Read Pashto (Nangahari) — د پښتو مقدس کتاب يوشع 14 Bible Online

يوشع 14 - Pashto (Nangahari) — د پښتو مقدس کتاب bible

يوشع 14

¹هغه ځمکې چې بني اسراییلو د کنعان په خاوره کې ترلاسه کړې، العازار کاهن، د نون زوی یوشع او د قوم مشرانو د هغوی ترمنځ ووېشلې.

²لکه څنګه چې څښتن د موسیٰ په وسیله امر کړی ؤ، د اردن د سیند په لوېدیځ کې د نهو قبیلو او نیمې قبیلې سیمې د پچې اچولو په وسیله وټاکل شوې.

³۳‏-۴ موسیٰ پخوا هغه ځمکه چې د اردن د سیند په ختیځ کې وه نورو دوه نیمو قبیلو ته ورکړې وه. (د یوسف اولاده په دوو قبیلو وېشل شوې وه: د منسي او افرایم قبیلې.) خو موسیٰ لاویانو ته د سیمې هیڅ کومه برخه نه وه ورکړې. د هغې په ځای هغوی ښارګوټي ترلاسه کړل چې په کې واوسیږي او د خپلو پادو او رمو دپاره څړځایونه.

⁵نو اسراییلیانو د څښتن د امر له مخې چې موسیٰ ته یې کړی ؤ ځمکه ووېشله.

⁶یوه ورځ د یهودا د قبیلې یو څو نفره په جلجال کې یوشع ته راغلل. د هغو څخه یو نفر کالیب د قنزي یفنه زوی هغه ته وویل: ”آیا ستا په یاد دي چې څښتن خپل نبي موسیٰ ته په قادش برنیع کې زما او ستا په هکله څه وویل؟

⁷زه څلوېښت کلن وم کله چې د څښتن خدمتګار موسیٰ له قادش برنیع څخه ولېږلم چې د دې خاورې جاسوسي وکړم. نو څه چې ما لیدلي وو د هغو په باره کې مې هغه ته حقیقت ووایه.

⁸خو زما سره چې کوم نفر تللي وو، هغوی زمونږ خلک دې خاورې ته د تللو څخه ووېرول. خو ما په وفادارۍ سره د خپل څښتن خدای مقصد سرته ورساوه.

⁹په هماغه ورځ زه بېرته راغلم او موسیٰ راته وویل: څرنګه چې ته څښتن خدای ته وفادار وې نو زه وعده کوم چې په کومه خاوره کې چې ته ګرځېدلی یې، هغه به د تل دپاره ستا او ستا د اولادې شي.

¹⁰یوشع، پنځه څلوېښت کاله مخکې څښتن موسیٰ ته ویلي وو چې دا وعده وکړي او اوس زه پنځه اتیا کلن یم. که څه هم اسراییل په دښته کې یو ځای او بل ځای ګرځېدل، خو لکه څنګه چې څښتن ویلي وو، هغه په دې ټول وخت کې زه ژوندی وساتلم.

¹¹زه نن هم د هماغه وخت په شان چې موسیٰ ولېږلم قوي یم. کوم قوت چې ما په هغه وخت کې درلود، اوس یې هم لرم او د جګړې او نورو کارونو دپاره تیار یم.

¹²اوس دغه غرنۍ سیمه چې په هغه ورځ څښتن زما سره د هغې وعده کړې وه ماته راکړه. تا په خپله په هغه ورځ واورېدل چې لوړ قدي عناقیان هلته اوسیږي او د هغوی ښارونه لوی دي او دېوالونه لري، خو لکه څنګه چې څښتن ویلي دي هغه به زما سره مرسته وکړي چې هغوی وشړم.“

¹³بیا یوشع کالیب ته برکت ورکړ او هغه ته یې د حبرون ښار د هغه د ملکیت په توګه ورکړ.

¹⁴نو حبرون تر اوسه پورې د کالیب د اولادې ملکیت دی، ځکه چې هغه په وفادارۍ سره د اسراییلو د څښتن خدای اطاعت کړی ؤ.

¹⁵له دې څخه مخکې حبرون د اربع د ښار په نوم یادېده. اربع د عناقیانو په منځ کې یو لوی اتل ؤ. نو بیا په هېواد کې ارامي شوه.