Read Pashto (Nangahari) — د پښتو مقدس کتاب مُکاشفه 17 Bible Online

مُکاشفه 17 - Pashto (Nangahari) — د پښتو مقدس کتاب bible

مُکاشفه 17

¹بيا هغه اُووه فرښتے چه جامُونه ئے نيولى وُو، په هغوئ کښے يوه ما له راغله اَؤ وئے وئيل چه ”راځه! چه زَۀ درته دَ هغے لوئے کنجرئ سره کيدُونکے عدالت وښايم چه دَ ډيرو سمندرُونو دَ پاسه په تخت ناسته ده.

²دَ مزکے بادشاهانو دَ هغے سره بدکارى کړے ده اَؤ دَ هغے دَ حرامکارئ په شرابو دَ دُنيا ټول خلق نشه شوى دى.“

³اَؤ دَ خُدائے رُوح په ما غلبه وکړه اَؤ دَ هغۀ فرښتے زَۀ بيابان ته بوتلم. هلته ما يوه ښځه وليده چه په يو قرمزى رنګ ځنګلى ځناور سوره وه. دَ هغۀ په ټول بدن دَ کُفر نومُونه ليکلى وُو اَؤ اُووۀ سرُونه اَؤ لس ښکرُونه ئے وُو.

⁴هغه ښځے ارغوانى قرمزى رنګ جامے آغوستے وے چه دَ سرو زرو په کالو، جواهراتو اَؤ مرغلرو ډؤلے شوے وه. دَ هغے په لاس کښے دَ سرو زرو پياله وه چه دَ بے حيائى اَؤ دَ هغے دَ حرامکارئ دَ ناپاکئ نه ډکه وه.

⁵اَؤ دَ هغے په تندى يو نُوم ليکلے وو چه راز دے : ”لوئے بابل، دَ کنجرو اَؤ دَ دُنيا دَ هرے بے حيائى مور.“

⁶اَؤ ما وليدل چه هغه ښځه دَ پاکانو په وينه اَؤ دَ عيسىٰ دَ شهيدانو په وينه په نشه وه. کله چه ما هغه وليده نو زَۀ ډير حيران شوم.

⁷خو فرښتے راته ووئيل چه ”دا تۀ دومره ولے حيران يئے؟ زَۀ به درته دَ دے ښځے اَؤ دا چه په کُوم ځنګلى ځناور سوره ده چه اُووۀ سرُونه اَؤ لس ښکرُونه لرى، راز ښکاره کړم.

⁸کُوم ځنګلى ځناور چه تا وليدو، هغه دے چه ژوندے وو خو اوس ژوندے نۀ دے، هغه به دَ عالم ارواح نه راخيژى اَؤ هلاک به شى. اَؤ په دُنيا کښے هغه خلق چه دَ چا نومُونه چه له ازل نه دَ ژوندُون په کتاب کښے نۀ دى ليکلى شوى، هغوئ به دَ ځنګلى ځناور په ليدو حيران شى ځکه چه هغه يو وخت ژوندے وو خو اوس ژوندے نۀ دے، خو بيا به هم ښکاره شى.

⁹اَؤ په دے پوهيدلو دَ پاره ډير حِکمت په کار دے. دا اُووۀ سرُونه هغه اُووۀ غرُونه دى چه دا ښځه پرے ناسته ده، خو دوئ هم اُووۀ بادشاهان دى

¹⁰چه پينځۀ پخوا تير شوى دى اَؤ يو ژوندے دے اَؤ يو بل به راځى اَؤ کله چه هغه راشى نو هغه به دَ لږ وخت دَ پاره وى.

¹¹اَؤ هغه ځنګلى ځناور چه يو وخت ژوندے وو اَؤ اوس ژوندے نۀ دے، هغه اَتم بادشاه دے، خو بيا هم هغه له اُوو نه يو دے اَؤ هغه به هلاک شى.

¹²کُوم لس ښکرُونه چه تا وليدل، هغه لس بادشاهان دى چه هغوئ لا حکُومت نۀ دے شروع کړے، خو هغوئ به دَ يوے ګينټے دَ پاره دَ ځنګلى ځناور سره دَ بادشاهئ اِختيار ومُومى.

¹³ځکه چه دَ هغه ټولو يو مقصد دے چه خپل طاقت اَؤ اِختيار ځنګلى ځناور ته ورکړى.

¹⁴هغوئ به دَ ګډُورى سره جنګ وکړى خو ګډُورے به په هغوئ غالب شى ځکه چه هغه دَ مالِکانو مالِک اَؤ دَ بادشاهانو بادشاه دے، اَؤ هغوئ هم ورسره دى چه بللى شوى، غوره شوى اَؤ وفادار دى.“

¹⁵بيا هغے ما ته ووئيل چه ”تا چه کُوم سمندر وليدو چه لويه کنجرئ پرے ناسته وه، دا دَ خلقو جميعتُونه، قومُونه اَؤ ژبے دى.

¹⁶هغه لس ښکرُونه چه تا وليدل، هغه به سره دَ ځنګلى ځناور له دے کنجرئ سره دُښمنى کوى، هغوئ به دا بربنډه اَؤ برباده کړى اَؤ دَ هغے غوښه به وخورى اَؤ په اور به ئے اِيرے کړى.

¹⁷ځکه چه خُدائے دَ دوئ په زړُونو کښے دا خبره اچولے ده چه دوئ به په يو زړۀ دَ خُدائے دَ مقصد دَ پُوره کولو دَ پاره ځنګلى ځناور ته دَ خپلے بادشاهئ اِختيار ورکړى، تر څو چه دَ خُدائے کلام پُوره نۀ شى.

¹⁸دا ښځه چه تا وليده هغه لوئے ښار دے چه دَ مزکے په بادشاهانو حکُومت کوى.“