Read Pashto (Nangahari) — د پښتو مقدس کتاب فيليپيانو 4 Bible Online

فيليپيانو 4 - Pashto (Nangahari) — د پښتو مقدس کتاب bible

فيليپيانو 4

¹نو دَ دے دَ پاره اَئے زما خوږو ورُوڼو! دَ چا چه زَۀ مُشتاق يم، چه زما خوشحالى اَؤ فخر يئ، په مالِک کښے دغه شان قائم پاتے شئ.

²زَۀ يُووديه اَؤ سُنتخے ته خواست کوم چه هغوئ دِ دَ مالِک په يووالى کښے په يو زړۀ پاتے شى.

³خو اَئے رښتينى دَ خدمت ملګريه! تا ته هم خواست کوم چه تۀ دَ هغه ميرمنو هم مدد کوه ځکه چه هغوئ ما سره په زيرى خورولو کښے کليمينتوس اَؤ زما دَ نورو دَ خدمت ملګرو سره خوارى وکړله دَ چا نومُونه چه دَ ژوندُون په کتاب کښے ليکلى دى.

⁴تاسو هميشه دَ مالِک په يووالى کښے خوشحاله اوسئ، زَۀ بيا دا وايم چه خوشحاله اوسئ!

⁵ستاسو نرم مزاجى دِ په ټولو خلقو ښکاره شى. مالِک راتلُونکے دے.

⁶دَ هيڅ خبرے فکر مۀ کوئ بلکه په هره خبره کښے تاسو درخواستُونه دَ دُعا اَؤ زارئ په وسيلے دَ شکر ګذارئ سره دَ خُدائے په حضُور کښے پيش کړئ.

⁷نو دَ خُدائے سلامتى چه دَ پوهے نه بيخى بهر ده، ستاسو زړُونه اَؤ خيالُونه به دَ مسيح عيسىٰ په يووالى کښے محفُوظ وساتى.

⁸نو اوس اَئے ورُوڼو! څومره خبرے چه رښتيا دى اَؤ څومره خبرے چه دَ شرافت دى، څومره خبرے چه واجبے دى اَؤ څومره خبرے چه پاکے دى، اَؤ څومره خبرے چه مينه ناکے دى اَؤ څومره خبرے چه ښايسته دى، غرض دا چه کُومے دَ نيکئ اَؤ ستائينے خبرے دى، په هغو غور کوئ.

⁹کُومے خبرے چه تاسو له ما نه زده کړے اَؤ حاصلے کړے اَؤ واؤريدلے اَؤ په ما کښے مو وليدلے، په هغو عمل کوئ، نو هغه خُدائے چه دَ سلامتئ سرچينه دے، به تاسو سره وى.

¹⁰زَۀ دَ مالِک په يووالى کښے ډير خوشحاله يم چه اَوس دَ دومره مُودے نه پس ستاسو خيال زما طرف ته بيا وشو، بے شکه چه ستاسو اول هم دا خيال وو خو موقعه په لاس نۀ وه درغلے.

¹¹دا نه چه زَۀ دَ مُحتاجئ په وجه وايم، ځکه چه ما دا زده کړى دى چه په کُوم حالت کښے يم په هغے کښے راضى يم.

¹²زَۀ په غريبئ هم پوهيږم اَؤ دَ مال په زياتوالى هم پوهيږم. که زَۀ وږے يم اَؤ که موړ، که زَۀ غريب يم اَؤ که مالدار، په ټولو حالُونو کښے دَ قناعت راز مے زده کړے دے.

¹³مسيح چه ما ته توان راکوى په هغۀ کښے زَۀ هر څۀ کولے شم.

¹⁴بيا هم تاسو ښۀ وکړل چه زما په مُصيبت کښے شريک شوئ.

¹⁵اَئے فيليپيانو! تاسو په خپله خبر يئ چه دَ زيرى په شروع کښے چه زَۀ دَ مکدونيه نه روان شوم نو ستاسو نه سيوا يو جماعت هم دَ ورکړے راکړے په مُعامله کښے زما مدد ونۀ کړو.

¹⁶لکه چه تِسلونيکيه کښے هم زما دَ حاجت پُوره کولو دَ پاره تاسو يو وار نه، بلکه دوه ځله څۀ راليږلى وُو.

¹⁷دا نۀ چه زَۀ اِنعام غواړم بلکه داسے غواړم چه ستاسو په حساب کښے زياتے راشى.

¹⁸زما سره هر څۀ شته بلکه زيات دى، خو چه ستاسو راليږلى څيزُونه مے دَ اِپفروديتوس دَ لاسه واخستل نو موړ شوم. هغه خوشبُوئ اَؤ قبُوله قُربانى ده چه خُدائے ئے خوښوى.

¹⁹زما خُدائے به ستاسو هر حاجت دَ خپل بے پايانه دولت په مُطابق دَ مسيح عيسىٰ په وسيله پُوره کړى.

²⁰زمُونږ دَ خُدائے اَؤ پلار جلال دِ تل تر تله وى! آمين.

²¹ټولو پاکانو ته چه په مسيح عيسىٰ ايمان لرى سلام وايئ، اَؤ کُوم ورُوڼه چه اوس ما سره دى تاسو ته سلام وائى.

²²ټول پاکان خصوصًا دَ قيصر د کورنئ خلق تاسو ته سلام وائى.

²³زمُونږ دَ مالِک عيسىٰ مسيح فضل دِ ستاسو دَ رُوح سره وى.