Read Pashto (Nangahari) — د پښتو مقدس کتاب يوشع 11 Bible Online

يوشع 11 - Pashto (Nangahari) — د پښتو مقدس کتاب bible

يوشع 11

¹کله چې د اسراییلو د بریالیتوب خبر د حاصور پادشاه یابین ته ورسېد، هغه د مادون پادشاه یوباب او د شمرون او اخشاف پادشاهانو

²او هغو پادشاهانو ته پیغام ولېږه چې د شمال په غرنۍ سیمه کې، د اردن په دره کې، د جلیل د جهیل په جنوب کې، د غرونو په لمنو کې او دور ته نژدې په غونډیو باندې اوسېدل.

³همدارنګه هغه د کنعانیانو پادشاهانو ته چې د اردن د سیند په دواړو خواوو کې اوسېدل، د اموریانو، حیتیانو، فرزیانو او یبوسیانو پادشاهانو ته چې په غرنۍ سیمه کې اوسېدل او د هغو حویانو پادشاهانو ته هم پیغام ورولېږه چې د حرمون د غره په لمنو کې د مصفه په خاوره کې اوسېدل.

⁴هغوی د خپلو ټولو عسکرو سره راغلل. هغه یو لوی لښکر ؤ او د دریاب د شګو په شان ډېر وو. هغوی ډېر زیات اسونه او جنګي ګاډۍ هم درلودې.

⁵دا ټول پادشاهان سره راغونډ شول او د میروم د خوړ سره یې کمپ جوړ کړ. هلته هغوی خپل ځواکونه سره یوځای کړل چې د اسراییلو په مقابل کې وجنګیږي.

⁶څښتن یوشع ته وویل: ”له هغوی څخه مه وېرېږه، ځکه چې زه څښتن به هغوی ټول ووژنم. سبا دا وخت به هغوی ټول مړه وي. له جګړې څخه وروسته د هغوی اسونه ګوډ کړئ او جنګي ګاډۍ یې وسوزوئ.“

⁷نو یوشع او د هغه ټول لښکر په هغوی باندې د میروم د خوړ تر څنګ ناڅاپه حمله وکړه.

⁸څښتن اسراییلیان په هغوی باندې بریالي کړل. اسراییلیانو په هغوی باندې حمله وکړه او په شمال کې یې تر مسرفوت مایم او لوی صیدون او په ختیځ کې د مصفه تر درې پورې تعقیب کړل. جګړه تر هغه وخته پورې روانه وه ترڅو چې د دښمن له خوا هیڅوک ژوندی پاتې نه شو.

⁹یوشع د هغوی سره هماغه شان کار وکړ څنګه چې څښتن په هغه باندې امر کړی ؤ: هغه د هغوی اسونه ګوډ کړل او د هغوی جنګي ګاډۍ یې وسوزولې.

¹⁰یوشع بېرته راوګرځېد، هغه د حاصور ښار ونیوه او د هغه ځای پادشاه یې وواژه. (په هغه وخت کې نورې پادشاهۍ چې پورته ورڅخه یادونه وشوه، د حاصور د پادشاه تر واکمنۍ لاندې وې.)

¹¹هغوی هلته ټول خلک ووژل. هیڅوک ژوندی پاتې نه شو او ښار یې وسوزاوه.

¹²یوشع هغه ټول ښارونه د هغو د پادشاهانو سره ونیول او ټول یې ووژل. لکه څنګه چې د څښتن خدمتګار موسیٰ امر کړی ؤ، یوشع هغوی په بشپړه توګه له منځه یوړل.

¹³خو بیاهم، اسراییلیانو د هغو ښارونو څخه چې د خاورو په ډېریو باندې ودان شوي وو هیڅ کوم ښار ونه سوزاوه، پرته له حاصور څخه چې یوشع هغه وسوزاوه.

¹⁴د اسراییلو خلکو له دې ښارونو څخه ټول قیمتي شیان او څاروي یوړل او د ځانونو دپاره یې وساتل. خو هغوی ټول خلک ووژل، هیڅوک هم ژوندی پاتې نه شو.

¹⁵څښتن خپل خدمتګار موسیٰ ته حکمونه ورکړي وو، موسیٰ هغه یوشع ته ورکړل او یوشع هغه سرته ورسول. یوشع هغه ټول کارونه ترسره کړل کوم چې څښتن په موسیٰ باندې د هغو امر کړی ؤ.

¹⁶نو یوشع دغه ټوله خاوره ونیوله: غرنۍ سیمه، د غرونو لوېدیځې لمنې، شمال او جنوب دواړه، د جوشن ټوله سیمه، ټوله جنوبي دښته او د اردن دره.

¹⁷۱۷‏-۱۸ هغه سیمه د حالق د غره څخه په جنوب کې د ادوم خواته نژدې تر بعل جاد پورې چې د لبنان په دره کې دی او د حرمون د غره لاندې پروت دی غزېدلې ده. یوشع د ډېرې مودې دپاره د دغو ټولو پادشاهانو سره وجنګېده خو هغه ټول یې ونیول او ویې وژل.

¹⁹۱۹‏-۲۰ څښتن موسیٰ ته ویلي وو چې هغه غواړي چې د دې سیمې ښارونه دې له منځه یوړل شي او د هغو خلک دې په بې رحمۍ سره ووژل شي. په دې خاطر څښتن د هغو ښارونو د خلکو زړونه سخت کړي وو چې د اسراییلو سره وجنګیږي. یوازینی ښار چې د اسراییلو د قوم سره یې سوله وکړه هغه د جبعون ښار ؤ چې ځینې حویان په کې اوسېدل. نور ښارونه د اسراییلو لښکرو په جګړه کې ونیول.

²¹په هغه وخت کې یوشع عناقیان چې لوړ قدونه یې درلودل او په حبرون، دبیر، عناب او د یهودا او اسراییلو په پاتې ټولو غرنیو سیمو کې اوسېدل هم له منځه یوړل. یوشع هغوی د خپلو ښارونو سره بېخي له منځه یوړل.

²²د عناقیانو څخه هیڅوک د اسراییلیانو په خاوره کې پاتې نه شو، یوازې په غزه، جت او اشدود کې ځینې خلک ژوندي پاتې شول.

²³څنګه چې څښتن موسیٰ ته لارښودنه کړې وه، یوشع ټوله خاوره ونیوله او هغه یې اسراییلیانو ته د هغوی د خپل ملکیت په توګه ورکړه. هغه یې په څو برخو ووېشله، هرې قبیلې ته یوه برخه ورسېدله. په آخره کې په هغه هېواد کې ارامي شوه.