Read Pashto (Nangahari) — د پښتو مقدس کتاب يوحنا اول 5 Bible Online

يوحنا اول 5 - Pashto (Nangahari) — د پښتو مقدس کتاب bible

يوحنا اول 5

¹هر هغه څوک چه دا ايمان لرى چه عيسىٰ هم مسيح دے، هغه له خُدائے نه پيدا شوے دے. نو څوک چه دَ پلار سره مينه لرى هغه هم دَ هغۀ دَ بچى سره مينه لرى.

²که مُونږ دَ خُدائے سره مينه لرُو اَؤ دَ هغۀ په حُکمُونو عمل کوُو نو مُونږ خبر يُو چه دَ هغۀ دَ بچو سره هم مينه لرُو.

³ځکه چه دَ خُدائے سره مينه لرل دَ هغۀ په حُکمُونو عمل کول دى، اَؤ هغه څۀ پيټے نۀ دے.

⁴ځکه چه دَ خُدائے هر يو بچے په دُنيا غالب دے. کُومه فتح چه دُنيا ته شِکست ورکوى، هغه زمُونږ ايمان دے.

⁵هغه څوک په دُنيا غالب دے چه په دے ايمان لرى چه عيسىٰ دَ خُدائے زوئے دے.

⁶عيسىٰ مسيح هغه دے چه دَ اوبو دَ بپتسمے اَؤ دَ وينے سره راغے، اَؤ هغه يواځے په اوبو سره نه، بلکه دَ اوبو اَؤ وينے سره راغے. اَؤ رُوحُ القُدس دَ دے ګواهى کوى ځکه چه رُوحُ القُدس حقيقت دے.

⁷اَؤ درے ګواهان دى،

⁸يعنے رُوحُ القُدس، اوبۀ اَؤ وينه، اَؤ دا درے واړه په يو اِتفاق دى.

⁹مُونږ دَ اِنسان ګواهى قبلوُو خو بے شکه دَ خُدائے ګواهى ډيره غوره ده اَؤ کُومه ګواهى چه هغۀ دَ خپل زوى په حقله ورکړه.

¹⁰هر هغه څوک چه دَ خُدائے په زوى ايمان لرى نو دا ګواهى به دَ هغۀ په خپل زړۀ کښے وى. خو څوک چه په خُدائے ايمان نۀ لرى نو هغۀ خُدائے داسے دروغژن وګڼلو چه دَ خُدائے خپله ګواهى دَ هغۀ دَ زوى په حقله ده، ايمان نۀ دے راوړے.

¹¹هغه ګواهى دا ده چه خُدائے مُونږ له دَ تل ژوندُون راکړے دے اَؤ دا ژوندُون دَ هغۀ په زوى کښے دے.

¹²څوک چه دَ خُدائے زوئے لرى هغه ژوندُون هم لرى، اَؤ څوک چه دَ خُدائے زوئے نۀ لرى هغه ژوندُون هم نۀ لرى.

¹³دا خط تاسو ته دا يقين درکوى چه تاسو دَ تل ژوندُون لرئ ځکه چه تاسو دَ خُدائے دَ زوى په نامه ايمان راوړئ.

¹⁴مُونږ په دے زړه ورتيا سره خُدائے ته ودريدے شُو چه که مُونږ دَ هغۀ دَ مرضئ په مُطابق سوال ترے نه کوُو نو هغه زمُونږ آؤرى.

¹⁵اَؤ مُونږ په دے پوهه يُو چه خُدائے زمُونږ خبرے آؤرى اَؤ مُونږ په دے هم پوهيږُو چه مُونږ چه څۀ غواړُو هغه ئے راکوى.

¹⁶که څوک خپل ورور په داسے ګُناه کولو ووينى چه اَنجام ئے مرګ نۀ وى، نو هغه دِ دَ هغۀ دَ پاره دَ خُدائے نه دُعا وغواړى اَؤ هغه به ورته ژوندُون ورکړى، يعنے هغو ته چه دَ مرګ دَ پاره ګُناه نۀ کوى. داسے ګُناه هم شته چه اِنجام ئے مرګ دے اَؤ زَۀ دا نۀ وايم چه تاسو دِ دَ هغے په باب کښے دُعا وغواړئ.

¹⁷خو سره دَ دے چه ټول بد کارُونه ګُناه دى خو داسے ګُناه هم شته چه اَنجام ئے مرګ نۀ دے.

¹⁸مُونږ په دے پوهه يُو چه هر څوک چه دَ خُدائے نه پيدا شوے دے په ګُناه کښے نۀ اوسيږى، ځکه چه دَ خُدائے زوئے دَ هغۀ حفاظت کوى اَؤ اِبليس هغۀ ته ورنزدے کيدے نۀ شى.

¹⁹مُونږ په دے پوهه يُو چه مُونږ دَ خُدائے کورنئ يُو، اَؤ ټوله دُنيا دَ شرير په قبضه کښے ده.

²⁰مُونږ په دے خبر يُو چه دَ خُدائے زوئے راغلے دے اَؤ مُونږ ته ئے دا پوهه راکړے ده چه هغه وپيژنُو چه رښتنے دے. مُونږ بے شکه په هغۀ کښے يُو چه رښتينے دے ځکه چه مُونږ دَ هغۀ په زوى عيسىٰ مسيح کښے يُو. هغه رښتينے خُدائے اَؤ دَ تل ژوندُون دے.

²¹زما بچو! دَ دروغو خُدايانو نه خبردار اوسئ.