Read Pashto (Nangahari) — د پښتو مقدس کتاب تثنيه 32 Bible Online

تثنيه 32 - Pashto (Nangahari) — د پښتو مقدس کتاب bible

تثنيه 32

¹ای ځمکې او آسمانه زما خبرې واورئ واورئ په غور سره چې زه څه وايم

²زما تعليم دې راپرېوزي لکه څاڅکو د باران په شان او په ځمکه دې راپرېوزي لکه د پرخې په شان د باران په شان دې اوري زما خبرې په تنکيو بوټو باندې د نري باران په شان دې رااوريږي په تنکيو واښو باندې

³زه به کړمه د څښتن د نوم ستاينه او خپل قوم دې يې لويي بيانوي

⁴څښتن دی د غښتلي ګټ په شان ټول کارونه يې کامل دي او عادل دي ستاسو خدای دی وفادار او دی رښتينی کړي کارونه دی صحيح او باانصافه

⁵مګر تاسو بې وفا يئ او د دغې لايق نه يئ چې قوم د هغه اوسئ ستاسو قوم ګناهکار او چلباز قوم دی

⁶ای احمقانو بې شعوره خلکو آيا دا لار ده چې څښتن سره کوئ دا رويه؟ ستاسو پلار دی او هغه ستاسو خالق دی دی جوړ کړی هغه ستاسو څخه قوم

⁷د تېر شوي وخت په هکله فکر وکړئ هغه وخت چې دی تېر شوی ډېر پخوا د خپل مور او پلار نه وکړئ تپوسونه چې څه وشول د تېر وخت په هکله وکړئ تپوسونه له سپين ږيرو

⁸قومونو ته ورکړې خدای تعالیٰ دي خپلې ځمکې د قومونو د هستوګنې په خاطر هغه ټاکلي دي ځايونه هر يو قوم ته يې مقررې کړې ساتونکې فرښتې

⁹خو خپل ځان ته يې انتخاب کړه اولاده د يعقوب

¹⁰هغه وموندل په دښته کې هغوی چې سرګردانه ګرځېدل يوه خوشې او يوه داسې صحرا چې زيات بادونه لري ده ساتنه د هغو کړه او په هغوی يې پام کاوه لکه د خپلو سترګو د کسيو په شان

¹¹څښتن دی لکه عقاب چې خپله ځاله ساتي او الوتل کوي په سر باندې د خپلو بچو همېشه څښتن تيار دی چې خپاره کړي خپل وزرونه او چې راونيسي خپل خلک چې کله لويږي هغوی

¹²په سفر کې د خپل قوم مشري وکړله څښتن خپله يوازې مرسته نه وه د هغه سره د بل خدای

¹³څښتن پرېښودل هغوی چې حکومت وکړي د کنعان په لوړو ځمکو باندې او څه چې پټيو کې شنه کېدل دوی به خوړل هغه هغوی ته د ګټونو منځ کې شات ورکړل د زيتون ونې يې شوې شنې په ډبرينه ځمکه

¹⁴د هغوی غواوو او وزو به ورکولې شيدې او مستې هغوی لرل ډېر ښه پسونه او وزې او پادې او هغوی لرل ډېر ښه غنم او شراب

¹⁵د څښتن قوم شتمن شو خو ياغي شو هغوی چاغ ؤو او ډوډۍ يې ډېره خوړله هغوی مخ واړاوه له خپل خالقه خدايه او هغوی خپل قوي نجات ورکوونکی رد کړ

¹⁶بت پرستۍ د هغوی څښتن کړ په غضب په خپلو بدو عملونو يې هغه کړ په قهر

¹⁷هغوی وړاندې قربانۍ کړې شيطانانو ته خوشې خدايانو ته چې هيڅکله يې کومک ورسره نه دی کړی هغو نويو خدايانو ته چې هيڅکله يې نيکونو عبادت د هغو نه ؤ کړی

¹⁸هغوی هېر کړلو خپل خدای خپل قوي نجات ورکوونکی هغه څوک چا چې ژوند ورکړی دوی ته

¹⁹چې څښتن کله دا وليدل په قهر شو او کړل رد يې خپل زامن او خپلې لوڼې

²⁰هغه وويل زه نور نه کومه مرسته د هغوی بيا به وګورم څه کيږي په دې قوم چې سرزوری بې وفا دی

²¹هغوی زما قهر د خپلو بتانو په سبب راپارولی دی زما غيرت يې د خپل تش په نامه خدايانو په سبب راپارولی دی هغه داسې خدايان دي چې رښتيني خدايان نه دي نو زه به کار واخلم د يو تش په نامه قوم څخه چې يې په قهر کړم زه به غيرت د دوی راوپاروم د احمقانو په قوم

²²زما قهر به د اور په شان لمبې ووهي او فصلونه به په ځمکه باندې وسوزوي هغه به ورسيږي د مړو دنيا ته او د غرونو تهدابونه به وسوزوي

²³نه ختمېدونکي آفتونه به نازل کړم په هغوی باندې او خپل ټول غشي به ګوزار کړم په هغوی باندې

²⁴له لوږې او تبې به هغوی مړه شي د هيبتناکو ناروغيو له کبله به هغوی مړه شي زه به نازل کړمه وحشي حيوانات چې حمله وکاندي هغوی باندې او زه به نازل کړم زهرجن ماران چې هغوی وچيچي

²⁵په سبب د جنګ به مړي وي پراته کوڅو کې او په کورونو به راپرېوزي وحشت پېغلې او ځوانان به مړه شي نه به کوچنيان پاتې شي نه به سپين ږيري

