Read Pashto (Nangahari) — د پښتو مقدس کتاب فيليپيانو 2 Bible Online

فيليپيانو 2 - Pashto (Nangahari) — د پښتو مقدس کتاب bible

فيليپيانو 2

¹نو بيا چه مسيح تاسو ته دا تسلى درکولے شى چه دَ هغۀ دَ مينے نه تاسو زړۀ ور شئ اَؤ په تاسو کښے دَ رُوحُ القُدس شراکت، زړۀ سواندے اَؤ همدردى وى،

²نو تاسو زما خوشحالى پُوره کړئ چه په يو زړۀ، په يو شان مينه اَؤ يو خيال ولرئ.

³دَ خود غرضئ اَؤ بے ځايه فخر په وجه څۀ مه کوئ، بلکه په عاجزئ يو بل دَ ځان نه غوره ګڼئ.

⁴هر يو دِ تش په خپل حال نه بلکه دَ يو بل په حال هم نظر ساتى.

⁵هم هغه شان خُوئ لرئ لکه څنګه چه دَ مسيح عيسىٰ وو.

⁶هغه اګر که دَ خُدائے په صُورت وو دَ خُدائے سره برابريدل ئے په قبضه کښے دَ ساتلو څيز ونۀ ګڼلو.

⁷بلکه خپل ځان ئے دَ هغه ټولو اِختيارُونو نه خالى کړو اَؤ دَ غُلام شکل ئے اِختيار کړو، اَؤ دَ اِنسان په شان شو.

⁸اَؤ په اِنسانى جُسه کښے ښکاره شو، خپل ځان ئے عاجز کړو اَؤ دومره تابعدار شو چه مرګ، بلکه دَ سولئ مرګ ئے وزغملو.

⁹په دغه وجه خو خُدائے هم هغه ډير سربلند کړو اَؤ هغۀ ته ئے هغه نُوم وبخښلو کُوم چه دَ ټولو نومُونو نه اعلىٰ دے،

¹⁰دَ پاره دَ دے چه دَ عيسىٰ په نُوم هر يو موجودات په سجده شى، خوا که په آسمانُونو کښے، يا په مزکه کښے، يا هغه چه دَ مزکے دَ لاندے وى،

¹¹اَؤ دَ خُدائے پلار دَ جلال دَ پاره هره يوه ژبه اِقرار وکړى چه عيسىٰ مسيح مالِک دے.

¹²زما ملګرو! لکه څنګه چه تاسو دَ هميشه نه تابعدارى کړے ده هغه شان اوس هم، نه يواځے زما په موجودګئ کښے بلکه دَ هغے نه ډير زيات زما په غير موجودګئ کښے، په ويره اَؤ په رپيدو دَ خپل خلاصُون کار کوئ.

¹³ځکه چه خُدائے په تاسو کښے نيت اَؤ عمل دواړه دَ خپلے نيکے اِرادے پُوره کولو دَ پاره پيدا کوى.

¹⁴هر کار بغير دَ شکايت اَؤ تکرار نه پُوره کوئ،

¹⁵چه تاسو بے عيبه اَؤ پاک شئ. په بد اَؤ بے لارے خلقو کښے دَ خُدائے دَ کاملو بچو په شان ژوندُون کوئ اَؤ دَ هغوئ په مينځ کښے دَ آسمان دَ ستورو په شان وځليږئ،

¹⁶اَؤ دَ ژوندون کلام پيش کوئ چه دَ مسيح په ورځ زَۀ فخر کوم چه نۀ خو زما منډه بے فائدے شوه اَؤ نۀ زما خوارى بے ځايه لاړه.

¹⁷تاسو دَ خپل ايمان په سبب په قُربانئ کولو زما خدمت کوئ اَؤ کيدے شى چه زَۀ دَ دے قُربانئ سره شهيد هم شم. که چرے داسے وى نو زَۀ به خوشحاله يم اَؤ ستاسو په خوشحالئ کښے شريک.

¹⁸تاسو ټول دغه شان خوشحاله اوسئ اَؤ ما سره خوشحالئ کوئ.

¹⁹که دَ مالِک عيسىٰ مرضى وى نو زَۀ به تاسو ته ډير زر تيموتيوس دروليږم چه ستاسو حال په آؤريدو به زَۀ هم خوشحاله شم.

²⁰ځکه چه دلته دَ هغۀ نه علاوه بل څوک داسے نِشته چه په صفا زړۀ ستاسو دَ پاره فکر من وى.

²¹ټول په خپلو فِکرُونو کښے ډُوب دى، نۀ چه دَ عيسىٰ مسيح.

²²خو تاسو ته په خپله معلُومه ده چه تيموتيوس څنګه لايق ښکاره شو، اَؤ هغه اَؤ زَۀ دَ پلار اَؤ زوى په شان په خدمت کولو کښے لګيا وُو چه زيرے خور کړُو.

²³نو زَۀ اُميد کوم چه هر کله چه ما ته خپل اَنجام معلُوم شى نو تيموتيوس به تاسو ته سمدستى دروليږم.

²⁴زما په مالِک پوخ يقين دے چه زَۀ به په خپله هم زر درشم.

²⁵خو اِپفروديتوس تاسو ته واپس درليږل ځکه ضرورى ګڼم، چه هغه زما ورور اَؤ دَ خدمت ملګرے اَؤ دَ يو سنګر فوجى اَؤ ستاسو اَستازے دے چه زما حاجتُونه پُوره کړى.

²⁶خو هغه دَ ستاسو ټولو ليواله دے اَؤ ناقلاره اوسيږى ځکه چه تاسو دَ هغۀ دَ ناروغتيا آؤريدلى وُو.

²⁷بے شکه چه هغه دَ ناروغتيا نه مرګى حال وو، خو خُدائے په هغۀ فضل وکړو، اَؤ صرف په هغۀ نه، بلکه په ما هم چه په ما دَ غم دَ پاسه غم نۀ وى.

²⁸ځکه خو دَ هغۀ دَ درليږلو خيال نور هم زيات شو چه تاسو هم دَ هغۀ په مُلاقات خوشحاله شئ اَؤ زما غم هم کم شى.

²⁹نو بيا تاسو دَ هغۀ سره په مالِک کښے لکه دَ ورور په زياته خوشحالئ سره هر کلے ووايئ. اَؤ دَ داسے کسانو عزت کوئ،

³⁰ځکه چه هغه دَ مسيح دَ کار دَ خاطره مرګ ته نزدے شوے وو، اَؤ هغۀ ځان په خطره کښے اچولے وو چه ستاسو له خوا زما په خدمت کښے کُومه کمى چه وه، هغه پُوره کړى.