Read Pashto (Nangahari) — د پښتو مقدس کتاب تثنيه 29 Bible Online

تثنيه 29 - Pashto (Nangahari) — د پښتو مقدس کتاب bible

تثنيه 29

¹دا د هغه لوظ شرايط دي چې څښتن حضرت موسیٰ ته امر کړی ؤ چې د اسرائيلو د خلکو سره يې د موآب په خاوره کې وکړي. دا د هغه لوظ څخه جدا ؤ چې څښتن د هغوی سره د سينا د غره سره کړی ؤ.

²حضرت موسیٰ د اسرائيلو ټول خلک راوغوښتل او ورته ويې فرمايل: ”تاسو په خپله وليدل چې څښتن په مصر کې په فرعون، د هغه په درباريانو او د هغه په ټول هېواد باندې څه وکړل.

³تاسو هغه هيبتناکه بلاګانې، معجزې او هغه عجيبه عجيبه کارونه وليدل چې څښتن کړي ؤو.

⁴مګر تر نن ورځې پورې هغه تاسو دې ته نه يئ پريښي چې په هغه څه باندې پوه شئ چې په تاسو باندې تېر شوي دي.

⁵څښتن څلوېښت کاله تاسو ته په دښته کې لارښودنه وکړه او په دې موده کې ستاسو کالي او څپلۍ هيڅ زاړه نشول.

⁶تاسو د خوراک دپاره ډوډۍ نه درلودله او نه مو د څښاک دپاره شراب يا بير درلودل، مګر څښتن تاسو ته خاص خواړه برابر کړل د دې دپاره چې تاسو په دې باندې پوه شئ چې هغه ستاسو خدای دی.

⁷کله چې مونږ دلته راغلو، د حشبون پادشاه سيحون او د باشان پادشاه عوج په مونږ باندې حمله وکړه. مګر مونږ هغوی ته ماتې ورکړه،

⁸د هغوی خاوره مو ونيوله او هغه مو د روبين او جاد د قبيلو او منسي د نيمې قبيلې ترمنځ ووېشله.

⁹د دې لوظ د ټولو شرايطو څخه په وفادارۍ سره اطاعت وکړئ ترڅو تاسو په خپل هر کار کې بريالي اوسئ.

¹⁰۱۰‏-۱۱ نن تاسو ټول يعنې ستاسو قبيلوي مشران، سپين ږيري او ماموران، ستاسو نارينه، ښځې او ماشومان او هغه بېګانه خلک چې ستاسو په منځ کې اوسيږي او ستاسو دپاره لرګي ماتوي او اوبه درته راوړي د خپل څښتن خدای په حضور کې ولاړ ياست.

¹²تاسو نن دلته د دې دپاره ولاړ ياست چې په هغه لوظ کې شامل شئ چې خپل څښتن خدای يې ستاسو سره کوي او د هغه شرايط قبول کړئ.

¹³۱۳‏-۱۵ په دې لوظ کې څښتن دا وعده کړې ده چې تاسو به د هغه قوم يئ او هغه به ستاسو خدای وي. دا وعده هغه اول ستاسو د نيکونو يعنې حضرت ابراهيم، حضرت اسحاق او حضرت يعقوب سره کړې وه او هماغه وعده نن ستاسو سره کوي. خو دا يوازې ستاسو سره نه بلکه ستاسو د اولادې سره يې هم کوي.

¹⁶ستاسو په ياد دي چې په مصر کې مو څنګه ژوند کاوه او څنګه د نورو قومونو د سيمې په لاره باندې تېر شولو.

¹⁷تاسو د هغوی د کرکې وړ بتان وليدل چې د لرګيو، تيږو، سپينو او سرو زرو څخه جوړ شوي ؤو.

¹⁸پام کوئ چې هيڅ سړی، ښځه، کورنۍ يا قبيله چې نن دلته ولاړ دي زمونږ د څښتن خدای څخه به مخ نه اړوي او نه به د نورو قومونو د خدايانو عبادت کوي. که چېرې ستاسو څخه کوم يو د بتانو عبادت کوي هغه به د داسې بوټي په شان وي چې ترخه او زهرجنه مېوه نيسي.

¹⁹ګورئ چې نن بايد دلته داسې څوک نه وي چې د دې لوظ خبرې واوري او بياهم خپل ځان ته دا ډاډګيرنه ورکړي چې حتیٰ که چېرې هغه په سرزورۍ سره هم په خپله لاره لاړ شي، د هغه هر کار به په ښه ډول پرمخ ځي. داسې کار به تاسو ټول ښه او بد يوشان تباه کړي.

²⁰څښتن به داسې سړی ونه بخښي، بلکه د هغه په ضد به د هغه قهر او غضب راوپاريږي او هغه ټول آفتونه به چې په دې کتاب کې ليکل شوي دي په هغه باندې نازليږي ترڅو څښتن د هغه نوم او نښان د ځمکې له مخ څخه ورک کړي.

²¹څښتن به د اسرائيلو ټولو قبيلو ته هغه يو عبرت وګرځوي او د هغو ټولو لعنتونو سره سم به په هغه باندې آفت نازل کړي کوم چې په هغه لوظ کې شامل دي چې د څښتن د شريعت په دې کتاب کې ليکل شوی دی.

²²۲۲‏-۲۳ څښتن به ستاسو هېواد په مرضونو او آفتونو باندې ووهي. ستاسو اولاده او د لېرې هېوادونو بېګانه خلک به وويني چې ستاسو خاوره د مالګې او ګوګړو په يوه سوزوونکې دښتې بدله شوې ده چې هلته نه څه کرل کيږي، نه به تېغونه وهي او نه به په کې څه راشنه کيږي. ستاسو ځمکه به د سدوم، عموره، ادمه او صبوئيم د ښارونو په شان وي چې کله څښتن سخت په قهر شو او هغه يې له منځه يوړل.

²⁴بيا به د ټولې دنيا خلک داسې پوښتنې کوي: څښتن ولې د هغوی په هېواد باندې داسې وکړل؟ د دې سخت غضب دليل څه دی؟

²⁵او ځواب به داسې وي: دا ځکه چې دې خلکو د خپلو نيکونو د څښتن خدای لوظ مات کړی دی، هغه لوظ چې څښتن د هغوی سره هغه وخت کړی ؤ چې کله يې هغوی له مصر څخه راوويستل.

²⁶هغوی د نورو خدايانو عبادت کاوه چې مخکې يې هيڅکله نه ؤ کړی او څښتن د هغو عبادت منع کړی ؤ.

²⁷نو څښتن په خپل قوم باندې په قهر شو او د هغوی په خاوره باندې يې هغه ټول آفتونه نازل کړل چې په دې کتاب کې ليکل شوي دي.

²⁸څښتن سخت په قهر شو او د خپل سخت قهر په وخت کې يې هغوی د خپلې خاورې څخه وويستل او پردۍ خاورې ته يې وشړل او هغوی اوس هم هلته دي.

²⁹ځينې داسې خبرې شته چې زمونږ څښتن خدای زمونږ څخه پټې ساتلې دي، مګر هغه خپل شريعت راته ښکاره کړی دی او مونږ او زمونږ اولاده بايد د تل دپاره د هغه شريعت اطاعت وکړو.