Read Pashto (Nangahari) — د پښتو مقدس کتاب ګلتيانو 1 Bible Online

ګلتيانو 1 - Pashto (Nangahari) — د پښتو مقدس کتاب bible

ګلتيانو 1

¹دَ پولوس له طرفه چه بنى آدمو نۀ ټاکلے اَؤ نۀ رسُول کړے دے، بلکه دَ عيسىٰ مسيح اَؤ دَ پلار خُدائے له طرفه رسُول دے چه مسيح ئے دَ مړو نه بيا ژوندے کړو.

²زَۀ اَؤ زما دَ ملګرو ټولئے چه اوس زما سره دى دَ ګلتيا ټولو جماعتُونو ته سلام وائى.

³زمُونږ دَ پلار خُدائے اَؤ دَ مالِک عيسىٰ مسيح له طرفه دِ په تاسو فضل اَؤ سلامتى وى،

⁴چا چه زمُونږ دَ ګُناهُونو دَ پاره خپل ځان قُربان کړو چه مُونږ دَ دے موجُوده بدے زمانے نه بچ کړى، لکه چه زمُونږ دَ خُدائے اَؤ پلار رضا ده.

⁵دَ هغۀ جلال دِ تل تر تله وى! آمين.

⁶زَۀ په دے خبره حيران يم چه تاسو دومره زر دَ هغه چا نه مخ اړوئ چا چه تاسو دَ مسيح په فضل رابللى يئ، اَؤ اوس بل زيرى پسے ځئ،

⁷اګر چه بل نۀ دے. اَؤ صرف دا نه، خو داسے څۀ کسان شته چا چه په کوشِش سره دَ مسيح دَ زيرى نه ستاسو زړُونه تور کړى دى.

⁸خو که مُونږ په خپله يا دَ آسمان يوه فرښته هم دَ هغه زيرى نه سيوا چه مُونږ تاسو ته آؤرولے وو، څۀ زيرے آؤرَوى، نو هغه دِ لعنتى وى!

⁹زَۀ اوس هغه بيا وايم څۀ چه مُونږ درته اول وئيلى وُو : که چرے څوک تاسو ته دَ درسيدلى زيرى نه دَ بل څۀ زيرے آؤرَوى نو هغه دِ لعنتى وى!

¹⁰آيا زَۀ په دے وينا اِنسانان خوشحالوم که خُدائے؟ آيا زَۀ تش اِنسان خوشحالوم؟ که چرے ما تر دے اِنسانان خوشحالولے نو بيا به زَۀ دَ مسيح غُلام نۀ وم.

¹¹زما ورُوڼو! زَۀ تاسو ته دا خبره صفا کوم چه کومُ زيرے چه ما درته آؤرَولے دے هغه دَ بنى آدم جوړ کړے نۀ دے.

¹²ځکه چه هغه ما ته دَ چا اِنسان دَ طرفه نۀ دے رارسيدلے اَؤ نۀ چا بنى آدم ما ته ښوولے دے، بلکه دَ کشف په معرفت دَ عيسىٰ مسيح دَ طرفه شوے دے.

¹³نو تاسو زما دَ ژوندانۀ په حقله کله چه زَۀ يهُودى وم آؤريدلى دى چه ما به دَ خُدائے جماعت بے حده آزارولو اَؤ دَ هغۀ دَ تباه کولو کوشِش به مے کاوو.

¹⁴اَؤ زَۀ دَ يهُوديانو په عقيده کښے دَ خپل قوم دَ اکثرو همزولو نه ډير سرګرم وم اَؤ دَ خپلو مشرانو دَ رواياتو پابند وم.

¹⁵خو خُدائے چه زَۀ دَ خپل پيدايښت نه دَ مور په ګيډه کښے غوره کړم اَؤ په خپل فضل ئے راوبللم، هر کله چه دَ هغۀ دا رضا شوه

¹⁶چه خپل زوئے په ما کښے ظاهر کړى دَ دے دَ پاره چه زَۀ په غيرو يهُوديانو کښے دَ هغۀ زيرے خور کړم، نو نۀ خو ما دَ اِنسان نه صلاح واخسته

¹⁷اَؤ نۀ په بيتُ المُقدس کښے هغوئ ته ورغلم څوک چه زما نه آګاهو رسُولان وُو، بلکه سمدستى عربستان ته لاړم اَؤ دَ هغه ځائے نه دمشق ته راستُون شوم.

¹⁸بيا درے کاله پس دَ پطروس سره دَ مُلاقات دَ پاره زَۀ بيتُ المُقدس ته لاړم اَؤ پنځلس ورځے مے ورسره تيرے کړے.

¹⁹خو ما دَ مالِک دَ ورور يعقُوب نه بغير دَ نورو رسُولانو سره ملاقات ونۀ کړو.

²⁰کوُمے خبرے چه زَۀ تاسو ته ليکم، خُدائے حاضر ناظر دے چه په دے کښے هيڅ دروغ نۀ وايم.

²¹دَ دے نه پس زَۀ شام اَؤ دَ کلکيه علاقو ته راغلم.

²²اَؤ دَ يهوديه کُوم جماعتُونه چه دَ مسيح وُو، زما دَ صُورت نه ناواقف وُو.

²³خو تش دا به ئے آؤريدل چه ”چا چه به مُونږ وړاندے ربړولو، هغه اوس دَ هغه دين زيرے ورکوى دَ کُوم په تباهئ پسے چه وو.“

²⁴اَؤ هغوئ به زما په وجه دَ خُدائے ثنا وکړله.