بيا هلته لاړ شئ. هلته به تاسو د دې هڅه کوئ چې خپل ځانونه په خپلو دښمنانو باندې د غلامانو په توګه خرڅ کړئ، مګر هيڅوک به تاسو نه اخلي.“