Read Pashto (Nangahari) — د پښتو مقدس کتاب تثنيه 8 Bible Online

تثنيه 8 - Pashto (Nangahari) — د پښتو مقدس کتاب bible

تثنيه 8

¹په وفادارۍ سره د هغو ټولو قوانينو څخه پيروي وکړئ چې نن يې تاسو ته درکوم ترڅو ژوند وکړئ، شمېر مو زيات شي او هغې خاورې ته چې د هغې وعده څښتن ستاسو د نيکونو سره کړې ده ورننوزئ او هغه ونيسئ.

²در په ياد کړئ چې په تېرو څلوېښتو کلونو کې ستاسو څښتن خدای څنګه تاسو ته په دښته کې په دې اوږده سفر کې لارښودنه وکړه. په تاسو باندې يې سختۍ راوستلې چې ومو ازمايي ترڅو هغه پوه شي چې ستاسو په زړونو کې څه دي او د هغه په حکمونو باندې عمل کوئ يا نه.

³هغه په تاسو باندې لوږه راوستله او بيا يې د خوراک دپاره من درکړ، يعنې هغه خواړه چې تاسو او ستاسو نيکونو مخکې هيڅکله خوړلي نه ؤو. هغه د دې دپاره دا کار وکړ چې تاسو ته دا خبره درزده کړي چې انسان يوازې په ډوډۍ نه بلکه په هره خبره باندې ژوندی دی چې د څښتن د خولې څخه راوزي.

⁴د دغو څلوېښتو کلونو په دوران کې ستاسو کالي نه دي زاړه شوي او نه مو پښې پړسېدلې دي.

⁵په ياد لرئ چې ستاسو څښتن خدای تاسو اصلاح کوي او داسې سزا درکوي لکه څنګه چې يو پلار خپلو اولادونو ته تربيه ورکوي.

⁶نو بيا هغه کار کوئ چې څښتن يې درباندې امر کړی دی يعنې د هغه د قوانينو په مطابق ژوند کوئ او د هغه څخه وېرېږئ.

⁷ستاسو څښتن خدای تاسو يوې حاصلخېزې ځمکې يعنې داسې ځمکې ته راولي چې سيندونه او چينې لري او د ځمکې لاندې داسې ويالې لري چې اوبه يې درو او غونډيو ته راوزي،

⁸يوه داسې ځمکه چې غنم او اوربشې، انګور، انځر، انار، زيتون او شات په کې پيدا کيږي.

⁹دا داسې وطن دی چې خواړه په کې پرېمانه دي او د هيڅ شي کمی په کې نشته. د دې ځای تيږې د اوسپنې څخه ډکې دي او د غونډيو څخه يې مس راويستلی شئ.

¹⁰هرڅه چې تاسو غواړئ وخورئ هغه به درورسيږي او تاسو به د هغې حاصلخېزې ځمکې دپاره چې ستاسو څښتن خدای درکړې ده د هغه شکر ادا کړئ.

¹¹پام کوئ چې تاسو به هيڅکله خپل څښتن خدای نه هېروئ. هيڅکله د هغه د هغو قوانينو څخه سرغړونه ونه کړئ چې نن يې تاسو ته درکوم.

¹²کله چې تاسو ته د خوراک دپاره هرڅه درورسيږي او د اوسېدلو دپاره ښه ښه کورونه ودان کړئ

¹³او کله چې ستاسو پادې او رمې، ستاسو سپين زر او سره زر او نور ټول شيان زيات شي،

¹⁴نو پام کوئ چې تاسو به نه مغروره کېږئ او خپل څښتن خدای به چې تاسو يې د مصر د غلامۍ څخه آزاد کړئ نه هېروئ.

¹⁵هغه د هغې پراخې او وېروونکې دښتې په لاره تاسو بوتللئ چې زهرجن ماران او لړمان په کې ؤو. هغه په هغې وچې او بې اوبو ځمکه کې د کلک ګټ څخه ستاسو دپاره اوبه راوويستلې.

¹⁶هغه په دښته کې تاسو ته د خوراک دپاره من درکړ چې داسې خواړه ؤو چې ستاسو نيکونو هيڅکله خوړلي نه ؤو. له دې کبله هغه په تاسو باندې سختۍ راوستلې چې تاسو وازمايي، ترڅو په آخر کې هغه تاسو ته د ښو ښو شيانو سره برکت درکړي.

¹⁷نو بيا بايد هيڅکله داسې فکر ونه کړئ چې تاسو په خپل قدرت او قوت سره خپل ځانونه شتمن کړي دي.

¹⁸په ياد ولرئ چې دا ستاسو څښتن خدای دی چې تاسو ته دا توان درکوي چې شتمن شئ. څښتن ځکه دا کار کوي چې هغه نن هم هغه لوظ ته وفادار پاتې دی چې ستاسو د نيکونو سره يې کړی ؤ.

¹⁹۱۹‏-۲۰ زه نن تاسو ته خبرداری درکوم که چېرې تاسو خپل څښتن خدای هېر کړئ او د نورو خدايانو عبادت وکړئ، نو څښتن به تاسو لکه د نورو قومونو په شان چې تاسو به ورسره جنګ کوئ له منځه يوسي.