Read Pashto (Nangahari) — د پښتو مقدس کتاب قاضيان 11 Bible Online

قاضيان 11 - Pashto (Nangahari) — د پښتو مقدس کتاب bible

قاضيان 11

¹یفتاح یو زړور عسکر ؤ چې د جلعاد څخه ؤ. د هغه د پلار نوم جلعاد ؤ او مور یې فاحشه وه.

²جلعاد د خپلې نکاح کړې ښځې څخه نور زامن هم درلودل. کله چې هغوی لوی شول نو یفتاح یې له کوره وویست او ورته ویې ویل: ”ته به زمونږ په کورنۍ کې میراث ترلاسه نه کړې، ځکه چې ته د بلې ښځې زوی یې.“

³نو یفتاح له خپلو ورونو څخه وتښتېد او د طوب په خاوره کې اوسېده او هلته د هغه په شاوخوا خوشې خلک راټول شول او د هغه پسې شول.

⁴څه موده وروسته عمونیانو د اسراییلو سره جنګ شروع کړ.

⁵نو د جلعاد مشران لاړل چې یفتاح د طوب د خاورې څخه راولي.

⁶هغوی هغه ته وویل: ”راشه او زمونږ قوماندان شه، ترڅو مونږ وکولی شو د عمونیانو سره جګړه وکړو.“

⁷خو یفتاح په ځواب کې وویل: ”تاسو زما څخه دومره کرکه کوله چې زه مو د خپل پلار د کور پرېښودلو ته مجبور کړم. اوس چې په تاسو باندې تکلیف راغلی دی، نو ماته راغلئ.“

⁸مشرانو وویل: ”خو مونږ اوس ستا څخه غواړو چې بېرته راشې. که چېرې د عمونیانو سره په جنګ کې زمونږ مشري وکړې، نو مونږ به تا د جلعاد د ټولو خلکو مشر کړو.“

⁹یفتاح په ځواب کې وویل: ”که چېرې تاسو ما د عمونیانو سره د جګړې دپاره بوزئ او څښتن هغوی ماته په لاس راکړي، آیا زه به په رښتیا ستاسو مشر شم؟“

¹⁰د جلعاد مشرانو یفتاح ته په ځواب کې وویل: ”څښتن به زمونږ ترمنځ شاهد وي. مونږ وعده کوو څه چې ته وایې هماغسې به کوو.“

¹¹نو یفتاح د جلعاد د مشرانو سره لاړ او خلکو هغه خپل مشر او قوماندان وټاکه. کومې خبرې چې یفتاح مشرانو ته کړې وې، هغه یې په مصفه کې د څښتن په حضور کې تکرار کړلې.

¹²بیا یفتاح د عمون پادشاه ته استازي ورولېږل چې هغه ته ووایي: ”ته زمونږ سره څه دښمني لرې؟ تا ولې زمونږ په هېواد باندې حمله کړې ده؟“

¹³د عمون پادشاه د یفتاح استازو ته په ځواب کې وویل: ”کله چې اسراییلیان له مصر څخه ووتل، هغوی زما ځمکه د ارنون له سیند څخه نیولې د یبوق او د اردن د سیندونو پورې ونیوله. اوس په سوله ایز ډول هغه ماته بېرته راکړه.“

¹⁴یفتاح بېرته د عمون پادشاه ته استازي ورولېږل

¹⁵چې هغه ته ووایي: ”دا خبره رښتیا نه ده چې اسراییلو د موآبیانو او عمونیانو ځمکه نیولې وه.

¹⁶بلکه کله چې اسراییلیان له مصر څخه ووتل، هغوی د دښتې په لاره باندې سرې بحیرې ته او بیا قادش ته لاړل.

¹⁷بیا هغوی د ادوم پادشاه ته استازي ولېږل چې له هغه څخه د هغه د خاورې څخه د تېرېدلو دپاره اجازه واخلي، خو د ادوم پادشاه هغوی ته اجازه ورنه کړه. هغوی د موآب له پادشاه څخه هم دا غوښتنه وکړه، خو هغه هم اجازه ورنه کړه چې د هغوی د خاورې په لاره لاړ شي. نو اسراییلیان په قادش کې پاتې شول.

¹⁸بیا هغوی د دښتې په لاره لاړل او د ادوم او د موآب په هېوادونو باندې راتاو شول او د موآب ختیځ خواته راغلل. د ارنون د سیند په بله غاړه باندې یې خېمې ودرولې، مګر د ارنون د سیند څخه تېر نه شول ځکه چې هغه د موآب سرحد ؤ.

¹⁹بیا اسراییلیانو سیحون د اموریانو پادشاه ته چې پایتخت یې په حشبون کې ؤ، استازي ولېږل او له هغه څخه یې اجازه وغوښتله چې د هغوی د خاورې په لاره باندې خپل هېواد ته لاړ شي.

²⁰مګر سیحون په اسراییلیانو باندې اعتبار ونه کړ چې د هغه د سیمې له لارې تېر شي. هغه خپل ټول نفر راغونډ کړل او په یاهص کې یې خېمې ودرولې او په اسراییلیانو باندې یې حمله وکړه.

