Read Pashto (Nangahari) — د پښتو مقدس کتاب قاضيان 10 Bible Online

قاضيان 10 - Pashto (Nangahari) — د پښتو مقدس کتاب bible

قاضيان 10

¹د ابیملک له مړینې څخه وروسته د فواه زوی او د دودو لمسی تولع د اسراییلو د ژغورلو دپاره راغی. هغه د یساکار له قبیلې څخه ؤ او د افرایم په غرنۍ سیمه کې د شامیر په ښارګوټي کې اوسېده.

²هغه درویشت کاله د اسراییلو مشر ؤ. بیا هغه مړ شو او په شامیر کې ښخ کړای شو.

³له تولع څخه وروسته جلعادي یائیر راغی. هغه دوه ویشت کاله د اسراییلو مشر ؤ.

⁴هغه دېرش زامن درلودل چې هر یو خپل خر درلود. هغوی په جلعاد کې دېرش ښارګوټي درلودل چې تر نن ورځې پورې د یائیر د ښارګوټو په نوم یادیږي.

⁵کله چې یائیر مړ شو هغه په قامون کې ښخ کړای شو.

⁶اسراییلیانو یو ځل بیا د څښتن په مقابل کې ګناه وکړه او د بعل او عشتاروت بتانو او د سوریې، صیدون، موآب، عمون او فلسطین خدایانو ته یې په عبادت لاس پورې کړ. هغوی څښتن پرېښود او د هغه عبادت کول یې بس کړل.

⁷نو څښتن په هغوی باندې په قهر شو او هغوی یې فلسطینیانو او عمونیانو ته په لاس ورکړل،

⁸اتلس کاله هغوی ظلم وکړ او ټول اسراییلیان یې چې په جلعاد کې د اردن د سیند ختیځ خواته د اموریانو په هېواد کې اوسېدل وځورول.

⁹عمونیان د یهودا، بنیامین او افرایم د قبیلو سره د جګړې دپاره حتیٰ د اردن له سیند څخه تېر شول. اسراییلیان په ډېر لوی مصیبت اخته شول.

¹⁰بیا اسراییلیانو څښتن ته فریاد وکړ او ویې ویل: ”مونږ ستا په مقابل کې ګناه کړې ده ځکه چې ته زمونږ خدای یې او مونږ ته پرېښودلې او د بعل د بتانو عبادت مو شروع کړ.“

¹¹څښتن هغوی ته دا ځواب ورکړ: ”هغه وخت چې مصریانو، اموریانو، عمونیانو، فلسطینیانو،

¹²صیدونیانو، عمالیقیانو او معونیانو په تاسو باندې ظلم کاوه او تاسو ماته فریاد وکړ، آیا له هغوی څخه مې ونه ژغورلئ؟

¹³خو تاسو زه پرېښودم او د نورو خدایانو عبادت مو وکړ، نو زه به نور تاسو ونه ژغورم.

¹⁴لاړ شئ هغو خدایانو ته فریاد وکړئ چې تاسو خپلو ځانونو دپاره غوره کړي دي. کله چې د تکلیف سره مخامخ کېږئ نو پرېږدئ چې هغوی مو وژغوري.“

¹⁵خو د اسراییلو خلکو څښتن ته وویل: ”مونږ ګناه کړې ده. څه چې ستا خوښه وي زمونږ سره یې وکړه، خو اوس مونږ له عمونیانو څخه وژغوره.“

¹⁶نو هغوی له پردیو خدایانو څخه لاس واخیست او د څښتن عبادت یې شروع کړ. نو څښتن نور د هغوی تکلیفونه نه شول لیدلی.

¹⁷بیا د عمونیانو لښکرې د جنګ دپاره تیارې شوې او په جلعاد کې یې خېمې ودرولې. اسراییلیان سره راغونډ شول او د جلعاد په مصفه کې یې خېمې ودرولې.

¹⁸د جلعاد مشرانو یو او بل ته وویل: ”هرچا چې اول په عمونیانو باندې حمله وکړه، هغه به د جلعاد د ټولو خلکو مشر شي.“