Read Pashto (Nangahari) — د پښتو مقدس کتاب اول سموئيل 15 Bible Online

اول سموئيل 15 - Pashto (Nangahari) — د پښتو مقدس کتاب bible

اول سموئيل 15

¹سموئیل شائول ته وویل: ”زه څښتن راولېږلم چې تا غوره کړم چې د هغه په قوم اسراییلو باندې پادشاه شې. نو اوس د څښتن پیغام ته غوږ ونیسه.

²مطلق قادر څښتن داسې وایي: زه به عمالیقیانو ته د هغه کار سزا ورکړم، کوم چې دوی پخوا د اسراییلو سره کړی ؤ. ځکه په هغه وخت کې چې اسراییلیان د مصر څخه راوتل د هغوی لاره یې نیولې وه.

³اوس لاړ شه په عمالیقیانو باندې حمله وکړه او هرڅه چې د دوی سره دي هغه ټول په بشپړه توګه له منځه یوسه، په هغوی باندې زړه ونه سوزوې. یو شی هم ژوندی مه پرېږده. سړي، ښځې، ماشومان او تي رودونکي ماشومان، غوایان، پسونه، اوښان او خره یې ووژنه.“

⁴شائول خپل ځواکونه سره راغونډ کړل او په طلایم کې یې د هغوی څخه لیدنه وکړه. په هغو کې د اسراییلو څخه دوه لکه او د یهودا څخه لس زره پیاده عسکر وو.

⁵بیا هغه د خپلو عسکرو سره د عمالیق ښار ته ورغی او په یو وچ خوړ کې یې کمین ونیوه.

⁶بیا شائول قینیانو ته اخطار ورکړ: ”د عمالیقیانو څخه لېرې شئ ترڅو تاسو له هغوی سره یوځای له منځه یونسم. ځکه کله چې اسراییلیان له مصر څخه راوتل تاسو په هغوی باندې مهرباني او ښه سلوک کاوه.“ نو قینیان له عمالیقیانو څخه لېرې شول.

⁷شائول د حویله څخه تر شور پورې چې د مصر په ختیځ کې دی جنګ وکړ او عمالیقیانو ته یې ماتې ورکړه.

⁸هغه د عمالیق پادشاه اجاج ژوندی ونیوه او ټول خلک یې ووژل.

⁹مګر شائول او د هغه نفرو د اجاج ژوند وژغوره. هغوی ښه پسونه، غوایان، ښه خوسي، وري یا نور هغه څه چې ښه وو هغه یې ونه وژل. دوی یوازې هغه څاروي ووژل چې کمزوري یا بې ارزښته وو.

¹⁰څښتن سموئیل ته داسې وفرمایل:

¹¹”زه پښېمان یم چې شائول مې پادشاه کړ. هغه زما څخه ګرځېدلی دی او زما د حکمونو څخه یې سرغړونه وکړه.“ سموئیل په قهر شو او ټوله شپه یې څښتن ته زاري وکړه.

¹²سموئیل سهار وختي راپاڅېد او لاړ چې د شائول سره ملاقات وکړي. مګر هغه خبر شو چې شائول د کرمل ښار ته تللی دی، د خپل ځان د عزت په خاطر یې یو یادګاري څلی جوړ کړی دی او جلجال ته تللی دی.

¹³کله چې سموئیل شائول پیدا کړ، شائول هغه ته وویل: ”ای سموئیله! څښتن دې تاته برکت درکړي. وګوره، ما د څښتن حکم سرته ورساوه.“

¹⁴سموئیل پوښتنه وکړه: ”نو بیا ولې زه د غوایانو او پسونو رمباړې اورم؟“

¹⁵شائول ځواب ورکړ: ”زما عسکرو دا د عمالیقیانو څخه راوستي دي، هغوی ډېر ښه پسونه او غوایان ساتلي دي چې ستا د څښتن خدای لپاره یې قرباني کړي. پاتې مو په بشپړه توګه له منځه وړي دي.“

¹⁶سموئیل شائول ته وویل: ”غلی شه! غوږ ونیسه ترڅو د څښتن خبره چې تېره شپه یې ماته کړې وه درته ووایم.“ شائول ځواب ورکړ: ”ووایه.“

¹⁷سموئیل وویل: ”که څه هم ته خپل ځان لوی نه ګڼې، ته د اسراییلو د قبیلو مشر یې. څښتن ته غوره کړې چې د اسراییلو پادشاه شې

¹⁸او ته یې د یوې وظیفې دپاره ولېږلې ویې ویل: دا ګناهکاره قوم عمالیقیان په بشپړه توګه له منځه یوسه، د هغوی سره جنګ وکړه تر هغې پورې چې دوی ټول ووژل شي.

