Read Pashto (Nangahari) — د پښتو مقدس کتاب تثنيه 6 Bible Online

تثنيه 6 - Pashto (Nangahari) — د پښتو مقدس کتاب bible

تثنيه 6

¹څښتن ماته وفرمايل چې تاسو ته دغه ټول قوانين درکړم، ترڅو وکولی شئ په هغې خاورې کې د هغو اطاعت وکړئ کومه چې هغه يې درکوي. تاسو به ژر د اردن د سيند څخه تېر شئ او هغه خاوره به ونيسئ.

²ترڅو پورې چې تاسو ژوندي يئ، تاسو او ستاسو اولاده بايد د خپل څښتن خدای عزت کوئ او د هغه د ټولو قوانينو اطاعت کوئ چې زه يې درکوم، ترڅو تاسو په هغه خاوره کې زيات عمر ولرئ.

³ای د اسرائيلو خلکو، غوږ ونيسئ او په غور سره هغو قوانينو ته غاړه کېږدئ! بيا به ستاسو هر کار سم شي او ستاسو څخه به يو لوی قوم جوړ شي او زمونږ د نيکونو د څښتن خدای د وعدې سره سم به په هغې غني او حاصلخېزې خاوره کې واوسېږئ.

⁴ای د اسرائيلو خلکو، غوږ ونيسئ! يوازينی خدای چې وجود لري هغه زمونږ څښتن خدای دی.

⁵د زړه له کومي په خپل ټول ځان او ټول قوت سره د خپل څښتن خدای سره مينه کوئ.

⁶دا قوانين چې زه يې نن تاسو ته درکوم هغه هيڅکله مه هېروئ.

⁷هغه خپلو اولادونو ته ورزده کړئ. که په کور کې يئ يا په لاره روان يئ يا آرام کوئ يا کار کوئ هغه بيا بيا ووايئ.

⁸هغه وليکئ او په خپلو مټو او تنديو باندې يې وتړئ چې د هغو په اطاعت کولو کې درسره مرسته وکړي.

⁹دا قوانين د خپلو کورونو د دروازو په چوکاټونو او د خپلو ښارونو په دروازو باندې وليکئ.

¹⁰څښتن خدای ستاسو د نيکونو يعنې حضرت ابراهيم، حضرت اسحاق او حضرت يعقوب سره وعده کړې وه چې هغه به تاسو ته دا ځمکه درکړي. اوس به هغه تاسو هلته ورولي او تاسو ته به لوی لوی ښارونه چې داسې ښې ودانۍ په کې وي چې تاسو خپله نه دي جوړې کړې درکړي.

¹¹کورونه به د ښو ښو شيانو څخه ډک وي چې تاسو په کې نه وي ايښي او کوهيان به وي چې تاسو به نه وي کيندلي او د انګورو او د زيتونو باغونه به وي چې تاسو به نه وي کرلي. کله چې څښتن تاسو دې ځمکې ته ورولي او تاسو ته د خوراک دپاره هرڅه درورسيږي،

¹²پام کوئ چې څښتن به نه هېروئ چا چې تاسو د مصر څخه چې په کې غلامان وئ، راوويستلئ.

¹³د خپل څښتن خدای څخه ووېرېږئ. يوازې د هغه عبادت کوئ او يوازې د هغه په نوم قسم خورئ.

¹⁴نورو خدايانو يعنې د هغو قومونو خدايانو ته عبادت مه کوئ چې ستاسو په شاوخوا کې دي.

¹⁵که چېرې تاسو د نورو خدايانو عبادت وکړئ، د څښتن قهر به د اور په شان درباندې نازل شي او تاسو به د ځمکې له مخ څخه ورک کړي ځکه ستاسو څښتن خدای چې ستاسو په منځ کې حاضر دی، هغه غيرتي خدای دی.

¹⁶خپل څښتن خدای مه ازمايئ، لکه څنګه چې تاسو په مسا کې وازمايه.

¹⁷همېشه په غور سره د هغو ټولو قوانينو اطاعت کوئ چې تاسو ته يې درکړي دي.

¹⁸۱۸‏-۱۹ هغه کارونه کوئ چې د څښتن په نظر کې صحيح او ښه دي، نو ستاسو هر کار به سم شي. بيا به وکولی شئ چې د هغې حاصلخېزې ځمکې ملکيت ترلاسه کړئ ځکه چې څښتن به ستاسو دښمنان وشړي، لکه څنګه چې هغه ستاسو د نيکونو سره وعده کړې ده.

²⁰په راتلونکي کې به ستاسو اولادونه پوښتنه وکړي چې زمونږ څښتن خدای ولې په مونږ باندې امر کړی دی چې دغو ټولو قوانينو ته غاړه کېږدو؟

²¹بيا هغوی ته ووايئ: مونږ په مصر کې د فرعون غلامان ؤو او څښتن په خپل لوی قدرت آزاد کړو.

²²مونږ په خپلو سترګو وليدل چې معجزې يې وکړې او په مصريانو او فرعون او د هغه په ټولو درباريانو باندې يې وېروونکي کارونه وکړل.

²³هغه مونږ د مصر څخه آزاد کړو چې دلته مو راولي او دا ځمکه راکړي لکه څنګه چې هغه زمونږ د نيکونو سره وعده کړې وه.

²⁴بيا زمونږ څښتن خدای په مونږ باندې امر وکړ چې دغو ټولو قوانينو ته غاړه کېږدو او د هغه څخه ووېرېږو. که چېرې مونږ داسې وکړو، نو هغه به همېشه زمونږ په قوم باندې پام کوي او هغه به خوشبخته وساتي.

²⁵که چېرې مونږ په وفادارۍ سره د خدای پاک هر امر ته غاړه کېږدو، هغه به زمونږ څخه خوشاله شي.