Read Pashto (Nangahari) — د پښتو مقدس کتاب تثنيه 4 Bible Online

تثنيه 4 - Pashto (Nangahari) — د پښتو مقدس کتاب bible

تثنيه 4

¹بيا حضرت موسیٰ قوم ته وفرمايل: ”د هغو ټولو قوانينو اطاعت وکړئ چې زه يې تاسو ته درزده کوم ترڅو تاسو ژوندي پاتې شئ او هغې ځمکې ته به ورداخل شئ او وبه يې نيسئ چې ستاسو د نيکونو څښتن خدای يې درکوي.

²زما امرونو ته هيڅ شی ورزيات او هيڅ شی ورڅخه کم نه کړئ. د خپل څښتن خدای د امرونو څخه چې ما درکړي دي اطاعت وکړئ.

³تاسو په خپله وليدل چې څښتن د فغور غره ته نژدې څه وکړل. څښتن هغه ټول خلک له منځه يوړل چې هلته يې د بعل عبادت کاوه،

⁴مګر له تاسو څخه چې څوک ستاسو څښتن خدای ته وفادار ؤو، هغوی تر نن ورځې پورې ژوندي دي.

⁵ما د خپل څښتن خدای د وينا سره سم تاسو ته ټول قوانين درزده کړي دي. د هغو اطاعت په هغه خاوره کې کوئ چې تاسو به ورداخل شئ او هغه به ونيسئ.

⁶په وفادارۍ سره د هغو اطاعت وکړئ، نو دا کار به نورو قومونو ته دا خبره په ډاګه کړي چې تاسو څومره پوه خلک يئ. کله چې هغوی د دغو ټولو قوانينو په هکله واوري، داسې به وايي: دا لوی قوم څومره حکمت او پوهه لري!

⁷بل هيڅ قوم چې هرڅومره لوی وي داسې خدای نه لري چې هغوی ته د ضرورت په وخت کې دومره نژدې وي لکه څنګه چې مونږ ته خپل څښتن خدای نژدې دی. هرکله چې مونږ د مرستې دپاره سوال وکړو، هغه يې قبلوي.

⁸بل هيڅ قوم چې هرڅومره لوی وي داسې عادلانه قوانين نه لري لکه کوم چې ما تاسو ته نن درزده کړي دي.

⁹۹‏-۱۰ ډېر پام کوئ ترڅو پورې چې تاسو ژوندي يئ هغه څه چې تاسو په خپلو سترګو ليدلي دي هېر يې نه کړئ. خپلو اولادونو او لمسيو ته د هغې ورځې په باره کې ووايئ چې کله تاسو د سينا د غره سره د خپل څښتن خدای په حضور کې ولاړ وئ چې هغه ماته وفرمايل: د اسرائيلو قوم راغونډ کړه. زه غواړم چې هغوی زما خبرې واوري چې ترڅه وخته پورې هغوی ژوندي وي زما احترام او اطاعت به کوي او خپلو اولادونو ته يې هم ورزده کړي چې همداسې وکړي.

¹⁰

¹¹خپلو اولادونو ته ووايئ چې تاسو څرنګه لاړئ او د هغه غره په لمنه کې ودرېدلئ چې هلته ټينګه ورېځ او توره تياره وه او اور ورڅخه آسمان ته پورته کېده.

¹²هغوی ته ووايئ چې څښتن څنګه ستاسو سره د اور له منځ څخه خبرې وکړې، څنګه تاسو د هغه خبرې واورېدلې مګر د هغه څېره مو ونه ليدله.

¹³هغه درته وفرمايل د دې دپاره چې په هغه لوظ باندې ودرېږئ چې هغه ستاسو سره کړی دی څه بايد وکړئ. تاسو بايد د هغو لسو حکمونو اطاعت وکړئ چې هغه د تيږو په دوو لوحو باندې ليکلي دي.

¹⁴څښتن ماته وفرمايل چې تاسو ته هغه ټول قوانين درزده کړم چې بايد په هغه خاوره کې يې اطاعت وکړئ چې نژدې ده چې حمله ورباندې وکړئ او هغه ونيسئ.

¹⁵۱۵‏-۱۸ کله چې څښتن د سينا په غره باندې ستاسو سره د اور له منځ څخه خبرې وکړې، تاسو هيڅ يوه څېره ونه ليدله. نو بيا پام کوئ چې تاسو به د ځانونو دپاره د هيڅ شي په شکل کې بت نه جوړوئ، که هغه د سړي په شکل وي يا د ښځې، د حيوان يا مارغه، خزندې يا د ماهي په شکل او په دې کار به ځانونه نه ګناهکاروئ.