¹⁹نو بیا ولې تا د څښتن خبره ونه منله؟ ولې دې په غنیمت باندې حمله وکړه؟ ولې هغه څه چې د څښتن په نظر کې بد وو هغه دې وکړل؟“

²⁰شائول وویل: ”مګر ما د څښتن خبره منلې ده، زه په هغې وظیفې باندې لاړم چې څښتن ماته راسپارلې وه. ما عمالیقیان په بشپړه توګه له منځه یوړل او د هغوی پادشاه اجاج مې راوست.

²¹عسکرو د غنیمت څخه پسونه او غوایان واخیستل، یعنې ترټولو ښه حیوانات چې خدای ته وقف شوي وو ترڅو هغه په جلجال کې ستا څښتن خدای ته قرباني کړي.“

²²سموئیل وویل: ”آیا څښتن هم دومره په سوزېدونکو نذرانو او قربانیو باندې خوشالیږي لکه څنګه چې د اطاعت په کولو باندې؟ ګوره! هغه ته اطاعت کول د قربانۍ څخه ښه دي او د هغه په خبره عمل کول د پسونو د وازګې د قربانۍ څخه ښه دي.

²³ځکه د هغه په مقابل کې یاغي توب لکه د فال کتلو په شان بد عمل دی او غرور د بت پرستۍ په شان یوه ګناه ده. په دې سبب چې تا د څښتن حکم رد کړی دی نو ته یې د پادشاه په توګه رد کړی یې.“

²⁴شائول ځواب ورکړ: ”هو، ما ګناه کړې ده. ما د څښتن د حکم او ستا د لارښودنې څخه سرغړونه کړې ده. زه د خپلو نفرو څخه ووېرېدم او څه چې هغوی غوښتل ما هماغسې وکړل.

²⁵مګر اوس تاته سوال کوم چې زما ګناه وبخښه او زما سره بېرته لاړ شه، ترڅو د څښتن عبادت وکړم.“

²⁶سموئیل ځواب ورکړ: ”زه ستا سره بېرته نه ځم. تا د څښتن حکم نه دی منلی او هغه ته د اسراییلو د پادشاهۍ څخه رد کړی یې.“

²⁷څنګه چې سموئیل وګرځېده چې لاړ شي، شائول د هغه د چپنې څنډه ونیوله او هغه څیرې شوه.

²⁸سموئیل هغه ته وویل: ”نن ورځ څښتن ستا څخه د اسراییلو پادشاهي واخیسته او هغه یې بل چاته ورکړه چې هغه د ستا څخه ښه دی.

²⁹د اسراییلو خدای چې لوی او ابدي دی هغه دروغ نه وایي یا خپله اراده نه بدلوي. هغه انسان نه دی چې خپله اراده بدله کړي.“

³⁰شائول بیا زاري کوله ویل یې: ”سمه ده، ما ګناه کړې ده. خو زما د قوم د سپین ږیرو او اسراییلیانو په مخکې زما عزت وکړه، بېرته زما سره لاړ شه چې ستا د څښتن خدای عبادت وکړم.“

³¹نو سموئیل بېرته د شائول سره لاړ او شائول د څښتن عبادت وکړ.

³²سموئیل وویل: ”د عمالیقیانو پادشاه اجاج ماته راولئ.“ اجاج په ډاډه زړه هغه ته ورغی، فکر یې کاوه چې په یقین سره د مرګ خطر تېر شوی دی.

³³مګر سموئیل وویل: ”لکه څنګه چې ستا تورې ډېرې ښځې بې اولاده کړې دي نو همدارنګه ستا مور به هم بې اولاده شي.“ او سموئیل اجاج په جلجال کې د څښتن په مخکې ټوټې ټوټې کړ.

³⁴بیا سموئیل رامې ته لاړ او شائول خپل کور ته چې په جبعه کې ؤ ورستون شو.

³⁵تر هغې پورې چې سموئیل ژوندی ؤ هغه بیا هیڅکله شائول ونه لیده. مګر سموئیل د شائول دپاره ویر کاوه. څښتن په دې باندې پښېمانه شو چې شائول یې په اسراییلو باندې پادشاه کړی ؤ.