Read Pashto (Nangahari) — د پښتو مقدس کتاب قاضيان 18 Bible Online

قاضيان 18 - Pashto (Nangahari) — د پښتو مقدس کتاب bible

قاضيان 18

¹په هغې زمانه کې اسراییلو پادشاه نه درلود. د دان قبیلې یو ځای لټاوه چې په کې واوسیږي، ځکه چې هغوی لا تر هغه وخته پورې د اسراییلو د قبیلو په منځ کې خپله ځمکه ترلاسه کړې نه وه.

²نو د دان د قبیلې خلکو د خپلو طایفو څخه پنځه تنه جنګي نفر له زرعه او اشتاول څخه ولېږل چې د هغې خاورې وضع وڅېړي چې هغوی غوښتل په کې واوسیږي. کله چې هغه نفر د افرایم غرنۍ سیمې ته ورسېدل نو د میکا کور ته راغلل او هلته یې شپه تېره کړه.

³هغوی په هغه ځای کې د ځوان لاوي لهجه وپېژندله، نو هغوی ورغلل او پوښتنه یې ورڅخه وکړه: ”ته دلته څه کوې؟ چا دلته راوستی یې؟“

⁴هغه ځواب ورکړ: ”ما د میکا سره یو قرارداد کړی دی او هغه ماته د کاهنتوب د خدمت په بدل کې اجوره راکوي.“

⁵بیا هغوی ورته وویل: ”مهرباني وکړه د خدای څخه سوال وکړه چې مونږ به په دې سفر کې بریالي شو که نه.“

⁶کاهن هغوی ته په ځواب کې وویل: ”په خیر لاړ شئ، څښتن به تاسو په دې سفر کې وساتي.“

⁷نو هغه پنځه نفره روان شول او د لایش ښار ته لاړل. هغوی ولیدل چې د هغه ځای خلک د صیدونیانو په شان په سوله او امن کې ژوند کوي. هغوی ارام خلک وو او په خاطر جمعۍ سره یې ژوند تېراوه. د هغوی سره د هیڅ شي کمی نه ؤ. هغوی له صیدونیانو څخه لېرې اوسېدل او د بل چا سره یې معامله نه درلودله.

⁸کله چې هغه نفر بېرته زرعه او اشتاول ته راستانه شول، نو خلکو ورڅخه پوښتنه وکړه چې ”تاسو څه خبر راوړی دی؟“

⁹هغوی په ځواب کې وویل: ”راځئ چې په لایش باندې حمله وکړو. مونږ هغه ځمکه ولیدله، هغه ډېره ښه ځمکه ده. زړه نازړه کېږئ مه! لاړ شئ او هغه ونیسئ!

¹⁰کله چې هلته ورسېدلئ، تاسو به ووینئ چې هغه بې غمه خلک دي. هغه یو لوی وطن دی هرڅه چې وغواړئ هلته شته او خدای هغه تاسو ته درکړی دی.“

¹¹نو د دان د قبیلې څخه شپږ سوه تنه د جګړې دپاره تیار شول او د زرعه او اشتاول څخه روان شول.

¹²هغوی لاړل او د یهودا د قریت یعاریم د ښار په لوېدیځ کې یې خېمې ودرولې. په دې خاطر هغه ځای تر نن ورځې پورې د دان د کمپ په نوم یادیږي.

¹³بیا هغوی له هغه ځای څخه لاړل او د میکا کور ته چې د افرایم په غرنۍ سیمه کې ؤ ورغلل.

¹⁴هغو پنځو نفرو چې د لایش خاوره یې کتلې وه خپلو ملګرو ته وویل: ”آیا تاسو پوهېږئ چې له دغو کورونو څخه په یو کور کې د لرګیو بت دی چې د سپینو زرو پوښ ورته ورکړل شوی دی؟ هلته نور بتان او سپېڅلی پېشبند هم شته. تاسو څه فکر کوئ چې څه باید وکړو؟“

¹⁵نو هغوی د میکا کور ته چې هغه ځوان لاوي په کې اوسېده ننوتل او د هغه لاوي څخه یې د هغه د احوال پوښتنه وکړه.

