Read Pashto (Nangahari) — د پښتو مقدس کتاب يوشع 4 Bible Online

يوشع 4 - Pashto (Nangahari) — د پښتو مقدس کتاب bible

يوشع 4

¹کله چې ټول قوم د اردن له سیند څخه تېر شو، څښتن یوشع ته وویل:

²”د اسراییلو د قوم څخه دولس تنه وټاکه یعنې د هرې قبیلې څخه یو یو نفر

³او هغوی ته حکم وکړه چې د اردن د سیند له منځ څخه یعنې له هماغه ځای څخه چېرته چې کاهنان ولاړ وو دولس تیږې راواخلي. هغوی ته ووایه چې دا تیږې له ځانه سره یوسي او په هغه ځای کې یې کېږدي چېرته چې تاسو نن شپه خېمې ودروئ.“

⁴نو یوشع هغه دولس نفره کوم چې هغه غوره کړي وو، راوغوښتل

⁵او هغوی ته یې وویل: ”د اردن د سیند منځ ته هغه ځای ته چې د لوظ صندوق په کې دی لاړ شئ. تاسو هر یو د اسراییلو د قبیلو د شمېر په مطابق یوه یوه تیږه واخلئ او په خپلو اوږو باندې یې کېږدئ.

⁶دا تیږې به خلکو ته هغه کارونه ورپه یادوي کوم چې څښتن کړي دي. په راتلونکي کې کله چې ستاسو اولادونه درڅخه پوښتنه وکړي چې دا تیږې ستاسو دپاره څه معنیٰ لري؟

⁷تاسو به هغوی ته وایئ کله چې د څښتن د لوظ صندوق د اردن د سیند څخه تېرېده د سیند اوبه ودرېدلې. دا تیږې به همېشه د اسراییلو قوم ته دا خبره ورپه یادوي چې دلته څه پېښ شول.“

⁸هغو نفرو د یوشع حکمونه په ځای کړل. څنګه چې څښتن په یوشع باندې امر کړی ؤ، هغوی د اردن د سیند له منځ څخه دولس تیږې راواخیستې یعنې د اسراییلو د هرې قبیلې دپاره یوه تیږه وه. هغوی دا تیږې د خېمو د ودرولو ځای ته یوړې او هلته یې کېښودې.

⁹یوشع د اردن د سیند په منځ کې چېرته چې د لوظ د صندوق وړونکي کاهنان ولاړ وو هم دولس تیږې ودرولې. (هغه تیږې تر اوسه پورې هلته دي.)

¹⁰کاهنان تر هغه وخته پورې د اردن د سیند په منځ کې ولاړ پاتې شول ترڅو چې قوم هغه ټول کارونه سرته ورسول چې څښتن په یوشع باندې د هغو حکم کړی ؤ. دا هغه څه وو چې موسیٰ هم مخکې یوشع ته حکم کړی ؤ. نو قوم په بیړه د اردن له سیند څخه تېر شو.

¹¹کله چې هغوی ټول بلې غاړې ته پورې وتل، کاهنان د څښتن د لوظ د صندوق سره د قوم په مخ کې پورې وتل.

¹²د روبین او جاد د قبیلو او د منسي د نیمې قبیلې نفر د جګړې دپاره تیار وو او لکه څنګه چې موسیٰ هغوی ته ویلي وو، هغوی د پاتې قوم په مخ کې پورې وتل.

¹³تقریباً څلوېښت زره نفر د جګړې دپاره تیار وو او هغوی د څښتن په حضور کې هغه ډاګ ته چې اریحا ته نژدې ؤ، ورتېر شول.

¹⁴په هغه ورځ څښتن یوشع د ټولو اسراییلو په نظر کې سرلوړی کړ. ترڅو پورې چې هغه ژوندی ؤ هغوی د هغه احترام کاوه لکه څنګه چې هغوی د موسیٰ احترام کاوه.

¹⁵بیا څښتن یوشع ته وویل

¹⁶چې په هغو کاهنانو باندې چې د لوظ صندوق انتقالوي امر وکړي چې د اردن له سیند څخه راووزي.

¹⁷یوشع هماغسې وکړل

¹⁸او کله چې کاهنان د سیند غاړې ته ورسېدل نو سمدلاسه د سیند اوبو بېرته په بهېدلو شروع وکړه او د سیلاب په شان بیا د سیند له غاړو څخه پورته شولې.

¹⁹د اولې میاشتې په لسمه ورځ قوم د اردن له سیند څخه تېر شو او په جلجال کې یې چې د اریحا ختیځې خواته پروت ؤ خېمې ودرولې.

²⁰یوشع په جلجال کې هغه دولس تیږې ودرولې کومې چې هغوی د اردن له سیند څخه راویستلې وې.

²¹هغه د اسراییلو خلکو ته وویل: ”په راتلونکي کې کله چې ستاسو اولادونه ستاسو څخه پوښتنه وکړي چې دا تیږې څه معنیٰ لري؟

²²تاسو به هغوی ته د هغه وخت په باره کې ووایئ چې اسراییلیان د اردن په سیند کې په وچه ځمکه باندې پورې وتل.

²³هغوی ته ووایئ چې زمونږ څښتن خدای زمونږ په خاطر د اردن د سیند اوبه وچې کړې ترڅو مونږ ورڅخه تېر شو، لکه څنګه چې هغه زمونږ دپاره د سرې بحیرې اوبه وچې کړې وې.

²⁴هغه دا کارونه ځکه وکړل چې د ځمکې په مخ ټول قومونه پوه شي چې د څښتن قدرت څومره زیات دی او تاسو به د تل دپاره د خپل څښتن خدای څخه وېره کوئ.“