Read Pashto (Nangahari) — د پښتو مقدس کتاب تثنيه 5 Bible Online

تثنيه 5 - Pashto (Nangahari) — د پښتو مقدس کتاب bible

تثنيه 5

¹حضرت موسیٰ د اسرائيلو ټول قوم راوغوښت او ورته ويې فرمايل: ”ای د اسرائيلو خلکو، هغو ټولو قوانينو ته غوږ ونيسئ چې زه يې نن تاسو ته درکوم. هغه زده کړئ او په غور سره د هغو څخه پيروي وکړئ.

²۲‏-۳ زمونږ څښتن خدای د سينا د غره سره نه يوازې زمونږ د پلرونو سره لوظ وکړ، بلکه زمونږ ټولو سره يې چې تر نن ورځې پورې ژوندي يو وکړ.

⁴څښتن په هماغه غره باندې د اور له منځ څخه ستاسو سره مخامخ خبرې وکړې.

⁵په هغه وخت کې زه ستاسو او څښتن ترمنځ ودرېدم چې د هغه خبرې تاسو ته ورسوم، ځکه چې تاسو د هغه اور څخه وېرېدئ او غره ته نه ورختلئ. څښتن وفرمايل:

⁶زه ستاسو څښتن خدای يم چې تاسو مې له مصر څخه چې په کې غلامان وئ راوويستلئ.

⁷زما څخه پرته د بل خدای عبادت مه کوئ.

⁸د خپلو ځانونو دپاره د هيڅ شي په شکل چې هغه په آسمان کې يا په ځمکه باندې يا د ځمکې لاندې په اوبو کې وي بتان مه جوړوئ.

⁹هيڅ بت ته سجده يا عبادت مه کوئ ځکه چې زه ستاسو څښتن خدای يو غيرتي خدای يم. څوک چې زما څخه کرکه کوي زه به هغوی او د هغوی اولادې ته تر دريم او څلورم نسله پورې سزا ورکړم.

¹⁰مګر زه د هغو زرګونو نسلونو سره چې زما سره مينه کوي او زما امرونو ته غاړه ږدي مينه کوم.

¹¹زما نوم د بدو مقصدونو دپاره مه استعمالوئ، ځکه چې زه ستاسو څښتن خدای به هغه چاته سزا ورکړم څوک چې زما نوم په غلطه استعمال کړي.

¹²لکه څنګه چې ما يعنې ستاسو څښتن خدای په تاسو باندې امر کړی دی، د سبت ورځ ولمانځئ او هغه مقدسه وګڼئ.

¹³تاسو د کار کولو دپاره شپږ ورځې لرئ،

¹⁴مګر اوومه ورځ د آرام کولو ورځ ده چې څښتن خدای ته وقف شوې ده. په دې ورځ به تاسو هيڅ کار نه کوئ، نه تاسو، نه ستاسو زامن يا لورګانې، نه غلامان، نه ستاسو غوايان يا خره يا نور حيوانات او نه هغه بېګانه خلک چې ستاسو په وطن کې اوسيږي. ستاسو غلامان بايد ستاسو په شان استراحت وکړي.

¹⁵دا په ياد ولرئ چې تاسو په مصر کې غلامان وئ او ما يعنې ستاسو څښتن خدای په خپل لوی قدرت او قوت سره آزاد کړئ. نو ځکه تاسو ته امر کوم چې د سبت يعنې د آرام کولو ورځ لمانځئ.

¹⁶لکه څنګه چې زه، يعنې ستاسو څښتن خدای تاسو ته امر کوم، د خپل پلار او مور احترام کوئ ترڅو ستاسو ټول کارونه سم وي او په هغه خاوره کې چې زه يې درکوم زيات عمر ولرئ.

¹⁷قتل مه کوئ.

¹⁸زنا مه کوئ.

¹⁹غلا مه کوئ.

²⁰د هيچا په ضد د دروغو شهادت مه ورکوئ.

²¹د بل سړي ښځې ته د طمعې په سترګه مه ګورئ. د هغه کور، ځمکې، غلامانو، غوايانو، خرو يا هرڅه چې هغه يې لري، ورته د طمعې په سترګه مه ګورئ.

²²دا هغه حکمونه دي چې څښتن په هغه وخت کې تاسو ټولو ته درکړل کله چې د سينا د غره تر څنګ سره راغونډ شوي وئ او هغه په لوړ آواز سره د اور او ټينګې ورېځې له منځ څخه خبرې وکړې. هغه نور څه نه بلکه همدا حکمونه راکړل. بيا يې هغه د تيږو په دوو لوحو باندې وليکل او ماته يې راکړل.

²³کله چې ټول غره اور واخيست او تاسو هغه غږ واورېد چې د تيارې څخه راتله، نو ستاسو مشران او ستاسو د قبيلو رئيسان ماته راغلل

²⁴او ويې ويل: کله چې مونږ د هغه خبرې واورېدلې چې د اور له منځ څخه يې کولې، مونږ ته خپل څښتن خدای خپله لويي او جلال راوښود! نن مونږ وليدل چې د يو انسان دپاره که خدای پاک ورسره خبرې هم کړې وي دا ممکنه ده چې ژوندی پاتې شي.

²⁵خو مونږ ولې خپل ځانونه د مرګ په خطر کې واچوو؟ هغه هيبتناکه اور به مونږ له منځه يوسي. مونږ يقين لرو که چېرې د خپل څښتن خدای غږ بيا واورو نو مړه به شو.

²⁶آيا داسې يو انسان چې د اور له منځ څخه يې د حقيقي خدای خبرې اورېدلې وي کله ژوندی پاتې شوی دی؟

²⁷حضرت موسیٰ، نژدې ورشه او زمونږ د څښتن خدای ټولو خبرو ته غوږ ونيسه. بيا بېرته راشه او هغه خبرې چې هغه درته وکړلې مونږ ته يې ووايه. مونږ به ورته غوږ ونيسو او وبه يې منو.

²⁸کله چې څښتن دا خبرې واورېدلې، هغه ماته وفرمايل: ما د دغو خلکو خبرې واورېدلې، هغوی صحيح وايي.

²⁹کاشکې هغوی همېشه داسې احساس ولري! کاشکې هغوی همېشه زما څخه ووېريږي او زما ټولو امرونو ته غاړه کېږدي، ترڅو د تل دپاره د هغوی او د هغوی د اولادې هر کار سم وي.

³⁰لاړ شه او هغوی ته ووايه چې بېرته خپلو خېمو ته ورستانه شي.

³¹مګر موسیٰ، ته دلته زما سره پاتې شه. زه به تاته خپل ټول قوانين او امرونه درکړم. هغه قوم ته ورزده کړه، ترڅو هغوی په هغه خاوره کې ورته غاړه کېږدي چې زه يې ورکوم.

³²د اسرائيلو خلکو، تاسو بايد په غور سره د خپل څښتن خدای هر امر په ځای کړئ. د هغه د هيڅ يو قانون څخه سرغړونه ونه کړئ.

³³د هغو ټولو څخه پيروي وکړئ، ترڅو ستاسو ټول کارونه صحيح روان وي او په هغه وطن کې چې تاسو به يې ونيسئ، خپل ژوند ته دوام ورکړئ.