Read Pashto (Nangahari) — د پښتو مقدس کتاب فيليمون 1 Bible Online

فيليمون 1 - Pashto (Nangahari) — د پښتو مقدس کتاب bible

فيليمون 1

¹دَ پولوس له طرفه چه دَ مسيح عيسىٰ له خاطره په قيد کښے دے اَؤ دَ ورور تيموتيوس له طرفه، خپل ګران اَؤ ملګرى فيليمون ته،

²اَؤ خور افيه اَؤ خپل ملګرى اَؤ دَ مسيح سپاهى ارخيپوس اَؤ دَ فيليمون دَ کور دَ جماعت په نُوم،

³زمُونږ دَ خُدائے پلار اَؤ مالِک عيسىٰ مسيح دَ طرفه دِ فضل اَؤ سلامتى تاسو ته حاصله وى.

⁴زَۀ هميشه دَ خپل خُدائے شکر کوم اَؤ تا په خپلو دُعاګانو کښے يادوم،

⁵ځکه چه ما ستا دَ هغه مينے اَؤ ايمان په حال آؤريدو چه تۀ ئے دَ ټولو پاکانو اَؤ عيسىٰ مسيح سره لرے،

⁶دَ دے دَ پاره چه ستا دَ ايمان شراکت زمُونږ دَ هر خوئ په پيژندو کښے دَ مسيح دَ پاره اثر ولرى.

⁷ځکه چه اَئے وروره! ما ته ستا په مينه ډيره خوشحالى اَؤ تسلى شوے ده ځکه چه ستا په سبب دَ پاکانو زړُونه تازه شوى دى.

⁸نو اګر که زَۀ په مسيح کښے ښۀ زړه ور يم چه تا ته دِ مُناسب حُکم درکړم،

⁹خو ما ته دا زياته غوره ښکارى چه زَۀ بوډا پولوس بلکه په دے وخت کښے دَ مسيح عيسىٰ له خاطره چه په قيد کښے يم،

¹⁰دَ مينے په سبب درته دا سوال کوم چه دَ خپل زوئے اونيسيموس په حقله، څوک چه دَ قيد په حالت کښے په رُوحانى طور زما نه پيدا شو، درته دا خواست کوم.

¹¹اول خو هغه ستا دَ څۀ کار نۀ وو، ولے اوس ستا اَؤ زما دواړو دَ کار دے.

¹²نو ما په خپله هغه، يعنے زما دَ سترګو تور، تا ته دراستولے دے.

¹³هغه خو ما ځان سره پاتے کول غوښتۀ دَ دے دَ پاره چه ستا له طرفه زما خدمت وکړى، چه دَ زيرى دَ خاطره په دے قيد کښے يم.

¹⁴خو ستا دَ مرضئ نه بغير ما هيڅ داسے کار کول ونۀ غوښتل، دَ دے دَ پاره چه ستا نيک کار دَ مجبورئ په وجه نه، بلکه دَ خوشحالئ سره وى.

¹⁵ځکه چه کيدے شى چه اونيسيموس ستا نه دَ دے دَ پاره لږ وخت له جُدا شوے وى چه بيا تل دَ تا سره وى.

¹⁶خو اوس ئے دَ غُلام په شان نه، بلکه دَ غُلام نه غوره، يعنے دَ يو خوږ ورور په شان چه هغه په ما ډير ګران دے، ځکه چه هغه غُلام هم اَؤ په مالِک کښے ورور هم دے، نو ځکه په تا دِ هم ډير زيات ګران وى.

¹⁷نو کۀ تۀ ما خپل شريک ګڼے نو دَئے داسے قبُول کړه لکه ما،

¹⁸اَؤ که دَۀ چرے ستا څۀ نُقصان کړے وى اَؤ يا پرے ستا څۀ پور وى نو هغه ما پسے وليکه.

¹⁹زَۀ پولوس درته دا په خپل لاس ليکم چه په خپله به ئے ادا کړم، اَؤ دَ دے وينا هيڅ جاجت نِشته چه زما چه په تا څۀ پور دے هغه هم تۀ ئے.

²⁰اَئے وروره! دَ مالِک دَ خاطره په ما مهربانى وکړه اَؤ په مسيح کښے دَ يو ورور په حيثيت په دے کار کښے ما خوشحاله کړه.

²¹تا ته په ليکلو زما باور دے چه تۀ به زما درخواست پُوره کړے، بلکه دَ هغے نه هم زيات.

²²دَ دے نه علاوه زما دَ ايساريدو دَ پاره يوه کوټه تياره کړئ ځکه چه زما اُميد دے چه ستاسو خلقو دَ دُعاګانو په جواب کښے خُدائے به مے برى کړى اَؤ تاسو ته به مے درورسوى.

²³اِپفراس چه دَ مسيح له خاطره ما سره قيدى دے تا ته سلام وائى،

²⁴اَؤ مرقوس، اريسترخوس، ديماس اَؤ لُوقا هم چه په کار کښے ما سره ملګرى دى.

²⁵زمُونږ دَ مالِک عيسىٰ مسيح فضل دِ ستاسو ټولو سره وى.