Read Pashto (Nangahari) — د پښتو مقدس کتاب يوشع 13 Bible Online

يوشع 13 - Pashto (Nangahari) — د پښتو مقدس کتاب bible

يوشع 13

¹کله چې یوشع زوړ شو، څښتن هغه ته وویل: ”ته ډېر زوړ شوی یې، خو ډېره ځمکه لا پاتې ده چې باید ونیول شي.

²دا هغه ځمکه ده چې پاتې ده: د فلسطینیانو او د جشوریانو ټوله سیمه،

³همدارنګه د عویانو سیمه تر جنوب پورې (د شیحور څخه نیولې چې د مصر په پولې کې وه د عقرون تر پولې پورې چې په شمال کې وه، د کنعانیانو ځمکه ګڼل کېده. د فلسطین پادشاهان په غزه، اشدود، اشقلون، جت او عقرون کې اوسېدل)،

⁴د کنعانیانو ټول هېواد او میعاره چې په صیدونیانو پورې اړه لري تر افیق پورې چې د اموریانو په پولې کې دی،

⁵د جبلیانو ځمکه او ټول لبنان تر ختیځ پورې، له بعل جاد څخه نیولې چې د حرمون د غره جنوب خواته پروت دی د حمات تر غاښي پورې.

⁶په دې کې د صیدونیانو چې د لبنان د غرونو او د مسرفوت مایم ترمنځ په غرنۍ سیمه کې اوسیږي ټوله سیمه شامله ده. زه به په خپله د اسراییلو له مخې څخه دا خلک لېرې کړم. څنګه چې ما په تا باندې امر کړی دی، ته باید دا ځمکه د اسراییلیانو په منځ کې ووېشې.

⁷بیا دا ځمکه په هغو نهو قبیلو او د منسي په نیمې قبیلې ووېشه چې تر اوسه پورې ځمکه نه لري چې د هغوی ملکیت شي.“

⁸موسیٰ لا پخوا د روبین او جاد قبیلو او د منسي بلې نیمې قبیلې ته هغه ځمکه ورکړې وه کومه چې د اردن د سیند په ختیځه غاړه باندې پرته وه.

⁹دا سیمه د هغه ښار څخه چې د ارنون د درې په منځ کې ؤ او په هغې کې د عروعیر ښار چې د هغې درې په شمالي څنډه کې ؤ شامل ؤ، شمال خواته غزېدلې ده. په هغې کې د دیبون په شمال کې د میدبا لوړه جلګه شامله وه.

¹⁰د هغوی سیمه د عمون تر پولې پورې رسېدله. همدارنګه په هغې کې هغه ټول ښارونه هم شامل وو چې د اموریانو پادشاه سیحون به ورباندې د حشبون له ښار څخه حکومت کاوه.

¹¹په هغې کې جلعاد، د جشور او معکې سیمې، د حرمون ټول غر او ټول باشان تر سلخه پورې شامل وو.

¹²په هغې کې د عوج پادشاهي شامله وه. عوج د رفائیانو له جملې څخه یوازینی نفر ؤ چې ژوندی پاتې شوی ؤ او په عشتاروت او ادرعي کې یې پادشاهي کوله. موسیٰ دې خلکو ته ماتې ورکړې وه او هغوی یې شړلي وو.

¹³خو بیاهم اسراییلیانو جشوریان او معکیان ونه شړل، نو هغوی تر نن ورځې پورې د اسراییلیانو په منځ کې اوسیږي.

¹⁴موسیٰ د لاوي قبیلې ته هیڅ ځمکه نه وه ورکړې، ځکه چې د اسراییلو څښتن خدای هغوی ته ویلي وو: ”تاسو به د ځمکې په ځای هغه قربانۍ ترلاسه کوئ کومې چې زما په قربانګاه باندې سوزول کیږي.“

¹⁵موسیٰ د روبین په قبیله کې هرې یوې طایفې ته ځمکه ورکړه.