²⁶ما به بيخي وای تباه کړي هغوی ترڅو چې پاتې نه وای د هيچا ياد کې هغوی

²⁷خو زه له دې نه وېرېدم چې دښمنان به د هغوی وايي چې هغوی ماتې ورکړې زما قوم ته خو دا زه وم چې په خپله مې هغوی ته ماتې ورکړه

²⁸اسرائيل يو بې شعوره قوم دی هيڅ عقل نشته دوی کې

²⁹په دې نه پوهيږي دوی چې ولې ماتې وخوړله په دې نه پوهيږي دوی چې څه ورپېښ شول

³⁰د اسرائيلو زرو تنو ولې ماتې وخوړله د دښمن د يوه تن له لاسه او لسو زرو وخوړله ماتې له دوه تنو؟ خپل څښتن خدای له هغوی څخه خپل مخ ؤ اړولی هغوی خپل قوي خدای ؤو پريښي

³¹دښمنان د دوی پوهيږي چې د هغوی خپل خدايان کمزوري دي او د اسرائيلو د خدای په شان قوي نه دي

³²د سدوم او عموره په شان فاسد دي د هغوی دښمنان هغوی دي په شان د هغو تاکونو چې زهرجن او ترخه انګور نيسي

³³داسې شرابو په شان چې وي جوړ شوي د چمچه مار له زهرو

³⁴دا د څښتن په ياد دي چې دښمنانو د هغوی څه وکړل هغه کوي انتظار صحيح موقعې ته چې سزا ورکړي ورته

³⁵څښتن به واخلي بدله له هغوی او سزا به ورکړي ورته وخت به راشي د هغوی د پرزېدلو د هغوی د تباهۍ ورځ رانژدې ده

³⁶چې کله وويني څښتن چې قوت د ده د قوم له منځه تللی نو د هغوی سره به وکړي انصاف کله چې وويني څښتن چې هغوی څومره بې وزلي دي هغه به وکړي دلسوزي په هغو خلکو چې خدمت د هغه کاندي

³⁷بيا به څښتن وکړي پوښتنه داسې له خپله قومه څخه چېرته دي هغه غښتلي خدايان چې مو باور پرې درلود؟

³⁸تاسو هغوی ته ورکوله د خوراک دپاره د خپلو قربانيو وازګه او د څښاک دپاره مو شراب ورکول اوس پرېږدئ چې دوی راشي او کومک درسره وکړي او راشي چې ساتنه ستاسو وکړي

³⁹آيا دا نه پوهېږئ؟ يوازينی خدای يم زه چې بل خدای نشته مرګ او ژوند زما په لاس کې دی ټپي کول او روغول زما په لاس کې دي او نشي کولی هيڅوک مخالفت زما د کار سره

⁴⁰لکه څنګه چې زه يمه تل ژوندی خدای زه خپل لاس پورته کوم او دا وعده کومه

⁴¹زه به تېره کړمه خپله ځلانده توره او زه به انصاف وکړم زه به له خپلو دښمنانو څخه واخلم بدل او هغو خلکو ته به ورکړمه سزا څوک چې کرکه کړي له ما

⁴²وبه څڅيږي د دوی وينه زما د غشو څخه او وبه وژني زما توره هغه خلک چې زما مخالفت کړي زه به ټول اسيران مړه کړم او زه به پرې کړمه سرونه د دښمنانو د مشرانو

⁴³ای آسمانونو! خوشالي وکړئ د څښتن د قوم سره ټولو خدايانو! د څښتن په مخکې وکړئ سجده هغه له خپلو دښمنانو څخه اخلي بدل چا چې وژلی دی قوم د هغه او پاکوي د خپل قوم ځمکه د هغې ناپاکۍ څخه چې پيدا شوې په سبب د ګناهونو د دوی

⁴⁴۴۴‏-۴۵ حضرت موسیٰ دا سندره وويله ترڅو د اسرائيلو خلک يې واوري او يوشع ورسره مرسته وکړه. کله چې حضرت موسیٰ وزګار شو،

⁴⁵

⁴⁶هغه وفرمايل: ”تاسو به هرو مرو د دغو ټولو امرونو اطاعت کوئ چې نن ما درکړي دي. دا خپلو اولادونو ته تکراروئ ترڅو هغوی په وفادارۍ سره د خدای پاک ټولو تعليمونو ته غاړه کېږدي.

⁴⁷دا تعليم تشې خبرې نه دي بلکه ستاسو ژوند دی. د هغه په وسيله کولی شئ چې په هغه خاوره کې ډېره موده ژوند وکړئ چې د اردن د سيند په بلې غاړې باندې پرته ده او تاسو به يې ژر ونيسئ.“

⁴⁸په هماغه ورځ څښتن حضرت موسیٰ ته وفرمايل:

⁴⁹”د عباريم غرونو ته چې د اريحا ښار ته مخامخ د موآب په خاوره کې دي لاړ شه. د نبو غره ته وروخېژه او د کنعان خاورې ته وګوره چې زه به يې ژر د اسرائيلو قوم ته ورکړم.

⁵⁰ته به په هغه غره باندې مړ شې لکه څنګه چې ستا ورور هارون د هور په غره باندې مړ شو.

⁵¹ځکه چې تاسو دواړو زما سره د اسرائيلو د قوم په حضور کې د مريبه د چينې سره د صين په دښته کې چې د قادش ښار ته نژدې ده بې وفايي وکړه. زه خدای يم، خو تاسو هلته د اسرائيليانو په مخکې زما سره داسې د عزت او احترام له مخې رويه ونه کړه چې زه يې لايق يم.

⁵²ته به هغه خاوره چې زه يې د اسرائيلو قوم ته ورکوم د يو لېرې ځای څخه ووينې، مګر هغې ته به ورداخل نشې.“