Read Pashto (Nangahari) — د پښتو مقدس کتاب قاضيان 3 Bible Online

قاضيان 3 - Pashto (Nangahari) — د پښتو مقدس کتاب bible

قاضيان 3

¹نو څښتن په کنعان کې ځینې قومونه پرېښودل چې د هغوی په وسیله هغه اسراییلیان وازمایي چې د کنعان په جګړو کې یې برخه نه وه اخیستې.

²هغه د دې دپاره دا کار وکړ چې د اسراییلو هر نوی نسل باید دا زده کړي چې څنګه جګړه وکړي، په خاصه توګه هغه خلک چې مخکې د جګړې ډګر ته نه وو تللي.

³هغه قومونه چې په دې خاوره کې پاتې شوي وو دا وو: هغه فلسطینیان چې په پنځو ښارونو کې وو، ټول کنعانیان، صیدونیان او همدارنګه حویان چې د لبنان په غرونو کې د بعل حرمون څخه نیولې د حمات تر غاښي پورې اوسېدل.

⁴څښتن دا خلک د دې دپاره پریښي وو چې اسراییلیان ورباندې وازمایي او وګوري چې آیا هغوی د څښتن هغو امرونو ته چې د موسیٰ په وسیله د هغوی نیکونو ته ورکړل شوي وو غاړه ږدي او که نه.

⁵نو اسراییلیان د کنعانیانو، حیتیانو، اموریانو، فرزیانو، حویانو او یبوسیانو په منځ کې اوسېدل.

⁶دوی د هغوی لورګانې خپلو زامنو ته په نکاح کولې او خپلې لورګانې یې د هغوی زامنو ته په نکاح ورکولې او د هغوی د خدایانو عبادت به یې کاوه.

⁷د اسراییلو قوم خپل څښتن خدای هېر کړ. دوی د هغه په مقابل کې ګناه وکړه او د بعل او اشیره د بتانو عبادت یې کاوه.

⁸نو څښتن په اسراییلو باندې ډېر په قهر شو او هغوی یې د بین النهرین پادشاه کوشان رشعتایم ته په لاس ورکړل او هغه اته کاله په هغوی باندې حکومت وکړ.

⁹بیا اسراییلیانو څښتن ته فریاد وکړ، هغه ورته د کالیب د کشر ورور قناز زوی عتنیئیل راولېږه چې هغوی وژغوري.

¹⁰د څښتن روح په هغه باندې نازل شو او هغه د اسراییلو مشر شو. عتنیئیل جګړې ته لاړ او څښتن هغه د بین النهرین په پادشاه کوشان رشعتایم باندې بریالی کړ.

¹¹د اسراییلو په خاوره کې څلوېښت کاله ارامي وه او وروسته بیا عتنیئیل مړ شو.

¹²د اسراییلو خلکو بیا داسې کارونه وکړل چې د څښتن په نظر کې بد وو. د هغوی د بدیو له کبله څښتن عجلون د موآب پادشاه د اسراییلو په مقابل کې قوي کړ.

¹³عجلون د عمونیانو او عمالیقیانو سره یو ځای شو. عجلون راغی او په اسراییلو باندې یې حمله وکړه او هغوی اریحا یعنې د خرما د ونو ښار ونیو.

¹⁴د موآب پادشاه عجلون په اسراییلیانو باندې اتلس کاله حکومت وکړ.

¹⁵بیا اسراییلیانو څښتن ته فریاد وکړ. هغه دوی ته یو نفر ورولېږه چې دوی وژغوري. د هغه نوم ایهود ؤ چې چپ لاسی ؤ او د جیرا زوی ؤ چې د بنیامین د قبیلې څخه ؤ. اسراییلیانو د هغه په لاس د موآب پادشاه عجلون ته باج ولېږه.

¹⁶ایهود یوه دوه مخې توره جوړه کړې وه چې نیم متر اوږده وه. هغه دا توره د خپلو کالیو لاندې په خپل ښي ورون باندې وتړله.

¹⁷هغه د موآب پادشاه عجلون ته چې ډېر چاغ سړی ؤ باج وړاندې کړ.

¹⁸کله چې ایهود هغه ته باج وړاندې کړ، هغه دا نفر چې باج یې انتقال کړی ؤ بېرته خپلو کورونو ته ولېږل.

¹⁹خو ایهود په خپله د هغو مجسمو سره چې جلجال ته نژدې وې راوګرځېده، بېرته پادشاه ته ورغی او ورته ویې ویل: ”ای پادشاه زه ستاسو دپاره یو پټ پیغام لرم.“ پادشاه خپلو خدمتګارانو ته وویل: ”مونږ یوازې پرېږدئ!“ او هغوی ټول ووتل.

²⁰په داسې حال کې چې پادشاه په خپلې هواداره بالاخانه کې یوازې ناست ؤ، ایهود هغه ته ورغی او ورته ویې ویل: ”زه ستاسو دپاره د خدای له طرفه یو پیغام لرم.“ پادشاه پاڅېده.

²¹ایهود په خپل چپ لاس باندې د خپل ښي اړخ څخه توره راوویستله او د پادشاه په ګېډه کې یې ورومنډله.

²²توره د لاستي سره د هغه په ګېډه کې ننوته او د پښو له منځ څخه یې راووتله. ایهود د هغه د ګېډې څخه توره ونه ویستله او د هغه په وازګه کې پټه شوه.

²³بیا ایهود برنډې ته ووت. هغه پادشاه پسې د کوټې دروازې بندې او قلف کړې.

²⁴د ایهود د تګ څخه وروسته د پادشاه خدمتګاران راغلل او ویې لیدل چې د کوټې دروازې قلف دي. هغوی فکر کاوه چې پادشاه به دننه خپل حاجت پوره کوي.

²⁵هغوی زیات انتظار وویست، تر هغې پورې چې وارخطا شول. خو کله چې هغه د کوټې دروازې خلاصې نه کړې، هغوی کلي واخیسته او دروازې یې خلاصې کړې. هغوی ولیدل چې بادار یې په غولي باندې مړ پروت دی.

²⁶په هغه وخت کې چې هغوی انتظار کاوه، ایهود وتښتېده. هغه د مجسمو څخه تېر شو او سعیرت ته ورسېده.

²⁷کله چې ایهود د افرایم غرنۍ سیمې ته ورسېده، نو سرنی یې وواهه او اسراییلیان د هغه سره د غونډیو څخه راکوز شول او هغه یې مشري کوله.

²⁸هغوی ته یې وویل: ”ما پسې راځئ! ځکه چې څښتن ستاسو دښمن یعنې موآب تاسو ته تسلیم کړی دی.“ نو دوی د هغه پسې روان شول او د اردن ګودرونه یې چې موآب ته د تېرېدلو لاره وه ونیول او څوک یې نه پرېښودل چې له هغو څخه تېر شي.

²⁹په هغه ورځ هغوی د موآبیانو نژدې لس زره تکړه عسکر ووژل، هیچا ونه شو کولی چې وتښتي.

³⁰نو اسراییلیانو موآبیانو ته ماتې ورکړه او د اسراییلو په خاوره کې اتیا کاله ارامي وه.

³¹د ایهود څخه وروسته شمجر د عنات زوی مشر شو. هغه په چوکه باندې شپږسوه فلسطینیان ووژل او اسراییلیان یې ورڅخه وژغورل.