¹⁶په دې وخت کې د دان شپږ سوه عسکر چې په وسلو باندې سمبال وو، د دروازې په خوله کې ولاړ وو.

¹⁷په داسې حال کې چې کاهن د شپږ سوه وسله والو نفرو سره د دروازې په خوله کې ولاړ ؤ، هغه پنځه جاسوسان دننه ننوتل او په سپینو زرو باندې پوښل شوی بت، نور بتان او سپېڅلی پېشبند یې راواخیستل.

¹⁸کله چې کاهن ولیدل چې دا نفر سپېڅلي شیان وړي، نو د هغوی څخه یې پوښتنه وکړه: ”تاسو څه کوئ؟“

¹⁹هغوی وویل: ”غلی شه! خوله دې بنده کړه! زمونږ سره راځه او زمونږ کاهن او مشاور شه. تاته کومه خبره ښه ښکاري، چې د یو نفر د کورنۍ کاهن شې او که د اسراییلو د یوې قبیلې کاهن شې؟“

²⁰په دې خبره کاهن ډېر خوشاله شو. نو هغه سپېڅلي شیان واخیستل او د هغوی سره لاړ.

²¹هغوی خپل ماشومان، حیوانات او خپله شتمني مخکې کړل او په خپله لاره روان شول.

²²کله چې هغوی د میکا له کور څخه یو څه لېرې لاړل، نو میکا خپل ګاونډیان د جګړې دپاره راوغوښتل او هغوی د دان د نفرو پسې روان شول.

²³څنګه چې هغوی ته ورورسېدل نو غږ یې ورباندې وکړ چې ودریږي. د دان نفر راوګرځېدل او له میکا څخه یې پوښتنه وکړه: ”څه خبره ده؟ دا نفر دې ولې راغونډ کړي دي او مونږ تعقیبوې؟“

²⁴میکا په ځواب کې وویل: ”تاسو زما کاهن او هغه خدایان چې ما جوړ کړي وو، یوړل. هیڅ شی مو راته نه دی پریښی. بیا څنګه زما څخه پوښتنه کوئ چې څه خبره ده؟“

²⁵د دان سړیو په ځواب کې وویل: ”زمونږ سره بحث مه کوه هسې نه چې زمونږ ځینې بدخویه نفر درباندې حمله وکړي او ته او ستا کورنۍ به ووژل شي.“

²⁶نو بیا د دان سړي په خپله لاره روان شول. میکا ولیدل چې هغوی ورباندې ډېر قوي دي، نو هغه بېرته خپل کور ته ستون شو.

²⁷۲۷‏-۲۸ کله چې د دان سړیو کاهن او هغه شیان چې میکا جوړ کړي وو یوړل، نو هغوی د لایش په ښارګوټي باندې چې ارام او بې غمه خلک په کې اوسېدل حمله وکړه. هغه ښارګوټی بیت رحوب ته نژدې په یوه دره کې ؤ. هغوی خلک ووژل او ښارګوټی یې وسوزاوه. هیڅوک نه ؤ چې هغوی وژغوري، ځکه چې هغوی د صیدون څخه لېرې اوسېدل او د نورو خلکو سره یې سروکار نه درلود. د دان سړیو هغه ښارګوټی بېرته ودان کړ او په کې واوسېدل.

²⁹د هغه ښارګوټي نوم یې د لایش څخه په دان باندې بدل کړ، یعنې د یعقوب د زامنو څخه د یو زوی په نوم چې د هغوی د قبیلې نیکه ؤ.

³⁰د دان سړیو د خپلو ځانونو دپاره د میکا بت ودراوه او یوناتان د جرشوم زوی او د موسیٰ لمسي د دان د قبیلې دپاره د کاهن په توګه خدمت کاوه. د هغه اولادې تر هغې پورې د کاهنانو په توګه خدمت کاوه ترڅو چې هغه خلک جلاوطنه شول.

³¹سره له دې چې د خدای کور په شیلوه کې ؤ، خو د دان خلکو هغه بت ته عبادت کاوه چې میکا جوړ کړی ؤ.