Read Pashto (Nangahari) — د پښتو مقدس کتاب تثنيه 31 Bible Online

تثنيه 31 - Pashto (Nangahari) — د پښتو مقدس کتاب bible

تثنيه 31

¹حضرت موسیٰ د اسرائيلو د قوم سره خپلو خبرو ته دوام ورکړ

²او ويې فرمايل: ”زه اوس د يوسلو شل کالو په عمر يم او نور د دې توان نه لرم چې ستاسو مشري وکړم او څښتن ماته فرمايلي دي چې ته به د اردن له سيند څخه تېر نشې.

³ستاسو څښتن خدای به په خپله ستاسو په مخ کې روان وي او هغه قومونه به چې هلته اوسيږي له منځه يوسي، ترڅو تاسو د هغوی خاوره ونيسئ. لکه څنګه چې څښتن فرمايلي دي يوشع به ستاسو مشر وي.

⁴څښتن به هغه خلک داسې له منځه يوسي لکه څنګه چې هغه د اموريانو پادشاهانو سيحون او عوج ته ماتې ورکړه او د هغوی هېواد يې وران کړ.

⁵څښتن به تاسو ته په هغوی باندې بری درکړي او تاسو بايد د هغوی سره هماغه شان عمل وکړئ لکه څنګه چې ما درته ويلي دي.

⁶قوي او زړور اوسئ. د هغوی څخه مه وېرېږئ. ستاسو څښتن خدای به همېشه ستاسو سره وي او تاسو به هيڅکله يوازې نه پرېږدي.“

⁷بيا حضرت موسیٰ يوشع راوغوښت او د اسرائيلو د ټول قوم په حضور کې يې ورته وفرمايل: ”قوي او زړور اوسه. د هغې خاورې په نيولو کې به ته د دغو خلکو مشري کوې چې څښتن يې د هغوی د نيکونو سره وعده کړې ده.

⁸څښتن به په خپله تاته لارښودنه کوي او درسره مل به وي. هغه به ستا سره مرسته کوي او تا به يوازې نه پرېږدي. نو جرأت له لاسه مه ورکوه او وېرېږه مه.“

⁹نو حضرت موسیٰ د شريعت حکمونه وليکل او هغو لاوي کاهنانو ته چې د څښتن د لوظ صندوق يې انتقالاوه او د اسرائيلو ټولو مشرانو ته يې ورکړل.

¹⁰حضرت موسیٰ هغوی ته داسې امر وکړ: ”د هر اووم کال په آخر کې يعنې کله چې د قرضونو د بخښلو کال راځي هغه د جونګړو په اختر کې په لوړ آواز لولئ.

¹¹دا په هغه وخت کې د اسرائيلو قوم ته لولئ کله چې هغوی د څښتن خدای د عبادت دپاره هغه ځای ته راځي چې هغه يې انتخابوي.

¹²ټول سړي، ښځې او ماشومان او هغه بېګانه خلک چې ستاسو په ښارونو کې اوسيږي راوغواړئ، ترڅو هرڅوک هغه واوري او د خپل څښتن خدای احترام کول زده کړي او په وفادارۍ سره د هغه د ټولو قوانينو څخه پيروي وکړي.

¹³په دې ډول به ستاسو اولاده چې د خپل څښتن خدای شريعت يې نه دی اورېدلی واوري. نو هغوی به ټول ژوند په هغه خاوره کې چې تاسو به يې ژر د اردن د سيند په بله غاړه ونيسئ د څښتن اطاعت کول زده کړي.“

¹⁴بيا څښتن حضرت موسیٰ ته وفرمايل: ”ستا د مړينې وخت رانژدې شوی دی. يوشع راوغواړه او مقدسې خېمې ته يې راوله ترڅو هغه د اسرائيلو مشر وټاکم.“ حضرت موسیٰ او يوشع خېمې ته لاړل

¹⁵او څښتن هغوی ته هلته په يوې ورېځې کې چې د خېمې د دروازې په سر باندې ولاړه وه ښکاره شو.

¹⁶څښتن حضرت موسیٰ ته وفرمايل: ”ته به ژر مړ شې او ستا د مړينې څخه وروسته به خلک زما سره بې وفايي وکړي او هغه لوظ به مات کړي چې ما د هغوی سره کړی دی. هغوی به ما پرېږدي او په هغه هېواد کې به چې هغوی ورداخليږي د پرديو خدايانو عبادت کوي.