¹⁶

¹⁷

¹⁸

¹⁹کله چې تاسو آسمان ته ګورئ او لمر، سپوږمۍ او ستوري وينئ نو وسوسه کېږئ مه چې هغو ته سجده وکړئ يا يې عبادت وکړئ. ستاسو څښتن خدای دا شيان د دنيا د نورو قومونو دپاره پيدا کړي دي چې عبادت يې وکړي.

²⁰مګر تاسو هغه قوم يئ چې هغه د مصر څخه راوويست، يعنې له اوره ډک داش څخه. هغه د دې دپاره راوويستلئ چې ستاسو څخه خپل قوم جوړ کړي لکه څنګه چې نن يئ.

²¹څښتن ستاسو په خاطر په ما باندې په قهر شو، قسم يې وخوړ او ويې فرمايل: ته نشې کولی د اردن د سيند څخه هغې حاصلخېزې ځمکې ته واوړې چې زه يې خپل قوم ته ورکوم.

²²نو زه موسیٰ به په دې خاوره کې مړ شم او هيڅکله به د سيند څخه تېر نشم، مګر تاسو دې ته نژدې يئ چې ورڅخه تېر شئ او هغه حاصلخېزه ځمکه ونيسئ.

²³پام کوئ هغه لوظ به نه هېروئ چې ستاسو څښتن خدای تاسو سره کړی دی. د هغه د امر اطاعت وکړئ چې تاسو به د خپل ځانونو دپاره هيڅ ډول بت نه جوړوئ،

²⁴که چېرې تاسو د نورو خدايانو عبادت وکړئ، نو ستاسو څښتن خدای غيرتي خدای دی او هغه د داسې اور په شان دی چې هر شی يې مخې ته ورشي له منځه يې وړي.

²⁵کله چې په هغه وطن کې ډېره موده واوسېږئ او اولادونه او لمسيان مو پيدا شي نو د هيڅ شي په شکل کې به د بت په جوړولو سره ګناه نه کوئ. دا د څښتن په نظر کې بد کار دی او هغه به په دې کار په قهر شي.

²⁶زه همدا نن آسمان او ځمکه ستاسو په مقابل کې شاهدان نيسم، که چېرې زما څخه نافرماني وکړئ، نو ژر به د هغې ځمکې له مخ څخه ورک شئ. تاسو به په هغه خاوره کې ډېره موده ژوند ونه کړئ کومه چې د اردن په بله غاړه باندې پرته ده او تاسو يې نيسئ. تاسو به بيخي تباه شئ.

²⁷څښتن به تاسو په نورو قومونو کې خپاره کړي چې ستاسو څخه به يوازې څو تنه په کې ژوندي پاتې شي.

²⁸تاسو به هلته د داسې خدايانو عبادت کوئ چې د انسانانو په لاسونو جوړ شوي وي، داسې خدايان چې د لرګيو او تيږو څخه جوړ شوي وي چې ليدلی يا اورېدلی نشي او څه خوړلی يا بوی کولی نشي.

²⁹مګر که چېرې هلته د خپل څښتن خدای د لټولو پرېکړه وکړئ او تاسو هغه د زړه له کومي ولټوئ، نو هغه به ومومئ.

³⁰کله چې تاسو د ستونزو سره مخامخ شئ او دا ټول شيان درباندې راشي، نو آخر به څښتن ته رجوع وکړئ او د هغه اطاعت به وکړئ.

³¹هغه زړه سواندی خدای دی. هغه به ستاسو څخه مخ نه اړوي او نه به تاسو تباه کړي او هغه لوظ به هېر نه کړي چې هغه په خپله ستاسو د نيکونو سره کړی دی.

