Read Pashto (Nangahari) — د پښتو مقدس کتاب يوشع 1 Bible Online

يوشع 1 - Pashto (Nangahari) — د پښتو مقدس کتاب bible

يوشع 1

¹د موسیٰ د مړینې څخه وروسته څښتن د موسیٰ د مرستیال د نون زوی یوشع سره خبرې وکړې:

²”زما خدمتګار موسیٰ مړ شوی دی. اوس ته د ټول قوم سره تیار شه او د اردن له سیند څخه هغې ځمکې ته واوړه چې زه یې هغوی یعنې اسراییلیانو ته ورکوم.

³لکه څنګه چې ما له موسیٰ سره وعده کړې وه، په هر ځای چې تاسو قدم کېږدئ هغه به تاسو ته درکړم.

⁴ستاسو سیمه به د جنوبي دښتې څخه د لبنان تر غرونو پورې او د فرات د لوی سیند څخه یعنې د حیتیانو د ټول هېواد څخه په لوېدیځ کې د مدیترانې تر بحیرې پورې ورسیږي.

⁵ای یوشع، ترڅو چې ته ژوندی یې هیڅوک به ونه شي کولی چې ماتې درته درکړي. زه به ستا سره مل یم لکه څنګه چې د موسیٰ سره وم. زه به همېشه ستا سره مل یم او تا به هیڅکله پرېنږدم.

⁶نو قوي او زړور اوسه، ځکه څنګه چې دغه قوم هغه ځمکه چې د هغو د نیکونو سره مې وعده کړې ده نیسي، نو ته به د هغوی مشري کوې.

⁷نو قوي او ډېر زړور اوسه. په غور سره د هغه ټول شریعت څخه چې زما خدمتګار موسیٰ درته درکړی دی اطاعت وکړه. د هغه هیڅ کومه برخه له نظره ونه غورزوې نو ته به په هر ځای کې بریالی اوسې.

⁸ستاسو په هغه عبادت کې چې په ګډه سره کیږي باید همېشه د تورات کتاب په لوړ اواز سره ولولې. هغه شپه او ورځ مطالعه کړه او هرڅه چې په هغه کې لیکل شوي دي په غور سره د هغو څخه اطاعت وکړه. نو بیا به ته نېکمرغه او بریالی اوسې.

⁹دا په یاد ساته چې ما تاته حکم کړی دی چې قوي او زړور اوسه. مه وېرېږه او جرأت له لاسه مه ورکوه. زه ستا څښتن خدای یم او هر چېرې چې ځې زه به ستا سره مل یم.“

¹⁰نو یوشع د اسراییلو مشرانو ته حکم وکړ:

¹¹”په کمپ کې وګرځئ او خلکو ته ووایئ: یو څه خواړه تیار کړئ. ځکه چې تاسو به په درې ورځو کې د اردن له سیند څخه پورې وځئ او هغه ځمکه به ونیسئ چې زمونږ څښتن خدای یې درکوي.“

¹²یوشع د روبین، جاد او د منسي نیمې قبیلې ته وویل:

¹³”په یاد ساتئ چې د څښتن خدمتګار موسیٰ تاسو ته څنګه ویلي وو چې زمونږ څښتن خدای به تاسو ته دا ځمکه چې د اردن د سیند په ختیځه غاړه پرته ده درکړي چې هلته په سوله کې ژوند وکړئ.

¹⁴ستاسو ښځې، ماشومان او څاروي به دلته پاتې شي، مګر ستاسو هغه نفر چې په وسلو باندې سمبال دي باید د نورو اسراییلیانو څخه مخکې د سیند څخه تېر شي چې د هغوی سره مرسته وکړي

¹⁵ترڅو هغوی هغه ځمکه ونیسي کومه چې د اردن د سیند په لوېدیځ کې پرته ده او څښتن هغوی ته ورکړې ده. کله چې هغه د اسراییلو ټولو قبیلو ته ارامي راوستله، نو بیا تاسو کولی شئ چې بېرته راشئ او په خپله خاوره کې واوسېږئ کومه چې د اردن د سیند په ختیځ کې پرته ده او موسیٰ تاسو ته درکړې ده.“

¹⁶هغوی یوشع ته په ځواب کې وویل: ”څه چې تا مونږ ته ویلي دي هغه ټول به سرته ورسوو او هرچېرته چې مونږ لېږې هلته به ځو.

¹⁷لکه څنګه چې مونږ همېشه د موسیٰ اطاعت کاوه، هماغه شان به ستا اطاعت کوو. زمونږ څښتن خدای دې ستا سره مل وي لکه څنګه چې د موسیٰ سره مل ؤ.

¹⁸هرڅوک چې ستا په مقابل کې سرکشي وکړي یا ستا د کوم یو حکم څخه سرغړونه وکړي هغه به وژل کیږي. نو قوي او زړور اوسه!“