Read Pashto (Nangahari) — د پښتو مقدس کتاب تثنيه 7 Bible Online

تثنيه 7 - Pashto (Nangahari) — د پښتو مقدس کتاب bible

تثنيه 7

¹کله چې ستاسو څښتن خدای تاسو هغې خاورې ته ورولي چې تاسو به يې ونيسئ، نو هغه به ډېر قومونه ستاسو له مخې څخه لېرې کړي يعنې حيتيان، جرجاشيان، اموريان، کنعانيان، فرزيان، حويان او يبوسيان. دا اوه قومونه ستاسو څخه لوی او ډېر قوي دي.

²کله چې ستاسو څښتن خدای دغه قومونه تاسو ته په لاس درکړل او تاسو هغوی ته ماتې ورکړه، نو هغوی ټول به وژنئ. د هغوی سره کوم تړون مه جوړوئ او نه ورباندې رحم وکړئ.

³د هغوی سره وادونه مه کوئ. خپلې لورګانې د هغوی زامنو ته مه ورکوئ او د هغوی لورګانې خپلو زامنو ته مه کوئ،

⁴ځکه چې بيا به هغوی ستاسو اولادونه د څښتن څخه د نورو خدايانو عبادت ته راواړوي. که چېرې داسې وشي نو څښتن به په تاسو باندې په قهر شي او تاسو به ژر له منځه يوسي.

⁵نو بيا داسې وکړئ چې د هغوی د قربانۍ ځايونه راوغورزوئ، هغه لويې تيږې چې د هغوی د عبادت دپاره استعماليږي ټوټې ټوټې کړئ، د اشيره بتان يې راچپه کړئ او نور بتان يې وسوزوئ.

⁶داسې کار وکړئ ځکه چې تاسو د خپل څښتن خدای يئ. هغه د ځمکې پر مخ د ټولو قومونو څخه تاسو د خپل خاص قوم په توګه انتخاب کړئ.

⁷څښتن د دې په خاطر ستاسو سره مينه نه کوله او د دې په خاطر يې تاسو انتخاب کړي نه يئ چې ستاسو شمېر د نورو قومونو څخه زيات ؤ، بلکه ستاسو قوم د ځمکې پر مخ ترټولو کوچنی قوم ؤ.

⁸خو څښتن ستاسو سره مينه کوله او غوښتل يې چې په هغې وعدې باندې ودريږي چې ستاسو د نيکونو سره يې کړې وه. نو په دې خاطر هغه تاسو په خپل لوی قوت سره وژغورلئ او د مصر د پادشاه فرعون د غلامۍ څخه يې آزاد کړئ.

⁹زه ستاسو څخه غواړم په دې پوه شئ چې هغه څښتن خدای چې عبادت يې کوئ هغه حقيقي او وفادار خدای دی. که چېرې د هغه سره مينه وکړئ او امرونه يې ومنئ نو تاسو کولی شئ په هغه باندې باور ولرئ چې هغه به همېشه په خپل لوظ باندې ولاړ وي او ستاسو سره به مينه کوي.

¹⁰خو هغه خلک چې د هغه څخه کرکه کوي، هغوی ته به ژر داسې سزا ورکړي چې تباه شي.

¹¹نو اوس په غور سره د هغو ټولو قوانينو څخه چې نن مې تاسو ته درکړل پيروي وکړئ.

¹²که چېرې تاسو دغو امرونو ته غوږ ونيسئ او په وفادارۍ سره د هغو اطاعت وکړئ، بيا به ستاسو څښتن خدای لکه څنګه يې چې زمونږ د نيکونو سره وعده کړې ده په خپل هغه لوظ باندې ودريږي چې ستاسو سره يې کړی دی او هغه به ستاسو سره په دوامداره توګه مينه کوي.