³²تېر شوي وخت ته وګورئ يعنې هغه وخت چې تاسو پيدا شوي نه وئ او له هغه وخت څخه چې خدای پاک د ځمکې په مخ انسانان پيدا کړل. ټوله دنيا ولټوئ، آيا داسې لوی لوی کارونه مخکې کله شوي دي؟ آيا داسې شيان چا کله اورېدلي دي؟

³³آيا داسې قوم شته چې کوم خدای د هغه سره د اور له منځ څخه خبرې کړې وي او هغه يې ستاسو په شان اورېدلې وي او ژوندی پاتې شوی وي؟

³⁴آيا کوم خدای داسې جرأت کړی دی چې لاړ شي او د بل قوم څخه هغه قوم راواخلي کوم چې د هغوی سره غلامان ؤو او خپل قوم ورڅخه جوړ کړي لکه څنګه چې ستاسو څښتن خدای په مصر کې ستاسو دپاره وکړ؟ هغه ستاسو د سترګو په وړاندې د خپل لوی قدرت او قوت څخه کار واخيست. هغه آفتونه او جنګ راوست، معجزې يې وښودلې او عجيبه عجيبه کارونه يې وکړل او وېروونکې پېښې يې رامنځته کړې.

³⁵څښتن دا شيان د دې دپاره دروښودل چې تاسو ته دا خبره ثابته کړي چې يوازې هغه خدای دی او بل خدای نشته.

³⁶هغه تاسو پرېښودئ چې د آسمان څخه د هغه غږ واورئ، ترڅو تاسو په سمه لاره برابر کړي. هغه په ځمکه باندې تاسو ته خپل وېروونکی اور وښود او تاسو د اور له منځ څخه د هغه خبرې واورېدلې.

³⁷د دې په خاطر چې هغه ستاسو د نيکونو سره مينه درلودله، نو د هغوی څخه وروسته يې د هغوی اولاده يعنې تاسو انتخاب کړئ او په خپل لوی قدرت يې په خپله د مصر څخه راوويستلئ.

³⁸اوس تاسو د نورو قومونو سره چې ستاسو څخه قوي دي مخامخ يئ، خو څښتن لا د مخه د خپلې خاورې څخه د هغوی په شړلو شروع کړې ده او هغه تاسو ته درکوي.

³⁹نو همدا نن ياد ساتئ او هيڅکله دا خبره هېره نه کړئ چې څښتن د آسمانونو او ځمکې خدای دی. بل خدای نشته.

⁴⁰د هغه د هغو ټولو قوانينو اطاعت کوئ چې نن مې تاسو ته درکړل، نو ستاسو او ستاسو د اولادې هر کار به سم وي. تاسو به په هغه وطن کې چې ستاسو څښتن خدای يې تاسو ته د تل دپاره درکوي اوږد ژوند ولرئ.“

⁴¹بيا حضرت موسیٰ د اردن د سيند په ختيځ کې درې ښارونه جدا کړل

⁴²چې داسې سړی هلته وتښتي او خوندي پاتې شي چې په سهوې سره يې يو داسې نفر وژلی وي چې دښمن يې نه وي. هغه کولی شي چې د دغو ښارونو څخه يو ښار ته وتښتي او خپل ژوند وژغوري.

⁴³د روبين د قبيلې دپاره د باصر ښار ؤ چې د دښتې په لوړه جلګه باندې پروت ؤ. د جاد د قبيلې دپاره راموت ؤ چې د جلعاد په سيمه کې پروت ؤ او د منسي د قبيلې دپاره د جولان ښار ؤ چې د باشان په سيمه کې پروت ؤ.

⁴⁴حضرت موسیٰ د اسرائيلو قوم ته د خدای پاک قوانين ورکړل.

⁴⁵۴۵‏-۴۶ هغه دا قوانين هغوی ته د هغه وخت څخه وروسته ورکړل چې هغوی د مصر څخه راوتلي ؤو او د اردن د سيند ختيځ خواته په دره کې ؤو چې د بيت فغور ښار ته مخامخ وه. دا د اموريانو د پادشاه يعنې د سيحون په سيمه کې وه چې د حشبون ښار يې پايتخت ؤ. مګر حضرت موسیٰ او د اسرائيلو قوم هغه ته ماتې ورکړه.

⁴⁶

⁴⁷هغوی د سيحون او د باشان د پادشاه يعنې د عوج خاوره ونيوله. عوج د اموريانو بل پادشاه ؤ چې د اردن په ختيځ کې اوسېده.

⁴⁸دا خاوره د عروعير د ښار څخه چې د ارنون د سيند په غاړه پروت ؤ، په شمال کې د سريون يعنې د حرمون تر غره پورې غزېدلې وه.

⁴⁹په هغې کې د اردن د سيند ټوله ختيځه سيمه د آرام تر درياب او د پيسګاه د غره تر لمنې پورې شامله وه.