¹⁶د هغوی ځمکه په جنوب کې په هغه ښارګوټي کې شروع کېدله چې د ارنون د درې په منځ کې ؤ. په هغې کې د عروعیر ښارګوټی چې د درې په شمالي څنډه کې ؤ، شامل ؤ او په شمال کې د میدبا د شاوخوا لوړې جلګې پورې رسېدله.

¹⁷په دې کې حشبون او کوم ښارګوټي چې په لوړې جلګې باندې پراته وو یعنې دیبون، باموت بعل، بیت بعل معون،

¹⁸یاهص، قدیموت، میفاعت،

¹⁹قریتایم، سبمه، سارت شحر چې په دره کې په غونډۍ باندې ؤ،

²⁰بیت فغور، د پیسګاه د غره ډډې او بیت یشیموت ټول شامل وو.

²¹هغه ټول ښارګوټي چې په لوړې جلګې باندې پراته وو او د سیحون ټوله پادشاهي (سیحون د اموریانو پادشاه ؤ او په حشبون کې یې حکومت کاوه) شامل وو. موسیٰ سیحون او د مدیانیانو مشرانو یعنې اوي، راقم، صور، حور او رابع ته ماتې ورکړې وه. دا مشران چې په هغه هېواد کې اوسېدل د سیحون سره ملګري شول.

²²په هغو خلکو کې چې د اسراییلیانو له خوا وژل شوي وو، بلعام د بعور زوی چې فال کتونکی ؤ هم شامل ؤ.

²³دا سیمه او د هغې ښارونه او کلي د روبین قبیلې ته د هغوی د ملکیت په توګه ورکړل شول او د اردن سیند د هغې لوېدیځه پوله وه.

²⁴همدارنګه موسیٰ د جاد په قبیله کې هرې یوې طایفې ته ځمکه ورکړه.

²⁵د هغوی په سیمه کې یعزیر، د جلعاد ټول ښارګوټي او د عمون نیمه ځمکه تر عروعیر پورې چې د ربه په ختیځ کې وه شامل وو.

²⁶د هغوی ځمکه د حشبون څخه نیولې تر رامت مصفه او بطونیم پورې او د محنایم څخه نیولې د دبیر تر سیمې پورې وه.

²⁷د اردن د درې په هغه سیمه کې چې جاد ته ورکړل شوې وه په هغې کې بیت هارام، بیت نمره، سوکوت او صافون یعنې د حشبون د پادشاه سیحون پخوانۍ پادشاهي شامله وه. د هغوی لوېدیځه پوله د اردن سیند ؤ او هغه په شمال کې د جلیل تر جهیل پورې رسېدله.

²⁸دا هغه سیمې او د هغو ښارګوټي او کلي وو چې د جاد قبیلې ته ورکړل شول.

²⁹موسیٰ د منسي په نیمه قبیله کې هرې یوې طایفې ته ځمکه ورکړه.

³⁰د هغوی سیمه تر محنایم پورې وه او په هغې کې د باشان پادشاه عوج ټوله پادشاهي او همدارنګه په باشان کې د یائیر ټول شپېته کلي شامل وو.

³¹په دې کې نیم جلعاد، همدارنګه عشتاروت او ادرعي یعنې په باشان کې د عوج د پادشاهۍ شاهي ښارونه شامل وو. دا ټول هغو نیمو طایفو ته ورکړل شول چې له ماخیر یعنې د منسي د زوی څخه د اولادې په توګه پاتې وې.

³²په دې ډول موسیٰ د موآب ډاګونه چې د اردن د سیند په بله غاړه او د اریحا په ختیځ کې وو ووېشل.

³³خو موسیٰ د لاوي قبیلې ته هیڅ ځمکه ورنه کړه، ځکه چې څښتن وعده کړې وه چې هغه به همېشه د هغوی اړتیاوې پوره کوي.