¹⁷کله چې داسې وشي نو زه به په هغوی باندې په قهر شم، د هغوی څخه به مخ واړوم او هغوی به تباه شي. ډېر هيبتناکه آفتونه به په هغوی باندې نازل شي او هغوی به په دې پوه شي چې دا پېښې ځکه ورباندې راځي چې زه يعنې د هغوی خدای نور د هغوی سره نه يم.

¹⁸په هغه وخت کې به زه د هغوی سره د مرستې کولو څخه انکار وکړم ځکه چې هغوی بد کار کړی دی او د نورو خدايانو عبادت يې کړی دی.

¹⁹موسیٰ او يوشع، اوس دا روحاني سندره وليکئ. موسیٰ، هغه اسرائيليانو ته ورزده کړه. که چېرې هغوی دا سندره زده کړه نو هغوی به پوه شي چې زه ورڅخه څه غواړم چې ويې کړي او هغوی سره به کومه بهانه نه وي چې زما د امر څخه سرغړونه وکړي.

²⁰لکه څنګه چې مې د هغوی د نيکونو سره وعده کړې ده، زه به هغوی دې غني او حاصلخېزې ځمکې ته بوزم. څومره خواړه چې هغوی غواړي هلته به ورته ورسيږي او هغوی به آرام ژوند لري. مګر هغوی به زما څخه مخ واړوي او د نورو خدايانو عبادت به کوي. هغوی به زما څخه منکر شي او زما لوظ به مات کړي

²¹او ډېر هيبتناکه آفتونه به ورباندې نازل شي. مګر بياهم دا سندره به ويل کيږي او دا به د هغوی په ضد يوه نښه وي. حتیٰ اوس، مخکې له دې چې زه هغوی هغه هېواد ته بوزم چې ما يې د ورکولو وعده ورسره کړې ده، زه پوهېږم چې هغوی څه پلان سنجوي.“

²²په هماغه ورځ حضرت موسیٰ سندره وليکله او د اسرائيلو قوم ته يې ورزده کړله.

²³بيا څښتن د نون زوی يوشع مشر وټاکه او ورته ويې فرمايل: ”قوي او زړور اوسه. ته به د اسرائيلو قوم هغه هېواد ته بوزې چې ما يې د هغوی سره وعده کړې ده او زه به ستا سره مل يم.“

²⁴حضرت موسیٰ د شريعت حکمونه په کتاب کې وليکل او پام يې کاوه چې څه شی ورڅخه پاتې نشي.

²⁵کله چې هغه وزګار شو، هغه هغو لاوي کاهنانو ته چې د څښتن د لوظ صندوق يې انتقالاوه داسې وفرمايل:

²⁶”د شريعت دا کتاب يوسئ او د خپل څښتن خدای د لوظ د صندوق په څنګ کې يې کېږدئ. دا کتاب به د دې خبرې يو ثبوت وي چې تاسو پوهېږئ چې څښتن ستاسو څخه څه غواړي چې ويې کړئ.

²⁷زه په دې پوهېږم چې هغوی څومره سرزوري او سرکش خلک دي. هغوی زما د ژوندانه په دوران کې د څښتن په مقابل کې سرکشي کړې ده او زما د مړينې څخه وروسته به نور هم سرکش شي.

²⁸خپل ټول قبيلوي مشران او ماموران زما په مخکې راغونډ کړئ ترڅو هغوی ته دا خبرې وکړم. زه به آسمان او ځمکه د اسرائيلو د قوم په مقابل کې خپل شاهدان ونيسم.

²⁹زه په دې پوهېږم چې زما د مرګ څخه وروسته به قوم بيخي فاسد شي او د هغې لارې څخه به چې ما ورته حکم کړی دی وګرځي. د وخت په تېرېدو سره به هغوی د آفت سره مخامخ شي ځکه چې هغوی به څښتن د هغو کارونو په سبب کوم چې هغه منع کړي دي په قهر کړي.“

³⁰بيا حضرت موسیٰ ټوله سندره وويله او د اسرائيلو ټول قوم ورته غوږ نيولی ؤ.