Read Pashto (Nangahari) — د پښتو مقدس کتاب تثنيه 30 Bible Online

تثنيه 30 - Pashto (Nangahari) — د پښتو مقدس کتاب bible

تثنيه 30

¹تاسو ته مې اوس د برکت او لعنت د انتخابولو حق درکړی دی. کله چې په تاسو باندې دا ټولې پېښې وشي او تاسو د هغو قومونو په منځ کې ژوند وکړئ چې خپل څښتن خدای هلته شړلي ياست، نو زما هغه خبره به در په ياده شي.

²که چېرې تاسو او ستاسو اولاده بېرته څښتن ته رجوع وکړئ او د زړه له کومي د هغه د ټولو امرونو چې نن يې درکوم اطاعت وکړئ،

³بيا به خپل څښتن خدای په تاسو باندې رحم وکړي. هغه به تاسو د هغو قومونو څخه چې تاسو يې په کې خپاره کړي ياست بېرته راولي او بېرته به مو خوشبخته کړي.

⁴حتیٰ که تاسو د دنيا په بل سر کې هم اوسئ، ستاسو څښتن خدای به تاسو راپيدا کړي او بېرته به مو راولي،

⁵ترڅو ستاسو اولاده بيا هغه خاوره ترلاسه کړي چې يو وخت د هغوی نيکونه په کې اوسېدل. هغه به ستاسو اولاده د خپلو نيکونو څخه نوره هم خوشبخته او زياته کړي.

⁶تاسو او ستاسو اولادې ته به خپل څښتن خدای منونکي زړونه درکړي ترڅو د زړه له کومي د هغه سره مينه وکړئ او په هغه خاوره کې خپل ژوند وکړئ.

⁷هغه به دا ټول لعنتونه ستاسو په دښمنانو باندې چې ستاسو څخه يې کرکه کوله او تاسو يې ځورولئ راولي

⁸او تاسو به بيا د څښتن او د هغه د ټولو امرونو اطاعت کوئ چې زه يې نن درکوم.

⁹څښتن به تاسو ته په خپلو ټولو کارونو کې زيات برياليتوبونه درکړي. تاسو به ډېر اولادونه او حيوانات لرئ او ستاسو پټي به پرېمانه فصلونه کوي. هغه به ستاسو په خوشبخته کولو باندې هماغسې خوشاله وي لکه څنګه چې ستاسو د نيکونو په خوشبخته کولو باندې خوشاله ؤ،

¹⁰مګر تاسو به مجبور يئ چې د څښتن اطاعت وکړئ او د هغو ټولو قوانينو څخه پيروي وکړئ چې په دې کتاب کې ليکل شوي دي. تاسو به مجبور يئ چې د زړه له کومي هغه ته رجوع وکړئ.

¹¹هغه امرونه چې نن يې تاسو ته درکوم په هغو باندې پوهېدل او عمل کول ډېر سخت کار نه دی.

¹²هغه امرونه پورته په آسمان کې نه دي ترڅو تاسو دې ته مجبور شئ چې داسې پوښتنه وکړئ: څوک به پورته وخېژي چې هغه مونږ ته لاندې راوړي ترڅو هغه واورو او عمل ورباندې وکړو؟

¹³نه هغه د درياب په بلې غاړې باندې دي ترڅو دې ته مجبور شئ چې داسې پوښتنه وکړئ: څوک به د درياب څخه تېر شي چې هغه مونږ ته راوړي ترڅو هغه واورو او عمل ورباندې وکړو؟

¹⁴نه، هغه دلته ستاسو سره دي. په هغو باندې پوهېږئ او هغه ويلی شئ، نو تاسو بايد ورباندې عمل وکړئ.

¹⁵نن زه تاسو ته د خوشبختۍ او بدبختۍ او ژوند او مرګ د انتخابولو حق درکوم.

¹⁶که چېرې تاسو د خپل څښتن خدای امرونو ته چې زه يې نن درکوم غاړه کېږدئ، که چېرې د هغه سره مينه وکړئ، اطاعت يې وکړئ او د هغه د ټولو قوانينو څخه پيروي وکړئ، بيا به تاسو خوشبخته شئ او يو لوی قوم به درڅخه جوړ شي. تاسو ته به خپل څښتن خدای په هغه خاوره کې چې تاسو به يې ژر ونيسئ برکت درکړي.

¹⁷مګر که چېرې سرغړونه وکړئ او غوږ ورته ونه نيسئ او نور خلک تاسو بې لارې کړي او د نورو خدايانو عبادت وکړئ،

¹⁸نو تاسو به تباه شئ. زه تاسو ته اوس همدلته خبرداری درکوم. تاسو به په هغه خاوره کې چې د اردن د سيند په بلې غاړې باندې پرته ده او ژر به يې ونيسئ ډېره موده ژوند ونه کړئ.

¹⁹زه اوس تاسو ته د ژوند او مرګ، د خدای پاک د برکت او لعنت د انتخابولو حق درکوم او زه آسمان او ځمکه د دې خبرې دپاره شاهدان نيسم چې تاسو کوم شی انتخابوئ. تاسو ژوند انتخاب کړئ ترڅو تاسو او ستاسو اولاده ژوندي پاتې شئ.

²⁰خپل څښتن خدای ته پوره وفادار اوسئ، د هغه سره مينه کوئ او څه چې درته فرمايي هغه کوئ. يوازې څښتن دی چې ژوندون ورکولی شي. هغه به تاسو ته په هغه خاوره کې چې ستاسو د نيکونو حضرت ابراهيم، حضرت اسحاق او حضرت يعقوب سره يې وعده کړې ده زيات عمر درکړي.“