Read Pashto (Nangahari) — د پښتو مقدس کتاب کولوسيانو 4 Bible Online

کولوسيانو 4 - Pashto (Nangahari) — د پښتو مقدس کتاب bible

کولوسيانو 4

¹اَئے مالِکانو! دَ خپلو غُلامانو سره عدل اَؤ اِنصاف کوئ ځکه چه تاسو په دے پوهه يئ چه په آسمان کښے ستاسو هم يو مالِک شته.

²په دُعا کښے مشغُول اَؤ بيدار اوسئ اَؤ شکر ګذاری کوئ.

³اَؤ ورسره زمُونږ دَ پاره هم دُعا کوئ چه خُدائے مُونږ له موقعه راکړى چه دَ هغۀ پيغام واؤروُو چه مُونږ دَ مسيح هغه راز بيانولے شُو چه دَ هغۀ په سبب هم زَۀ قيد کړے شوے يم،

⁴اَؤ چه هغه داسے څرګند کړم څنګه چه ما له کول په کار دى.

⁵وخت قيمتى وګڼئ، اَؤ دَ بے ايمانانو سره دَ هوښيارئ سلُوک کوئ.

⁶ستاسو کلام دِ هميشه داسے دَ فضل نه ډک اَؤ خوندناک وى چه تاسو هر چا له مُناسب جواب ورکولے شئ.

⁷تاسو به زما په حقله زمُونږ دَ خوږ ورور اَؤ وفادار خدمتګار تخيکوس نه واؤرئ چه دَ مالِک په کار کښے زمُونږ ملګرے دے.

⁸ما هغه دَ دے دَ پاره دروليږلو چه تاسو زمُونږ په حال خبر کړى اَؤ تسلى درکړى.

⁹اَؤ دَ هغۀ سره زمُونږ اِتبارى اَؤ خوږ ورور اونيسيموس هم درځى اَؤ هغه ستاسو نه يو دے. هغوئ به تاسو ته دَ دے ځائے په باب کښے ټولے خبرے وکړى.

¹⁰اريسترخوس چه ما سره قيدى دے، سلام درليږى، اَؤ دغه شان دَ برنبا تربُور مرقوس هم، دَ چا په حقله چه تاسو ته حُکم درکړے شوے وو چه که هغه راغے نو ښۀ هر کلے ئے وکړئ،

¹¹اَؤ يسوع چه ورته يُوستوس وائى هم سلام وائى. دوئ له يهُوديانو نه درے کسان دى چه دَ خُدائے دَ بادشاهئ په کار کښے زما ملګرى دى اَؤ په هغوئ زما لويه تسلى ده.

¹²دَ عيسىٰ مسيح دَ خادم اِپفراس چه ستاسو نه يو دے، دَ هغۀ هم سلام قبُول کړئ. هغه تل ستاسو دَ پاره لاس په دُعا دے چه تاسو دِ کاملان اَؤ دَ مظبُوطے عقيدے خاوندان شئ اَؤ دَ خُدائے په مرضئ چليدُونکى پاکان شئ.

¹³زَۀ دَ هغۀ ګواه يم چه هغه ستاسو دَ پاره اَؤ دَ لوديکيه اَؤ دَ هيراپولس دَ خلقو دَ پاره ډيره خوارى کوى.

¹⁴اَؤ خوږ طبيب لُوقا اَؤ ديماس درته سلام وائى.

¹⁵دَ لوديکيه ورُوڼو اَؤ نمفاس اَؤ دَ هغے دَ کور جماعت ته سلام ووايئ.

¹⁶اَؤ هر کله چه دا خط ولولئ نو بيا ئے دَ لوديکيه په جماعت کښے هم واؤروئ، اَؤ هغه خط چه دَ لوديکيه نه راشى نو هغه تاسو هم ولولئ.

¹⁷اَؤ ارخيپوس ته ووايئ چه ”کُوم خدمت چه په مالِک کښے تا ته سپارلے شوے دے، هغه پُوره کړه.“

¹⁸زَۀ پولوس په خپل لاس تاسو ته سلام ليکم. زما زنځيرُونه په ياد ساتئ! په تاسو دِ دَ خُدائے فضل وى.