Read Pashto (Nangahari) — د پښتو مقدس کتاب قاضيان 17 Bible Online

قاضيان 17 - Pashto (Nangahari) — د پښتو مقدس کتاب bible

قاضيان 17

¹د افرایم په غرنۍ سیمه کې یو سړی چې نوم یې میکا ؤ اوسېده.

²یوه ورځ هغه خپلې مور ته وویل: ”آیا هغه یوولس سوه مثقاله سپین زر دې په یاد دي چې ستا څخه غلا شوي وو؟ کله چې تا هغه نفر ته چې هغه یې پټ کړي وو ښېرې وکړلې زه په هغه ځای کې وم. دا کار ما کړی ؤ.“ مور یې وویل: ”زویه څرنګه چې تا اقرار وکړ نو څښتن دې تاته برکت درکړي!“

³هغه سپین زر بېرته خپلې مور ته ورکړل او هغې وویل: ”زه دا سپین زر د خپل زوی له خوا څښتن ته وقف کوم. له دې څخه به د لرګي د بت په جوړولو کې چې د سپینو زرو پوښ به ورته ورکړل شي کار واخیستل شي. نو زه به دا سپین زر بېرته تاته درکړم.“

⁴خو هغه دا سپین زر بېرته خپلې مور ته ورکړل. هغې دوه سوه مثقاله سپین زر واخیستل او یو زرګر ته یې ورکړل او هغه د لرګي یو بت جوړ کړ او د سپینو زرو پوښ یې ورته ورکړ. بیا یې هغه د میکا په کور کې کېښود.

⁵میکا بتخانه درلوده. هغه یو څو بتان او یو سپېڅلی پېشبند جوړ کړ او له خپلو زامنو څخه یې یو تن د خپل کاهن په توګه وټاکه.

⁶په هغه زمانه کې اسراییلو پادشاه نه درلود، نو هرچا به هغه کارونه کول چې زړه یې غوښتل.

⁷په دې وخت کې یو ځوان لاوي ؤ چې د یهودا د بیت لحم په ښارګوټي کې اوسېده.

⁸هغه د بیت لحم څخه لاړ چې د اوسېدلو دپاره کوم بل ځای پیدا کړي. هغه په لاره کې د میکا کور ته چې د افرایم په غرنۍ سیمه کې ؤ راغی.

⁹میکا له هغه څخه پوښتنه وکړه: ”ته د کوم ځای څخه راغلی یې؟“ هغه په ځواب کې وویل: ”زه لاوي یم او په یهودا کې د بیت لحم یم. د اوسېدلو دپاره ځای لټوم.“

¹⁰میکا وویل: ”زما سره واوسېږه او زما مشاور او کاهن شه. زه به تاته په کال کې لس مثقاله سپین زر، یو څه کالي او ډوډۍ درکوم.“

¹¹۱۱‏-۱۲ نو هغه ځوان لاوي په دې راضي شو چې د میکا سره واوسیږي او میکا هغه د کاهن په توګه وټاکه. هغه د میکا په کور کې اوسېده او میکا د هغه سره لکه د خپلو زامنو په شان رویه کوله.

¹³میکا وویل: ”اوس زه پوهېږم چې څښتن به راته برکت راکړي، ځکه چې دغه لاوي زما کاهن دی.“