²¹خو د اسراییلو څښتن خدای اسراییلیان په سیحون او د هغه په لښکر باندې بریالي کړل. نو اسراییلیانو د هغو اموریانو ټوله سیمه چې هغوی په کې اوسېدل ونیوله.

²²هغوی د اموریانو ټوله سیمه د ارنون له سیند څخه د یبوق تر سیند پورې او د دښتې څخه د اردن تر سیند پورې ونیوله.

²³نو دا د اسراییلو څښتن خدای ؤ چې د خپل قوم یعنې اسراییلو په خاطر یې اموریان وشړل. آیا تاسو د دې هڅه کوئ چې هغه بېرته واخلئ؟

²⁴هرڅه چې تاسو ته خپل خدای کموش درکړي دي هغه تاسو خپلو ځانونو ته وساتئ، خو هرڅه چې زمونږ څښتن خدای مونږ ته راکړي دي هغه به مونږ خپلو ځانونو ته وساتو.

²⁵آیا ته د صفور د زوی بالاق څخه چې د موآب پادشاه ؤ بهتر یې؟ آیا هغه کله د اسراییلو سره کومه دعوه کړې ده یا یې د هغوی سره جګړه کړې ده؟

²⁶درې سوه کاله کیږي چې اسراییلیان په حشبون، عروعیر او د هغو شاوخوا کلیو او هغو ټولو ښارګوټو کې چې د ارنون د سیند په غاړه پراته دي اوسیږي. تاسو په هغه وخت کې ولې هغه بېرته ونه نیول؟

²⁷ما ستا سره څه بدي نه ده کړې، بلکه ته زما سره بدي کوې او راغلی یې چې جګړه راسره وکړې. څښتن چې قاضي دی، پرېږده چې هغه نن د اسراییلیانو او عمونیانو ترمنځ پرېکړه وکړي چې زمونږ څخه کوم یو په حقه دی، اسراییل یا عمون.“

²⁸خو د عمون پادشاه د یفتاح پیغام ته هیڅ توجه ونه کړه.

²⁹بیا په یفتاح باندې د څښتن روح نازل شو. څنګه چې هغه د جلعاد او منسي څخه تېر شو، یو لښکر یې تیار کړ او د جلعاد مصفې ته راستون شو او له هغه ځای څخه عمون ته لاړ.

³⁰یفتاح د څښتن سره قسم وخوړ او ویې ویل: ”که چېرې عمونیان ماته په لاس راکړې،

³¹نو کله چې زه په بریالیتوب سره راستون شم نو اولنی نفر چې زما د کور څخه به زما لیدلو ته راووزي، هغه به د څښتن وي او زه به هغه د سوزېدونکې نذارنې په توګه قرباني کړم.“

³²نو یفتاح له سیند څخه تېر شو او د عمونیانو سره یې جګړه وکړه او څښتن هغه ته بری ورکړ.

³³هغه د عروعیر څخه د منیت د شاوخوا سیمې پورې او د آبیل کرامیم پورې شل ښارګوټي له منځه یوړل. په هغه ځای کې زیاته وژنه وشوه او عمونیانو د اسراییلو له خوا ماتې وخوړله.

³⁴کله چې یفتاح خپل کور ته چې په مصفه کې ؤ راستون شو، هغه نفر چې د هغه مخې ته ورغی د هغه لور وه، هغې نڅا کوله او چمبه یې وهله. دا د هغه یوازینی اولاد ؤ. له هغې پرته هغه نه زوی درلود او نه لور.

³⁵کله چې هغه خپله لور ولیدله نو له غمه یې خپل کالي وشلول او چیغې یې کړې: ”ای زما لورې! تا زما زړه مات کړ! ولې دې زه ودردولم؟ ما څښتن ته نذر منلی دی او زه نه شم کولی چې د هغه څخه وګرځم.“

³⁶هغې ورته وویل: ”که چېرې تا د څښتن سره وعده کړې وي، نو څنګه چې دې ویلي دي هماغسې کار راسره وکړه، ځکه چې څښتن ستا له دښمنانو یعنې عمونیانو څخه ستا بدله واخیسته.“

³⁷مګر هغې د خپل پلار څخه دا غوښتنه وکړه: ”زما دپاره یو کار وکړه. ما د دوو میاشتو دپاره پرېږده چې د خپلو ملګرو سره په غرونو کې وګرځم او هلته ویر وکړم ځکه چې زه به په پېغلتوب کې مړه شم.“

³⁸هغه وویل: ”لاړه شه“ او هغه یې پرېښودله چې د دوو میاشتو دپاره لاړه شي. هغه د نجونو سره غرونو ته لاړه او ویې ژړل ځکه چې هغه به ناواده شوې او بې اولاده مړه شي.

³⁹وروسته له دوو میاشتو هغه بېرته خپل پلار ته راغله او د هغې پلار چې څښتن ته کوم نذر منلی ؤ هغه یې پوره کړ او هغه پېغله وه چې مړه شوه. له دې وروسته دا په اسراییلو کې یو رواج شو

⁴⁰چې هر کال به د اسراییلو پېغلې د څلورو ورځو دپاره وتلې او د جلعادي یفتاح د لور دپاره به یې ویر کاوه.