Read Pashto (Nangahari) — د پښتو مقدس کتاب کورنتيانو اول 5 Bible Online

کورنتيانو اول 5 - Pashto (Nangahari) — د پښتو مقدس کتاب bible

کورنتيانو اول 5

¹ما ته خبر رارسيدلے دے چه په تاسو کښے حرام کارى کيږى، بلکه داسے حرام کارى چه په غيرو قومونو کښے هم نۀ کيږى. په تاسو کښے يو سړے دے چه دَ هغۀ دَ خپلے ميرنئ مور سره ناجائزه تعلقات دى.

²اَؤ تاسو پرے غمژن نۀ شوئ چه چا چه دا کار کړے دے، تاسو هغه وشړئ بلکه فخر کوئ.

³زَۀ اګر که په جسمانى طور موجُود نۀ يم خو په رُوحانى طور موجُود يم. ګنى دَ موجُودګئ په حالت کښے مے په داسے کار کوُونکى زمُونږ دَ مالِک عيسىٰ په نُوم دا حُکم کړے دے،

⁴چه هر کله چه تاسو جمع کيږئ نو ګنى چه زَۀ په رُوح کښے تاسو سره موجُود يم، نو زمُونږ دَ مالِک مسيح دَ قُدرت مدد واخلئ،

⁵نو دَ داسے سړى وجُود دَ هلاکت دَ پاره شيطان ته وسپارئ، دَ دے دَ پاره چه دَ هغۀ رُوح دَ مالِک په ورځ خلاصُون بيا مُومى.

⁶ستاسو فخر کول ښۀ خبره نۀ ده. آيا تاسو نۀ يئ خبر چه لږه شان خمبيره ټول اخښلى اوړۀ خمبيره کوى؟

⁷زړه خمبيره وباسئ، ځانُونه پاک کړئ چه تاسو تازه اخښلى اوړۀ جوړ شئ ځکه چه تاسو بے خمبيرے يئ، ولے چه زمُونږ هم دَ فسح ګډُورے، يعنے دَ مسيح قُربانى وشوه.

⁸نو راځئ چه مُونږ اختر وکړُو، نۀ په زړه خمبيره اَؤ نۀ دَ بدئ اَؤ دَ شرارت په خمبيره بلکه په صفا زړۀ اَؤ دَ رښتياؤ په بے خمبيرے ډوډئ باندے.

⁹ما په خپل خط کښے تاسو ته دا ليکلى وُو چه دَ حرام کارو سره ناسته پاسته مه کوئ.

¹⁰دا خو نه چه تاسو بيخى دَ دُنيا دَ حرام کارو يا لالچيانو يا ظالمانو يا بُت پرستانو سره ملاويدل پريږدئ، ولے چه دغه شان خو به تاسو ته هډو دَ دُنيا نه وتل وُو.

¹¹نو ما خو په حقيقت کښے تاسو ته دا ليکلى وُو چه که څوک ځان ته ورور وائى اَؤ حرام کار يا حرصناک يا بُت پرست يا کنځل مار يا شرابى يا ظالم وى نو دَ هغۀ سره ناسته پاسته مه کوئ بلکه دَ داسے کس سره ډوډئ قدرے هم مه خورئ.

¹²ځکه چه په بے ايمانانو دَ حُکم کولو زما څۀ کار دے؟ خو آيا داسے نۀ ده چه تاسو په ايماندارانو حُکم کوئ؟

¹³خو په بے ايمانانو خُدائے حُکم کوى. ”نو بيا هغه بد سړے دَ مينځه وباسئ.“