¹³هغه به ستاسو سره مينه وکړي او برکت به درکړي ترڅو ستاسو شمېر زيات شي او ډېر اولادونه مو پيدا شي. ستاسو په پټيو کې به برکت واچوي ترڅو تاسو غلې دانې، شراب او د زيتونو تېل ولرئ او د ډېرو پادو او رمو په درکولو سره به تاسو ته برکت درکړي. هغه به دا ټول برکتونه په هغه خاوره کې درکړي چې زمونږ د نيکونو سره يې وعده کړې وه چې تاسو ته به يې درکړي.

¹⁴په دنيا کې به د هيڅ قوم سره ستاسو په شان زيات برکت نه وي. ستاسو او ستاسو د حيواناتو څخه به هيڅ يو شنډ نه وي.

¹⁵څښتن به تاسو د ټولو ناروغيو څخه وساتي او هغه به تاسو په هيڅ داسې وېروونکې ناروغۍ باندې اخته نه کړي چې تاسو په مصر کې ورسره بلد وئ، بلکه ستاسو ټول دښمنان به ورباندې اخته کړي.

¹⁶هغه ټول قومونه له منځه يوسئ چې خپل څښتن خدای به يې تاسو ته په لاس درکړي او په هغوی باندې هيڅ رحم مه کوئ. د هغوی د خدايانو عبادت مه کوئ ځکه چې دا به ستاسو دپاره يو وژونکی دام وي.

¹⁷د ځان سره داسې مه وايئ چې د دې قومونو شمېر زمونږ څخه زيات دی او مونږ هغوی شړلی نشو.

¹⁸د هغوی څخه مه وېرېږئ. هغه کارونه په ياد ساتئ چې ستاسو څښتن خدای په فرعون او د مصر په ټولو خلکو باندې وکړل.

¹⁹هغه هيبتناکه بلاګانې په ياد ساتئ چې تاسو په خپلو سترګو وليدلې، هغه معجزې او عجيبه عجيبه کارونه او هغه لوی قدرت او قوت چې ستاسو څښتن خدای تاسو ورباندې آزاد کړئ. هغه به په هماغه ډول چې مصريان يې تباه کړل، دا ټول قومونه به چې تاسو اوس ورڅخه وېرېږئ هم تباه کړي.

²⁰هغه به حتیٰ د هغوی په منځ کې سخته وېره پيدا کړي او هغه ټول خلک به له منځه يوسي چې تښتي او پټيږي.

²¹نو د دغو خلکو څخه مه وېرېږئ. ځکه چې ستاسو څښتن خدای ستاسو سره مل دی، هغه لوی او هيبتناکه خدای دی.

²²ستاسو څښتن خدای به دا قومونه ورو ورو ستاسو له مخې څخه لېرې کړي. تاسو به ونشئ کولی چې هغوی په يو وار سره له منځه يوسئ ځکه که چېرې داسې وکړئ، د وحشي حيواناتو شمېر به زيات شي او دا به تاسو ته د خطر سبب وګرځي.

²³څښتن به تاسو ته خپل دښمنان په لاس درکړي او په هغوی باندې به داسې سخته وېره راولي ترڅو چې تباه شي.

²⁴هغه به د هغوی پادشاهان تاسو ته په لاس درکړي او تاسو به د هغوی نوم او نښان د ځمکې له مخ څخه ورک کړئ. هيڅوک به ونشي کولی چې ستاسو په مقابل کې ودريږي، تاسو به هغوی له منځه يوسئ.

²⁵د هغوی بتان وسوزوئ. هغو سرو او سپينو زرو ته چې دا بتان ورڅخه جوړ شوي دي د طمعې په سترګه مه ګورئ او هغه د خپلو ځانونو دپاره مه اخلئ. که چېرې داسې وکړئ، دا به وژونکی دام وي ځکه چې څښتن د بت پرستۍ څخه کرکه کوي.

²⁶د دغو بتانو څخه هيڅ يو يې خپلو کورونو ته مه راوړئ. که نه، نو په تاسو باندې به هم هماغسې لعنت وويل شي لکه څنګه چې په هغو باندې ويل شوی دی. تاسو بايد له دغو بتانو څخه کرکه وکړئ او په سپکه سترګه ورته وګورئ، ځکه چې په هغو باندې د څښتن لعنت ويل شوی دی.