Read Pashto (Nangahari) — د پښتو مقدس کتاب پطروس اول 1 Bible Online

پطروس اول 1 - Pashto (Nangahari) — د پښتو مقدس کتاب bible

پطروس اول 1

¹دَ پطروس له طرفه چه دَ عيسىٰ مسيح رسُول دے، دَ خُدائے دَ هغو غوره شوؤ مُهاجرينو په نُوم چه دَ پونطوس، ګلتيه، کپدوکيه، ايشيا اَؤ بيتونيه په صوبو کښے خوارۀ وارۀ دى،

²اَؤ دَ خُدائے پلار دَ ازلى اِرادے په مُطابق تاسو دَ رُوحُ القُدس په پاکولو سره دَ عيسىٰ مسيح فرمانبردار شوئ اَؤ دَ عيسىٰ مسيح وينه ستاسو دَ پاره تويه شوه چه تاسو پاک شئ. دَ فضل اَؤ دَ سلامتئ زياتوالے دِ تاسو سره وى.

³زمُونږ دَ مالِک عيسىٰ مسيح اَؤ دَ خُدائے پلار دِ ثنا وى، چه دَ عيسىٰ مسيح دَ مړو نه دَ بيا ژوندى کولو په سبب ئے په خپل لوئے رحمت سره مُونږ دَ ژوندى اُميد دَ پاره بيا پيدا کړُو،

⁴چه يو نۀ فنا کيدُونکے، بے داغه اَؤ لازواله ميراث حاصل کړُو چه هغه ستاسو دَ پاره په آسمان کښے ساتلے شوے دے.

⁵خُدائے تاسو دَ ايمان په وسيله په خپل قُدرت سره محفُوظ ساتى دَ هغه خلاصُون دَ پاره چه په آخرى وخت کښے ښکاره کيدو ته تيار دے.

⁶دَ دے په سبب تاسو خوشحالئ کوئ اګر که اوس دَ څو ورځو دَ پاره دَ قِسما قِسم آزميښتُونو په سبب غم زپلى يئ.

⁷اَؤ دا ځکه دے چه ستاسو آزمئيلے شوے ايمان خالص شى، کُوم ايمان چه په اور آزمئيلى شوؤ فانى سرو زرو نه هم ډير زيات قيمتى دے، اَؤ چه دَ عيسىٰ مسيح دَ ښکاره کيدو په وخت دَ ستائينے اَؤ جلال اَؤ دَ عزت سبب وګرزئ.

⁸تاسو دَ هغۀ سره مينه لرئ چه مو ليدلے نۀ دے، اَؤ سره دَ دے چه په دے وخت هغه نۀ وينئ بيا هم په هغۀ ايمان راؤړئ، اَؤ داسے خوشحالئ کوئ چه دَ بيان نه بهر اَؤ دَ جلال نه ډکے وى،

⁹اَؤ دَ خپل ايمان مقصد، يعنے دَ رُوحُونو خلاصُون حاصلوئ.

¹⁰دَ دے خلاصُون په باره کښے هغو نبيانو ډير لټُون اَؤ تحقيق وکړو اَؤ دَ هغه فضل په باب کښے چه په تاسو کيدُونکے وو، ئے پيشن ګوئى وکړه.

¹¹دَ مسيح رُوح په هغوئ کښے وو اَؤ دا ګواهى ئے ورکوله چه مسيح به تکليفُونه وزغمى اَؤ بيا به جلال ومُومى، نو بيا نبيانو دَ دے معلُومولو کوشِش وکړو چه دَ رُوح دا اِشاره به په څۀ وخت اَؤ په کُومه زمانه کښے پُوره کيږى.

¹²هغوئ ته دا ښکاره کړے شوه چه دَ هغوئ دا خدمت دَ خپل ځان دَ پاره نۀ وو بلکه ستاسو دَ پاره وو. نبيانو دَ هغه خبرو بيان هم وکړو چه تاسو هم دَ پيغمبرانو په وسيله په زيرى کښے آؤريدلے دى، خُدائے دَ آسمان نه خپل رُوحُ القُدس رااستولو سره دا پيغام واؤرولو. دا داسے خبرے دى چه فرښتے هم پرے دَ ځان پوهيدلو خواهش مندے وے.

¹³دَ دے دَ پاره دَ خپل عقل نه کار واخلئ اَؤ هوښيار شئ، اَؤ دَ هغه فضل کامل اُميد لرئ کُوم چه دَ عيسىٰ مسيح دَ ظاهريدو په وخت په تاسو کيدُونکے دے.

¹⁴اَؤ تابعدار بچى جوړ شئ، دَ خپل جهالت دَ زمانے دَ هغه زړو خواهشاتو غُلامان مه جوړيږئ.

¹⁵بلکه لکه چه ستاسو رابلُونکے پاک دے هم هغه شان تاسو هم په خپل ټول چال چلن کښے پاک شئ.

¹⁶لکه چه صحيفے وائى چه ”پاک شئ ځکه چه زَۀ پاک يم.“

¹⁷اَؤ چه تاسو ورته پلار وايئ نو دَ هغه خُدائے نه دُعا غواړئ چه دَ هر چا دَ عمل په مُطابق بغير دَ طرفدارئ نه اِنصاف کوى، نو دَ خپل هجرت وخت په ويره تير کړئ.

¹⁸ځکه چه تاسو خبر يئ چه ستاسو فضُول چال چلن چه دَ پلار نيکه نه مو مُوندلے دے دَ هغے نه ستاسو خلاصُون دَ فانى څيزُونو، يعنے سرو يا سپينو زرو په وسيله ونۀ شو،

¹⁹بلکه دَ يو روغ رحمت اَؤ بے داغه ګډُورى، يعنے دَ مسيح دَ قيمتى وينے په وسيله.

²⁰خُدائے هغه خو دَ دُنيا دَ جوړيدو نه اول غوره کړے وو خو ظهُور ئے په آخرى زمانه کښے ستاسو دَ پاره وشو،

²¹چه تاسو دَ هغۀ په وسيله په خُدائے ايمان راوړے دے چه هغه ئے دَ مړو نه ژوندے کړو اَؤ جلال ئے ورکړو، دَ پاره دَ دے چه ستاسو ايمان اَؤ اُميد هم په خُدائے وى.

²²کله چه تاسو دَ حق په تابعدارئ سره خپل زړُونه پاک کړى دى اَؤ دَ هغے په وجه دَ ورُوڼو دَ پاره بے رِيا مينه پيدا شوه، نو دَ دے دَ پاره په خپلو کښے دَ زړۀ نه ډيره مينه لرئ.

²³ځکه چه تاسو دَ فانى تُخم نه نه، بلکه دَ خُدائے دَ کلام په وسيله کُوم چه ژوندے اَؤ قائم دے، دَ غير فانى تُخم نه بيا پيدا شوى يئ.

²⁴ځکه چه : ”هر بشر دَ واښو په شان دے اَؤ دَ هغۀ ټول شان و شوکت دَ واښو دَ ګُل په شان، واښۀ وچيږى اَؤ ګُل ئے رژيږى

²⁵خو دَ خُدائے کلام به تل تر تله قائم پاتے وى.“ اَؤ دا دَ هغۀ دَ زيرى کلام دے چه تاسو ته آؤرولے شوے وو.